THU NAWI LAWRKHAWM

         Facebook lam hian hmun leh hun a luah tam ta viau mai si a, Facebook Timeline lamah thuthar a tam deuh. Ka Timeline a mi hetah hian kan dah lut ve leh ang e. (August leh September, 2013 a mi ṭhan khat chauh).

Rinngam i nihna hian,
Rinawmna hlutzia min zirtir a.
I thatna leh zahngaihna avang hian,
Ngaih thra takin ka awm  thrin.
Duhawmna leh thatna te hi,
Duh duha neih theih a ni ngawt lo,
Mahse nang chu i duhawm reng si.
____________________________

I ka a chuak 'Mangtha' hi a hlu bik a,

I aw in 'Mangtha' a tih ri hi

A mawi bik a ni tih hi,
A dawngtu i ni ve silo a;

I hre thiam ve ngai dawn lo a ni.
____________________________

Saltâng ni hauh si lovin;
Saltâng ang maiin ka awm fo thin.
Saltânna atà zalên turin;
Saltâng vêk rawn hauh suh.
____________________________

Duhthlanna dik siam turin;
Duhthusam kan neih a ngai.
Duhthusam thleng dik turin;
Duhthlanna dik kan siam a ngai.
____________________________

Nang vanga thutlukna ka siam tâk zozaite kha.
Nang vang vekin ka sut leh fo mai…
____________________________

I kiang ata ka kalsawn hian,
I lak ata ka hla ta tihna a ni lo a,
Ka taksa hi hla takah awm mahse,
Ka riltu ngaihtuahnate chu
I kiangah a awm reng si a.
____________________________

Ruahmanna i siampui theihloh nen,

Hlawhtlinna hmel hmuh dun in ring ngai suh.
____________________________

Ka rilru ngaihtuahna hi,

Ka taksa hian zui zel ta se,
I kiangah ka hun tamzawk

Ka hmang ngei ang le..:)
____________________________

In inhmangaih tawnna chu
Pangngai reng mahse;
In inkar thu erawh chu
A pang ngai reng hauh lo ang.
____________________________

I duh ber nen in inkar thu a pangngai reng a nih chuan, in inhmangaihna chuan a vawrtawp a la thleng loah ngai rawh.
____________________________

Khâng hun ka hriat reng fote kha,

Hun pawimawh bik a nih vâng a ni lo va,

Nangmah I tel ve vâng zawk a ni.
____________________________

...#.. a thlum ngaiin a la thlum a, a tui ngaiin ala tui reng a!..amah atanga ri lo chhuak reng reng lah chu hriat hrehawm leh bengchheng a awm lo, a hmelhmangte chu hmuhnawm a ni satliah lo, thlir zui vawng vawng loh theih a ni lo...  a pang mam thelh han mai leh no paw phiai maite chu min cho phur tur hrim hrim a a bika khuanu duan a ni nge.........!
____________________________

Harsatna tawk thin chuan,

Hun harsaah mai ni lo,

Hun hlimawmah pawh

Awmdan  a  thiam thin.
____________________________

Harsatna kan tawh thrinte hian,

Hun harsa leh hun hlimawm a lo thlen huna,
Lo  hmachhawn dan tur min hriattir si a...
____________________________

Harsatna tawk thrin lo ta ila chuan,

Hun hlimawmte  hi,
A hlutna ka hmu fiah thiam lo ang.

____________________________

Nui ila, lungrual ten,
Zai ila, rawl tawpin,
____________________________

Chhai ila, leng tuitir
Rim ila, zawlkhaw tleitir
Sawm ila, lungrual puian.
Tiam ila, kumtluang atan.
____________________________



Malsawmna kan dawng a,
Hlawhtlinna kan hmu a,
Ropuina kan chang a,
Hlimni kan hmanga,
Ka theihna a thleng emaw tiin,
Ka thiamna vâng emaw ka ti thin.
Mahse....
Hlawhchham nite lo thlengin,
Vanduainate tawh chang a,
Lungngaih ni a lo thlen hian,
I hnen chauh lo chu Lalpa,
Kalna tur ka hre si lo.
_______________________________

Thlir ve u maw saw ral saw,
Sawah sawah raltiang saw,
Mualtin tlangtin piah a saw.
A leng lalngovi an rûn a saw.

