Eiffel Tower : Mizopa sak vs Sappa sak

                                  

PATHIAN LEH NAUSEN IN BIAKNA (Mother’s Day Pual) :

Nausen chuan Pathian hnenah, “Naktukah Lei (earth) ah min thawn thla dawn an tia, engtin nge chutiang hmun cheplutuk  leh khawsak harsatna hmunah te ka dam khawchhuah theih ang?”

Pathian: “I Vantirhkoh in a lo hmuak ang che a, a lo enkawl dawn che a lawm.”

 Nausen: “Nih leh tinge, Vanramah hian kan hlimna tura zai leh nuih bak engmah tihtur ka nei ngai chuang si lova?” tiin a zawt chik leh deuh a.

Pathian: “ I Vantirhkoh chu I tan a zai anga, I tan a nui dawn a ni. I Vantirhkoh hmangaihna I dawng anga I hlim em em dawn a ni.”

Nausen: “Mihring te trawng ka thiam si lova, engtin nge min biakna te ka hriat thiam theih ang” a tiin a zawt leh a.

Pathian : “I Vantirhkoh chuan I hriat reng tawh tur, tawng mawi leh nalh em em mai chu, zaidam tak leh duat takin hrilh dawn che a, Trawng dan pawh a zirtir dawn che a ni.”

Nausen: “A nih leh Nang ka biak duh hunah che engtin nge ka tih tak ang.”

Pathian : “I Vantirhkoh chuan I kutphah pahnih insi in a dah anga, tawngtai dan a zirtir dawn che a ni.”

 
Nausen: “Tunge min veng ta ang?”

Pathian: “I Vantirhkoh in, Nunna pawh chan huamin, a veng tlat dawn che a ni.”

Nausen: “Mahse, ka hmu tawh dawn si lo che a, ka lungngai reng tawh dawn a nih chu.”

Pathian: “I Vantirhkoh chuan ka chanchin a hrilh reng thrin dawn che a, ka hnena I lo kir leh theih dan tur pawh a hrilh dawn che a ni.” a ti a.

Chutia an inbiak lai chuan Vanram ah chuan thlamuanna leh inremna ropui tak a lo awm a. Mahse Lei (Earth) atang chuan Nausen awrawl an hreta a, hmanhmawh tak chung chuan,

Nausen: “Lalpa Pathian, Tunah Leiah ka kal dawn a nih chuan tunge ka Vantirhkoh hming chu min hrilh thei em.” a ti a.

Pathian chuan, “KA “NU”  TIIN I KO MAI DAWN NIA.” a ti a.

Kan Nu te hi an va hlu tak em. Nu leh Pa te I duat thiam ang u. 

( He thu hi keima phuah ni lovin, mi ziahsa ka lehlin chawp a ni e - Buata)

INDIAN KAN NI CHIAH EM?

Khawvel hmun  hrang hrangah, mi chi hrang hrang kan awm a. Kan awmna ram leh hmun te chuan hming a nei a; chu rama awm te chuan an awmna ram leh hmun te chu a hming an vuah kan ti thei bawk.. Mitin hian 'ram leh hnam' kan nei vek awm e. American, Chinese, Japanese, English, Russian, Indian etc. a kan tam mai.

Kei pawh hi Chinlung chhuak ka ni ti mah ila, India ramah kan tlukluh atang kha chuan Indian ka ni ve ta mai chu a nia. Ka hmel leh pianhmang, ka sam, hnar, ngal, mit leh ka vun rawng te mai bakah ka mizia te phei hi chuan India rama cheng tamber "Vai" kan tih mai te hi chu a ang mawlh lo. Hemi ka sawi theihna chhan chu, Indian ka nih ringlo tu ka tawng ve nual tawh tlat a. Chutianga Indian ka nih ringlo tu te chu ka Indian pui te an ni tlat.

Mahni sum seng lemlo leh mahni sum seng te pawhin India ram hmun engemaw zat ka tlawh kual ve tawh a, Indian ka nih leh nihloh chungchanga ka thil tawn tlem te kan titi pui ve mai mai teh ang..

Kum 2002 vel khan Jaipur ah ka bazar naah Indian ka nih an ring lo tlat a, "Mizo ka ni, Mizoram atanga lo kal ka ni e" ka tih paw'n awihlo tawk an awm a, "In ram pawisa ka lo en" min ti leh a. Ka'n phawrh chuan mak an ti ve deuh a. Hemi truma ka huat em em chu, mi pangngai awm tak a ka ngaih ten Mizoram awmna an hre lo lah tlat thrin hi a ni. Keini te chuan Middle sikul kal chin chuan kan India ram state te hi chu kan hre hle thrin kha a ni sia. Ka thin a rim tlat zel.

