Saturday, April 16, 2016

Tukin - Inrinni tuk ruah sur chu a!!

Tukin chu, Inrinni bazar tur tam takte ruah sur leh thli thaw hian a tibuai ngei ang le!  Chutihlaiin, chawhmeh zuar thrutna thra nei lo, kawngsir remchâng laia thru te pawh a tibuai ve tho ngei awm sia.!

Bazar tur tan chuan ruah sur bân hun te a la nghah theih a, a zuartu tân erawh duh hun hun a kal a rem ve si lo. Threnkhat te phei chu Aizawl pawn atranga rawn kal, an fanau naupang tak tak te kalsana, nizana an chawhmeh zawrh tur kawngkama lo tlaivarpui tawhte an ni leh nghal a.

Ruah sur bân hnuah pawh anni chu an la berh chap anga, beksam huh kawi niaihin an chawhmeh zawrh chu thrutpuiin, hralh ve ngei tumin an lo hmanhlel leh ngei ang a. Nu hausa deuh zawk ten hul phiangin lei tur an rawn melh kual ang a, a zuartu dinhmun chhut map lovin Rs.30 man te pawh chu tlawm taka lei phêt an tum leh ngei awm sia.

Khualral leh Aizawl daifêm atranga kawngsir rem leh rem lova chawhmeh zuar tu tamtakte hian an damkhawchhuahna tur bâkah an fate sikul zirlaibu man turte, Uniform man tur te an tuak a, an zawrh chhuah zawng zawng pawh hi hralh vek ta se, cheng sâng tam man a ni lo. A dawrtute pawh hian chu chu kan hriatthiampui ve a thra khawp mai.

Tuesday, April 5, 2016

Zanin Zet Zawng

05.04.2016 Tuesday:

Zanriah eikham hnuah News te ka ngaihthlak duhtawk hnu chuan, hmanhmawh lo takin thingpui sen hâng ka in a. Chutih lai tak chuan pawn lamah chuan thawm ri vuk vuk chu ka hre ta a. Kan tukverh inkhar nghet lo laite chu a rawn rik dawt dawt bakah kan bathlarah te chuan vaivut nawi leh hnahthel ro te a rawn tla chum chum bawk a.

Zan zanah ruahsur lai leh nghal a chutia rawn ri ta rum rum mai chu, ruah sur ri chauh a ni lo tawp mai tiin kan tukverah chuan ka va dakchhuak ta a, chuta ka thil hmuh leh hriat chu.!

Ka dah chhuah hma chiah khan engemaw tak hian kan In leh a vel chu a rawn kal pel thuak ni hian ka hria a. Kan bathlar a kan puan them zar, zan dangah pawh kan seng luh ngai lem loh te chu a rawn su thawi nge? zui ve an tum zawk ni, an lo phe vawn vawn mai a, eng tak ni maw tiin, vaivut leh hnahthel nawi lengvel karah kan kawmchar a thingbuk lam chu uluk deuhin ka va thlir leh hrâm a.

Kan kawmchara Thingbuk te pawh chuan engemaw tak an hria a ni ngei ang, an lo phusa nasa mai a, an zar buk te chu nidang ang lo takin an lo kûn hniam suau suau a. Chutiang chiah chuan, thenawmte pangpar khawi te leh phuihnam kung te, an saisu kung te pawh chuan, anmahni rawn kal pel thuak tu chu zui ve tum ni awm takin an lo phe suau suau a. Ka thlir deuh reng a, thenawmte pawh chu an tukverh ah chuan an lo dakchhuak ve sap sap a, mahse hmuh an nei bik nge ka hre lo, rang takin an tukverh leh kawngka te chu an khar a, an kalh ri rawk rawk hlawm a.

Rei ngial ka thlir hnu chuan ruah a rawn tam zual ta hret a, khawpui a rawn ri ta dur dur bawk a, chu chu kawlphe in a rawn pawlh zuai zuai a, tukverh chu nghet taka kharin inchhûng atang chuan tukverh darthlalang phen atangin ka thlir zui ta zel a. Nakin deuhah chuan thenawm te Avogado kung, buk laih mai pawh chu a chet dan a nep ta deuh a, kan puan them zar te pawhin min rawn kalpeltu chu zui zel tumna a nei ta lo a niang, an phe chu a zuai ta raih a, ruah erawh a la sur cherh cherh zel tho a.

Chutia pawn lam thlir a, ka en ngai ka en reng lai chuan, suangtuahna khawvelah cheng zui nghalin, kan naupan lai hunah chuan ka let leh ta a.  Sikul naupang kan nih lai hun te, fur laia sikul kal paha Theihai sên tla kan chhar thin lai te, exam dawna lehkha kan zir ve lauh lauh lai te leh kan zirlaibu thu thenkhat te chu ka hre chhuak thar uarh uarh a.

Kan zirlaibu a thu thenkhat, "Boruak che hi THLI an ti" tih te, "Boruak chu a delhrittu tamna atangin, a delhrittu tlemna hmun lamah a insawn thin a, chu boruak che vel chu THLI kan tih hi a ni" tih te a ni tain ka hria. Ka lung a leng thar hle a. Mahse, current rawn awm thut a, ka awmna a rawn eng ta ut mai chuan ka ngaihtuahna a rawn sawn leh ta daih a.

Kan zirlaibu ami ang khan,  zanina min rawn paltlangtu, kan In leh a chheh vel hnahthel leh pawnchhe khai te, pangpar khawi te leh thenawmte  thingbuk ten an lo rikpui hluai, keiin engnge ni aw ti a, hmuh tuma ka lo thlir kha, boruak che vel THLI chu a lo ni reng mai tih ka ngaihtuah chhuak ta a.

Siamtu Pathianin mit tha tak min pe a, chutih laiin kan hmuh theih loh turin Thli a siam thiam a, a mak ve ngawt mai. Chutih laiin thli chu a thawm leh a hnathawhte kan hmuin kan hre thei thung. Hetianga, hmuh theih si loh, nasa taka thil tithei THLI te hian siamtu Pathian ropui zia a tichiang ngawt mai.

Thli hi awm lo ta se, kan chenna khawvel nawm loh dan tur chu a suangtuah phak bak a ni. Khawlum ni a thlifim thaw heuh heuh kan beisei thin lai te hre reng ila, min ti harh sawng sawng thei tu a ni a, chu chu tun trumah nasa deuh zawkin a rawn thleng ta mai zawk a, kan khawvel a boruak lum leh vawt inthlak thlengin a ken tel, kan tana he khawvel lo nawm zelna tur a lo thawk a ni. Chuvangin Thli te pawh hi an chhia lawh mai lo ang u.

Zanin zet zawng, Thli kha a thaw hawm hawm em a ni.