____________________________

En theh saw a chawnban saw
A mitmeng paw riaite pawh saw.

Rualtin khum a kimtlang saw,

Ka tana khuanu ruat a nih saw.
____________________________

Nang ngaih hi famchan phahna tur ni se chuan e, Ka ngai che tih tu'n an hre hman awm si lo.
____________________________

Awi ka rei, Zan a rei,
Duh ka nei, vei ka nei,
Theih ni se, rem ve se,
Her chhuak se, nui ve se,
Zan tin, ka tan leh a tan...:)
____________________________

Duat tur a ruat,
Mawi tura khuanu chawi,
Nui za tura suih lungrualpui,
Thai chang tura kan rûnsáng kai.
Lo ni la D en chin loh.....
____________________________

Nang vângin thu ka tiam a,
Nang vâng bawkin ka sûtleh a.
Nang vânga ka lungngaihin,
Nang bawkin min hnêm thin.

Nang vângin lungchhiain ka ṭap ṭhin,

Nang vâng bawkin ka bângleh thin.
____________________________

Kan tum láwk anga thil a awm loh hian, kan tum láwk loh anga awm a awl... Hahaa

INDIA INDEPENDENCE DAY

India Independence day 2013 pualin, Independence Day
leh a kaihhnawih thil thleng titi -

1.    India Independence Day atan hian Indopui laia Tangrual pawl (Allied) laka Japan a tlawm champha vawi 2-na Ni chiah “15th August” chu Mountbatten a khan a thlang a ni.
    India Independence Day hi - N. Korea, S.Korea, Bahrain leh Rep of Congo ten an tawm ve bawk.

2.    India in zalenna (Independent) a hmuh ni khan Zalenna sualtu ber Pu Gandhi a chu Culcutta-ah a awm a. Chi(Hnam) hrang hrangte inngeih lohna leh initsikna nasa lutuk chu a do a, Inah Chaw ngheiin La kaiin, a tawngtai nileng.

3.    India Flag hi Pingali Venkayya chuan kum 1921 khan Bezwada-ah a siam. A tirah India rama chi tam ber 2 (Hindu, Muslim) te aiawh turin a Sen leh a Hringin a siam a. Gandhi a chuan Chi (community) dang zawngte aiawhtu turin Rawng Var a telh tir leh a ni.

4.    Khadi Development and Village Industries Commission chauh chu India Flag siam tura phalna pek a ni a. Kum 2008 atang khan Karnataka Khadi gramodyoga Samyukta sangha, Dharwad chu India Flag siamtu a ni ta a ni.
    India Flag hi Karnataka a an La chin thin lartak “Jayadhar” hmangin siam a ni thin a, mahse tunah chuan Tualchhung La chauh hmang lovin Bt Cotton hmangin an siam thin.

5.    National Flag hi 7th Aug, 1906 khan Parsee Bagan square, Culcutta-ah zar hmasak ber a ni.

6.    “Jana Gana Mana” hi Kum 1911 a ziah tawh mah nise, kum 1950 hma lam kha chuan National Anthem a hman a la ni lo.      

7.    Gandhi khan India Independent veleh Congress kha thiah a duh.

8.    India Independent veleh khan, Portugal chuan an Constitution siam tha ve nghalin, Goa chu Portuguese State-ah a puang ve nghal.

9.    India hi Sanskrit chuan “Bharat Ganarajya” ti a koh a ni a, hemi avang hian India chu Bharat tia koh a ni ta a ni. India tih hi tunhma atanga India mite lo khawsak reng tawhna Lui lian leh lar “Indus Lui” hming atanga lak a ni.

10.    India Prime Minister hmasaber Pu Nehru a chanchin Vogue Megazine in a chhuah a. A inthuamna danglam tak chu khaw thlang lamah a lar ta hle a. A Jacket (Single-breasted Jacket) phei chu an uar ta em em a. Zaithiam lar Beatles group ten an vawrh lar belhchhah a, khawvel ah a lar ta hle. Nehru-a Jacket hi “Time List of Global Fashion Statement”-ah ziahluh a ni ta hial a ni.

