Ka fate 3 hian BA an pass vek ang, ka TAWNGTAI dawn a lawm!

Kan rama Ringtu hmasa ten Pathian an rin dan kha, mawlmang tak angin lang mahse tihtak zetin an ring niin a lang. Pathian thu hre tam viau lo mahse, Pathian an hmu fiahin an hrechiang hle niin a hriat. Chung zingah chuan Pathian ring tlattu, Pathian thuhril a vak kual thin Upa Hranglala chanchin tlemte, Upa V Lalchhawna min hrilh hi kan sawichhawng ang e.
Kum 1960 Mau tam lai khan Upa Hranglala chuan, “Ka fate pathum hian BA an pass vek ang” tiin Upa V Lalchhawna chu a hrilh a. Pu Chhawna chuan, “E khai, ka pa, engtin nge BA an pass vek ang I tih theih a. Hlo thlo mai I ni a, Pathian thuhrilin I vak chhuak pah reng bawk si a, engtin nge I chawm tehlul ang ni?” a ti a.

Kha tih lai khan, Upa Hranglala fa lehkha zir mek pathum zinga upa ber Ramena chuan pawl 7 a zir mek chauh a la ni a. BA pass tur chuan Shillong-ah zir a ngai a, thingtlang atanga Aizawl kal ringawt pawh thil awlai lo tak a ni. Chutah Mautam lai a ni bawk nen, lehkha zir chu a duh nazawng tan pawh thil tih theih a ni lo a, BA pass ngat chu an chhuanawmin an ngaisang hle a ni.

Chutiang tak chuan la harsa mahse, Upa Hranglala chuan Pathian a ring tlat a, “Engvangin nge an pass loh ang, Rema pa pawhin a fate a chawm kan hre hlei nem! BA a pass tir vek a lawm! Ka fate 3 pawh hian BA an pass vek ang, KA TAWNGTAI DAWN A LAWM” tiin a fate pathum lehkha zir mekte chuan BA an pass vek tur thu chu huai takin a sawi lawk a ni.

Pu Hranglalan ‘Rema Pa’ a tih hi Pastor Thanzinga a ni a. Pator Thanzinga hian a fate hi BA a pass tir vek mai bakah mi chhuanawm takah a chhuah vek hlawm a. Chungte chu Rev. Dr CL Rema (L), Mizoram atanga IAS hmasa ber, IAS bansana Missionary hna thawk ta zawkte, Rev. Dr CL Hminga te,  Pi C. Biakchhingi BA B.Ed te, Pu CL Ruala, PM (Lok Sabha) politician hmingtha leh larte, Pi CL Kimi (Rtd) Principal Health Worker Training School te an ni.

Pastor Thanzinga (Rema Pa) hi tawngtai mi, Pathian a innghat hmiah mi a ni a. Kha tih hunlai khan Pastor hlawh a la tlem hle chungin, Pathian a ring a, a tawngtai thin a, Pathianah a innghat hmiah thin. Pathian pawhin a awmpui a, a fate pawh Pathian zarah mi hlawhtling takah an chhuak vek hlawm ta reng a.

Chu chu Upa Hranglala hian a hrechiang hle a. Rema pa (Pastor Thanzinga) in a fate BA a pass tir vek theihna chhan chu Pathian a rin vang leh Pathianin a fate chu a enkawlpui vang a ni tih a hre chiang a. Pastor Thanzinga (Rema pa) leh a fate kaihruaitu Pathian chu a Pathian a ni ve tih Upa Hranglala hian a hria a, Pathian chu a ring tlat a, a kutah a innghat hmiah a ni.

Pathian hnenah a tawngtai ve ang a, Pathianin a awmpui ang a. Shillong a ni emaw, khawiah pawh zir ngai se, engtin pawhin hautak mahse Pathian chuan a fate pathum chu BA a pass tir ve thei a ni tih chu Upa Hranglala chuan a hrechiang em em a, “ka fate pathum hian BA an pass vek ang, KA TAWNGTAI DAWN A LAWM” a ti hmiah mai a ni.

A sawi lawk ang ngeiin Upa Hranglala fate pathum, BA an pass tur thu a sawi lawk lai hun, kum 1960 Mau tam laia pawl sarih (7) zir mek Ramena leh a naute Sangpuia leh Nunkungi te chuan BA an pass ta vek reng a. BA an pass a ni mai lo va, Sorkar officer chhuanawm tak tak – Director hialte niin mi chhuanawm takah an chhuak ta hlawm a ni.

Pastor Thanzinga leh Upa Hranglala te chanchin hi a ngaihnawm ngawt mai. Anni pahnih hi Pathian a innghat hmiah mi, an Pathian thu lak dan pawh inang tak, Pathian tana rinawm tak leh thahnem ngai taka thawk tang tang thin an ni a. Pakhat Pastor a ni a, pakhat Thuhriltu (Upa ni bawk) a ni a. Anni pahnih hian Mizoram chhim lam khaw engemaw zat chu Pathian thu hrilin an fang chhuak a ni.

Anni pahnih chanchin atang thian, kan Pathian rintlak zia kan hre thei awm e. Pathian hian tihtakzeta Amah ringtu leh Amah a innghat tlat thinte chu a thlahthlam ngai lo tih pawh a lang chiang hle.

Upa Hranglala chanchin hi tam tak sawi tur a awm a, Pathian a rin zia leh Pathianin a hman zia kawng hrang hrangin a lang a, remchangah kan la tarlang leh dawn nia.

– Buata Bawihtlung 19.11.2016, 6:30 PM