Kum 2009 khan Valsad -Gujarat ah Local train a ka chuan naah tlangval ho chuan Indian ka nih leh nihloh min zawt a, ka nih ve ngei thu ka a ka chhan chuan pawm harsa an ti deuh tih chu an hmelah a lang. A hnu deuhah chuan "a nih leh Indian i nih chuan Sachin Tendulkar i hria em? " min ti a. Ka lo hre ve nual a - Sachin Tendulkar bakah, Ganguli, Rahul Dravid, Kumble, I Pathan, M Kaif, Harbajan ...etc te chu kan sawi ve zat zat hnu ah chuan Indian ah chuan min pawm ve thei hram nia. Buaina a chhuak lo hlauh. Mahse Mizoram awmna chu in hrilh fiah ngial a ngai a, Mizoram awmna hre lo khawpa mawl, inti vei fu si an lo awm fo mai hian ka thin a ti rim tlat zel.

Kumin 2012 kumtir khan Tamilnadu ah Restaurant a kan chawlhna pa chu a in la ve khawp mai, a hawi her pawh a changkang ve viau.. mahse khawilam mi nge kan nih a hre mai lo a "Mizoram atanga lo kal ka nia" ka tia, ka thianpa Tonia Langkam chuan "Kei chu Arunachal Pradesh lam mi ka ni e" a ti a. Mizoram leh AP awmna a hriat loh thu leh Mizoram pawh chu a awm tih a chian vak loh thu an sawi chiah mai chu ka ngaihdan a ni ta lo a "Kan ramah ve chuan Sikul naupang te chuan India ram state hrang hrang te hi kan hre chiang ve viau a sin.... .., hetia Mainland lama khawsa ten min hre ve lo lutuk hi a lawm Indian nih a nawmloh na chu..." ka tia, ka ankhum ta chiam a. A lo zaidam ve hlauh a, engtinmah chuan min ti let lem lo a.

Lehkha pawh zir lem lo, kutdawh leh mi hnuaihnung tak tak ten Mizoram an hre lo hi chu ka hre thiam a, mahse mi pangngai ve tak tak ten Mizoram an hre lo fo mai te( Mizoram hria pawh an awm treuh tho naa), India ram mi anga min ngai lem lo, Foreigner anga min ngai tlat mai te an awm fo mai hi a chang chuan a ninawm khawp mai. Han inti Indian viau dawn thrin mah ila, a harsa lek lek thrin. NE mi hrim hrim ngaisang vak lo tawk te, Nepali emaw min ti tawk te lah bo lo. Heng bakah hian hmun dang dangah pawh danglam taka dawnsan hlawh chang kei ngei pawh hian ka tawng fo mai.

Hetianga kan Indian pui te ngeiin mi hrang hmuha min hmuh tlat avang te, foreigner anga min ngaih tlat fo avang te, hnam hnuaihnung tak anga min hmu a, min en hniam fo mai thrin hi chu pawm a har thrin. Kan rilru a lo lian ve si a. Tribal - hnam hnuai hnung ni mah ila, kan rilru leh hawiher ah hian kan indahsang ve bawk si. India ramah hian kan duh chiah vanga lut kan ni lova hriatna kan thinlungah hian a lo awm ve reng bawk si nen.

Political lam hawi ni lem lo, hmasawnna in min chawikan ve vak lemloh avang pawh ni lo.. kan hmel leh mizia danglam tak avang te, kan Indian pui te min thlir dan leh hmuh dan avang te, a chang phei chuan HMUSIT ang lek leka min hmuh avang te leh chhan dang tam tak avang te hian "INDIAN KA NI CHIAH EM AW?.. INDIAN KAN NI TAK TAK THEI DAWN LO A NIH HI" tih chang ka nei fo.. Tun thleng hian..!

"TUI-THAK" HUNLAI KHA:

Kan naupan ve deuh lai kha aw! ka ngaihtuah let neuh neuh hian ka ngai ve thrin khawp mai. Kan hmalam hun ngaihtuahin kan buai lova, Buhfai eitur kan nei nge nei lo tih pawh kan hre hek lo. Engang mi nge ka nih dawn tih pawh kan ngaihtuah ngai lem lo a nih kha! Masi dawna Kawrmawi "Kawrthar" kan neih kha chuan kan lawm ve em em thrin kha a nia.. in ni ve em aw?