FULL MOON

          I’m sitting alone, staring at the window, hoping to see again the Moon.   

Full Moon on 22.007.2013 @ Aizawl, Camera : Nokia Lumia 800

           But it’s strange; the Moon that shining brightly in the sky, over Aizawl city has disappeared. Last night it was so big and bright, like a massive silver cheese. But now, it has gone and I don’t know where it gone! 

          Ooo, my blue Moon, I don’t want to lose you; I don’t want to let you go…! Please shine on for me, filled me. Please, be with me tonight…!

Full Moon 22.07.2013 @ Aizawl : Pic - Bsa Sailo

           Oh.. my beautiful blue Moon, won’t you please shine down on me, tonight!??!

TALIBAN-HO NGAMLOH "MALALA YOUSAFZAI"

              He Pakistan hmeichhe naupang kum 16 mi lek MALALA YOUSAFZAI hian khawvel ram hrang hrang, abik takin Afghanistan leh Pakistan ram naupang tam takin Zirna sikul an kal ve thei lo chu a vei hle a. Thuziak hmang ten theih tawp a chhuah a. Hetianga thuziak hmanga ṭan a lâk avang hian Taliban hoten an kap hlum ṭep a nih kha.

              Ni 12th July, 2013 khan Birthday vawi 16-na chu United Nation Organisation (UNO) chuan a lawm sak a, UN  hmaah, sawm a nih angin thu a sawi a,  "Naupangten zirna an neih theihnan ka bei zel ang', Taliban ten min kah kha chu ka nuna thil thleng pakhat ve mai a ni a, chuvangin 'Taliban in a kah Hmeichhe naupang kha' tia hriat zui ka duh lo va, 'A chanvo diktak nei tura bei ṭang ṭangtu Hmeichhe naupang' tia hriatzui ka duh a ni tiin UN hmaah a sawi.

              He a thusawinaah hian, 'tumah huat bik leh beih bik ka nei lo a, Taliban-te leh Terorist dangte laka phuba lakna atana lo ding chhuak pawh ka ni hek lo. Ka thupui chu "Naupangte, lehkha zir tura an dikna chanvo pek" chungchang hi a ni. Naupang zawng zawng, mifirfiakte tu leh fate zawng zawngte pawh huamin, Zirna sikul an kal hi ka duh ber chu a ni a, abik takin Taliban naupangte hi ka duhpui lehzual a ni'  tiin amah kap hliam tute pawh a duhsak thu a sawi.

              "Khawvel hmun tam takah, a bik takin Pakistan leh Afghanistan-ahte hian Rawlrala chetnate, Indonate, innghirnghonat  leh naupang te te Zirna sikul an tihtawp sakte avang hian naupang leh hmeichhiaten kan tuar em em a,"HETIANG INDONA HI KA KHAM TAWH TAKZET A NI" tiin hlauh nei miah lovin a sawi chhuak.

               He khawvel hi "Naupang pakhat, Zirtirtu pakhat, Pen pakhat leh Lehkhabu pakhat" hian a thlak danglam thei a, heng harsatna te hi tikiang tur chuan, Zirna hi a kawng awmchhun a ni.

                Nikum 9th October, 2012 khan Taliban hovin ka Bek vei lam (left side of forehead) ah min kâp a, ka thiante pawh an kâp bawk. Taliban ho hian "Silaimu hmang hian min ngawih tir theih an inring, mahse, an hlawhchham".

                Mi firfiak hote hian ka tum leh ka duhte hi min tihtawpsak theih an inring a ni mahna, mahse engmahin min dang dawn chuang lo."

                Tunah hian Malala kha ka la ni a, ka thil tum pawh a la ngai reng a, ka beisei pawh a la ngai reng a, ka duhthusâm pawh a la ngai reng e."

               Ka Lu a min kâp tu Taliban pa ngei pawh kha ka haw hran lo a, ka kutah silai hum ila, ka hmaah min kâptu kha rawn ding pawh nise, ka kâp ve lo ang." tiin he Pakistan naupang hian a rilru a sawi chhuak a, a ngaihsan awm tak zet.

               Ni 12th July kha a Birthday a nih angin UNO chuan a lawmsak a, khawvel ram hrang hrang atangin lawmpuitu leh lawmpuina thilpêk a dawng hnem hle.

               He Pakistan hmeichhe naupang hi zawng a danglam reuh em a ni, tunah chuan khawvelin a in duat rawn siak a ni ta ber e.

YOUNG MIZO ASSOCIATION (YMA) LO PIAN DAN

(15^th June, 2013 : YMA DAY PUAL)

       Young Mizo Association (YMA) chu “Politics rawngkai lo, tlawmngai pawl” a ni a, “TANPUI NGAITE TANPUI” tih chu a thuvawn ber a ni.

        YMA hi June 15, 1935 khan Kristian Missionaries te leh Mizo Kristian hmasa te khan an lo din a. Khang hunlai vel khan Mizoramah kristianna in nasa takin hma a sawn chak a, Zirna Sikul leh Biakin te a lo pung chho ve hret hret a. Mizo nunzia pawh a lo danglam a, Mizo hnam nun a hmun pawimawh tak luahtu Zawlbuk meuh pawh a lo chuai ta a.

       He Zawlbuk zet hi chu Sap Missionary te leh British India sorkar official te meuhte pawh khan a pawimawh na an hmu ve a, khawtlang tana a thawh hlawkzia an hria a, khatih laia Governor pawhin Zawlbuk chawhnun lehdan a ngaihtuah hial a ni, mahse, nunphung a lo danglam tawh si.

       Hengte a nih avang hian Kristian Missionary te leh Kohhran hruaitute khan Mizo hnam tana zirna Inpui, Ralven buk, kawng engkima Mizo hnam nun innghahna tih theih ZAWLBUK lo tawpta hmun ruak luah khat lehtu tur neih kha a tul takzet tih an hria a. 

Pic Courtesy : Misual.com.. and others

       Ni 3 June, 1935 khan Kristian Missonary Pi Zaii (Miss Katie Hughes) chenna Inah Zawlbuk hmun ruak hnawhkhattu tur Pawl din chungchang ngaihtuah a ni a “YOUNG MIZO KRISTIAN ASSOCIATION” tih chu pawl hming atana chhawpchhuah langsar tak a ni a. Mahse, Zorema Pa (Rev. David Edward) rawtna “YOUNG LUSHAI ASSOCIATION” tih chu a tha berah an pawm ta a, tichuan June Ni 15, 1935-ah khan hnathawk theiin YLA an lo din ta a. 

       India zalenna neih 1947 hnu khan Mizoramah thil danglam nasa tak a thleng ve zel a, Lushai tih aiin Mizo tih chu a tha tawh zawka ngaihna a awm a. Tichuan 7^th October, 1947 khan “Young Lushai Association” tih chu “Young Mizo Association” tiin thlak a lo ni ta a ni. 

       YMA chuan thiltum leh a dinchhante:

       1.         Hunawl hman that
       2.         Zofate hmasawnna ngaihtuah 
       3.        Kristian nundan tha ngaihsan

       “Tanpui ngaite tanpui” tih thuvawn a neitu YMA hian nasa takin Mizo mipuite leh Mizoram tan hna a thawk tawh a, chawimawina pawh a lo dawng nual tawh a ni. Hruaitute inthlak ve thinin, Mizia leh tumdan, duhdan inanglo tak tak te pawh hruaitu lo ni thin tawh mahse, YMA chu a la ngai renga, Mizo mipuite leh Mizoram tan tun thlengin a la ding zel a ni.

 YMA VUL ZEL RAWH SE

CYCLONE MAHASEN LEH A HMING PHUAHDAN

(Cyclone Mahasen lar lai, a lo thlen tak tak hmaa ka ziah kha a nia, site-ah hian kan dah veleh hnuhnawh ang e)

          Tun lai Cyclone “MAHASEN” leh a kaldan tur, Ringlawktute sawidân leh Cyclone hming Chungchang, titi tlem kan sep ve ang e. "Cyclone chikhat 'Mahasen'” ti ten Chanchinbu ṭhenkhatah tarlan a ni a; Cyclone hi chi hrang hrang awm ang leh, Mahasen hi a danglam bik avanga Mahasen hming hi puta anga ngaih theih lek a sawi tawk pawh an awm ve bawk. Mahse, Cyclone chi danglam bik ni lovin, a pangngai a nia, Mahasen hi chu a hming tur an lo phuah lawk sa, tuna a lo thlen hnua a put tak mai chauh a ni.

            Cyclone chu Nothern Hemisphere-ah chuan Sana virloh zawng (Anti-clockwise) in a vir a, Sourthern Hemisphere ah chuan Sana virzawng (Clockwise) in a vir a ni tih ang chi kha chu kan hriat sa a ni tho a, kan sawi zau vak lo ang.

          Tun ṭuma thlipui in mung kan tawn mek Tropical Cyclone Mahasen hian hmar lam a pan hret hret zel a, Wednesday hian Bangladesh a thleng turachhût/rin a ni a. India hmarchhak leh Bangladesh leh Myanmar ram tân hlauhawm thei a ngaih a ni.

          Mahse, a lan dânah, kum 2008 a Cyclone Thlipui "Nargis, helai hmun vel a mihring 100000 chuang thihna thlen tu ang em ema na chu a ni dawn loh hmel a.

          Tin, Kum 1991 kum a mihring 100000 chuang bawk thihna thlentu Tropical Cyclone ang em em a thawk nasa chu a ni dawn lo ni a sawi lawk a ni bawk. Cyclone-te hi, a lan dân a a kalna tur ni a rinlawk pawh hi a danglam fo thin a, a thlen tur ang hmun a rin pawh a thleng lo ve fo a, a thawh nat dan tur anga rin lawk pawh hi a danglam fo thin bawk.

          Hengte a nih avang hian, lo chiai lutuk lo ila, hlauh lutuk avanga hrehawmkhawpa lo phili buai loh a tha. Chutih rual chuan, engkimah kan fimkhur erawh a finthlak ang a, Thlipui na tak pawh lo thawk thei a nih avangin kan lo in puahchah ve tur chu a ni tho. Engpawhnise, vawiin Monday khua pawh a tha viau zel e.

          Cylone te hi kan hre chiang lo fo, Chanchinbu ṭhen khat sawi anga he CYCLONE MAHASEN hi danglam bik ni lovin, Cyclone pangngai a ni a, a thawhna hmun a zirin a hming an lo vuah danglam mai a ni.

          Khawvel a, cyclone thlen duhna hmunte hi awmze neia thensawm a ni a, North Atlantic te, Central Pacific, North Indian Oceans, South Indian ocean etc… ten an ṭhen a, chumi hlawm hrang hrang huam chhunga Thlipui (Cyclone) lo thleh turte chu a bulhnai ram hrang hrang ten a hming tur an thawh khawm a, an phuah lawk thin.

          Tun ṭum Cyclone hi North Indian Ocean huamchhunga mi a ni a, helai bial hming phuahtu – Bangladesh, India, Maldives, Myanmar, Oman, Pakistan, Sri Lanka, Thailand ten a hming an phuah a, Tun a kan sawi mek hi MAHASEN ti a koh a ni a, Mahasen tih hi Sri Lanka sorkar hming thawh a ni.. Helai a kum 2008 a lo thawk tawh Thlipui natak pawh kha "Nargis" tih a nih kha.

          Tun hma chuan Thlipui te hi, a lo thlen tawh hnuah, a hming an pe chawp a, Politicians an ngei deuhte, Mi lar, Puithiam etc an huat zawng deuhte hming an put tir thin.

          Hetianga Cyclone hming an vuah hi, Zirtute tan a awlsama, hmun pakhatah Cyclone lo thawk fo thin ta se, chhinchhiah a awlsam phah a, Lo hrilhlawktute tan a awlsam phah bawk. Helai bialah hian Cyclone a lo tleh leh hunah chuan a hming tur chu PHAILIN a ni, hei hi phuah lawk a ni tih kan sawi kha.

          Helai Bial a Cyclone lo thawk tawh hmingleh lo la thleng tur hming phuah lawk te:-

            List I      :  Onil, Agni, Hibaru, Pyarr, Baaz, Fanoos, Mala, Mukda

            List II     :  Ogni, Akash, Gonu, Yemyin, Sidr, Nargis, Rashmi, Khai−Muk

            List III    :  Nisha, Bijli, Aila, Phyan, Ward, Laila, Bandu, Phet,

            List IV   :  Giri, Jal, Keila,Thane, Murjan, Nilam, Mahasen, Phailin.

            List V    :  Helen, Lehar, Madi, Na−nauk, Hudhud, Nilofar, Priya, Komen

PIANCHAM LAWMPUINA

Ka thiante PIANCHAMPHA hmang mekte pualin -

VAWIIN ang hun - "Nausen an tah avanga a hringtu nu hlim taka a Nuih theih zawkna Ni"

....i Pianchampha ilo tleng leh thei hi ka lawmpui a che.

Kha Ni, I pian Ni a, nang i trah vawng vawng lai pawha, hlim leh lawm taka i Nu awmtirtu kha engnge ni ang ni tih ngaihtuah la. Chu chu nangmah, nausen, engmah la ti theilo kha i ni.

Kha I pian ni a i Nu hlimna leh, i laka a beiseina kha engnge ni ang tih ngaihtuah reng ang che.

He khawvela i Ni hmasa ber, i pian Ni ah khan, nui chunga lo lawm i nih angin, he i pianchampha ah pawh hian Hlim takin hun hmang la, midang tan pawh hlimna Ni ah chantir zel tum ang che.

MY PICTURE

Shot on 12.04.2013 at Thenzawl

CHAWNGCHILHI PUK KA TLAWH VE

Ni12.04.2013 zing khan Changchilhi Puk chu ka tlawh ve ngei a. Mahni a kal tum ka nia, Thiante Motor kengin an lo kal ve dawn hlauh mai a, Thiante motor-ah chuan ka tel ve a, Thenzawl khua atangin kan tlawh a, ka rin aiin a hmun hma pawh a lo nuam a.

THUAWIHNA NUN NEI TURIN ABRAHAMA I ZIR ANG U:

 "Tin, ani(Abrahama) chuan Lalpa chu a ring a; tichuan, ani chuan chu chu a felnaah a ruat ta a". Genesis 15:6

           Pathianin Abrahama chu "I khaw lam ata leh i laichinteho zing ata leh i pa in ata chhuak la, ram ka la entir tur che lamah kal rawh. Tichuan, chi ropui takah ka siam ang che.." a ti a.

          Tichuan Abrama chu Lalpan a hnena a sawi angin a kal ta a. Haran khua, a inbenbelna khua, a tlangnelna hmun, rual a pawl ve na khua, nuam leh hlim taka a laichinte nena a awmna khua a ta kha a chhuak ta a.  Kha khuaah khan khawtlangah pawh nihna ropui te pawh a chelh ve ngei ang, hna ṭul tak thawh lai mek leh hmachhawpte pawh a nei ve mai thei. Mahse, Lalpa thu hnial lovin, a mimal leh chhungte nena an nawmsakna tur thlir mai lovin Lalpa thu awihin Haran khua atang chuan a chhuak ta a nih kha.  

           Khatia a chhuahlai khan kum 75 zet a nih tawh si a, Lalpan "Chi ropui takah ka siam ang che" a tih te kha awih  a har duh dawn tehlul nen. Mahse Abrahama chuan a Pathian thu chu a awih mai a ni.

          Tin, 'Mal ka sawm ang che a, i hming ka ti ropui bawk ang...', ....  'He ram hi i thlahte hnenah ka la pe ang....'  tia Lalpan a tiam hnu lawkah, nasa takin  tam a tla a,  Aigupta rama awmrih tura kal hial a ngai ta, Aigupta Lal chuan, a nupui SARAII chu a lo la chhuhsak lehnghal!. Pathian chu rinhlelh rum rum awl tak tur a ni. 

          Tichuan hun a lo kal zela, a kianga kal ve, a nau fapa LOTA nenchuan ranrualte an ngah tak avangin awm dunna turin hmunhmain a daih ta lo a. An ran pute an in hmuthiamlo ta a. Chutah chuan Abrahama chuan, "Khawngaihtakin nang leh kei a karah, I ran pute leh ka ran pute karah pawh inhnialna awm suh se; unau kan ni si a... Khawngaih takin ka hnen ata hi intihrang mai rawh. Nang vei lama I kal chuan kei dinglamah  ka kal ang a; a nihloh leh nang dinglama i kal chuan kei vei lamah ka kal ang e," tiin Lota chu duh a thlan tir ta a.

           Tichuan Lota chuan Jordan phaizawl ram tha lai zawng zawng chu a thlang ta a. Abrahama chu Kanan ah chuan a awm ta a. Heti taka amah zui ve tu Lota laka a rilru that zia te hi a ropui ngawt mai. Pathianin maksawm a tiam a, ram pek a tiam a, chi ropui tak nih a tiam mek lai hian He Jordan phai ruam, ram tha hi chu ka ta tur a niang tih mai awl awm tak, mahse Lota a kian thei a ni. 

          Kawi hmunah pawh awm se, a innghahna chu ramtha leh ram nuam ni lovin, a Pathian a ni tih a hria a. A Pathian chu KANAAN ramah pawh malsawmna pe theitu Pathian a ni tih a hrechianga, Inhmun leh ram ropuina aiin Pathianah a in nghat zawk a ni. A va ropui em!.

          Chung zawng zawng thlen hnuah pawh chuan Chi ropui tak nitura Pathianin a hrilh Abrahama chuan Fa ala nei chuang lo. Pathian chuan "Van khi en la, Arsite khi i chhiar theih chuan chhiar teh khai, i thlahte chu khiti zat khi an la ni ang," a ti a. Tin, ANI CHUAN CHU CHU A RING A; TICHUAN, ANI CHUAN CHUCHU A FELNAAH A RUAT TA A.  

          Pathianin "I nupui Saraii chu mak ka sawm anga, ama lakah chuan fapa ka pe ang che..." atih lai khan Abrahama te nupa chu upa tawh tak an ni a. Saraii phei chu Lei Mihring danah nau nei thei tawhlo tura ngaih (Menopause pel tawh) a ni daih tawh a ni. 

          Tichuan Lalpa thu chu an awih a, Abrahama pawh kum 100 hial a nih kum chuan, Sari chuan fapa ISAAKA a hrinsak ta a ni. Fa nei thei tawhlo anga ngaih Sari pawh Pathisn chuan fa a pai tir a, a thu tiam a hlen ta a ni. Pathian thu tiam an va nghakrei thei tak em! 

          He a fapa, a duh em em, kum tamtak hnua a neih hi Pathian chuan a hnena hlan turin a ti a. Abrahama chu a fapa nen chuan an kal ta a,  a chhiahhlawhte hnenah "Hetah lo awm rawh U, kei leh naupang hi sawtah sawn kan va kal anga; tin, Pathian kan va bia ang e.." a ti a ni.

          A fapa duhlai hlan turin a kala, vuina leh lungawilohna lan tir mai lova a kal mai thei te kha a mak a. PATHIAN KAN VA BIA ANG E a la ti zawk a ni. 

          Hetianga Abrahaman a tih theihna chhan ber ni a lang chu, a Pathian a hrechianga, a fapa Isaka petu pawh Pathian a ni tih a hria a, a thu a zawm thei mai a ni. 

        Kan Pathian hi belchiangin, hrechiang ve ila, rintlak Pathian, Chhandamtu Pathian a ni tih kan hrechiang lehzual ang a, a thu kan zawm ve thei ang a. Pathian duhdan a kan nun a, a thu kan awih chuan, CHU KAN THU AWIHNA CHU, KAN FELNAAH RUATSAK KAN NI VE MAHNA.