Engmah hmasawnna lam ngaihtuah rual kan la ni lem lo bawka, rethei bakberh te mah ni ila, kan hawiher kha a a zang ve phian zel a. Kan Nu leh Pa te kha chuan engkim ti thei leh huai ber ah kan ngai deuh tawp mai a nih kha. Nuam thei khawp mai.

Primary sikul kan kal ve a, Uniform leh zirlaibu te kha kan U te hman hlui a ni deuh vek zel a, a rawng te kha a da thei thrin khawp mai. A rawng pawl tur te kha a in ang lo nuaih zel a nih kha. Chawlhkar tawp lam, zirtawpni hi "Games Ni" kan ti thrin a. Sikul naupang te kha Football leh Intlansiak, eng eng emaw kha kan ti ve thrin a.. Kan va hlim thei tak em aw! Mipa zinga a te deuh nih kha chu a nuam vak lo.. Football pet naah te khan Hmeichhe lian ho nen min khelh tir thrin.. Mipa rilru atang chuan, a nuam vak lo.. kan hneh ngai chiah chuang lo na a.

Khang hunlai a thil lar ve tak chu TUITHAK kha a ni. Hmeichhe ho in Bottle te deuh ah an rawn pai thrin a. A bawlhlo lah kha a tam lem lo - Tui, Chi, Hmarcha te kha a ni deuh mai a. A changkang deuh te khan Aieng kha an telh thrin a.. Siam harsa tak ni lo mahse, a hlu thei thrin khawp mai. Kan rualpui hmeichhia te ta kha insak kan han tuma, an phal lo chung te kha kan dil ve ngat ngat zel.

Khang hunlaia TUITHAK hlut dan kha aw.. Luck leh luck loh te pawh a hril pha hial in ka hre leh hnuhnawh thrin. Mipa  leh hmeichhia nanana chu kan in endan a lo danglam deuh a.. Hmeichhe thenkhat te kha chuan pek phal bik te pawh an nei thrin a. Kha tiang dawng pha bik nih kha chu a nuam ve veng veng thrin. A dahna bur Bottle neih te phawh kha tunlai ang chuan a la awlai lem lo. Bottle mai mai pawh kha vang tak a ni. Keini khua ve kha chu VAI (CRPF a hnu ah Assam Rifle) Camp kha a awm a, an paih leh an hnen atanga an neih te pawh kha a ni hlawm ang.

VAI sawi takah chuan, khang hun lai khan VAI ho chaw ei tur kha Helicopter hmang khan an rawn thlak thrin a. Naupang ho kha kan lo phusa ve vak zel a, Tel leh Ghiu an rawn thlak trum phei chuan, kan mawm haw ve hluam zel. Sikul class chhunga awm lai a Helicopter a rawn thlawh tawh chuan Teacher hnena phalna lak a ngai lo, Helicopter ri kha chhuah phalna dar a ni tawp.. Kan tlan chhuak a, kan bye bye liam vawn vawn thrin a. Vai Lal te an lo trum dawn phei chuan, a trumna turah kan lo hmuak ve tawp zel.. nuam ve tak a ni.

Khang VAI ho Damdawi bur leh eng eng emaw bur ruak "Bottle" ngei mai kha kan silfai thrin TUITHAK siam/pai nan chuan hmeichhe ho khan an hmang thrin a nih kha. Khang hun laia TUITHAK hlut dan kha, tunlai huna PEPSI, Coca cola, Lasi tih vel hlutdan nen a khai khin pawhin,, a hunlai nanana kha chuan, a nep bik chuang hauh lovang..

Tuithak kha chu lo tui ve reuh em bawk a ni.

KHANDAIH HARHNA & SANGHA TLANG VUAK

(Ni 6.4.2012 a Facebook group pakhata ka post a nia,, ti danglam vak lovin kan post ve ang e., Vawiin  tih pawh hi a dik tawh lo.- Buata bawihtlung)


        Vawiin ni 6.4.2012 (Zirtawpni) hi Khandaih khaw pa hoin zan 3 riaka Tuivai a “Sangha tlangvuak” nei tura an kal chhuah ni champha vawi 106 –na a ni. Sangha Tlangvuak naa harhna lo thleng “KHANDAIH HARHNA” an tih mai thin kha he Sangha Tlangvuak trum a lo thleng hi a nih avangin “ Khandaih Harhna” champha vawi 106 –na (Kum 106 na) a ni thei bawk.

        Thlarau thianghlim Harna lo intan ni tak hi chu Sangha vua a an ram riah ni 3-na Ni.8.4.1906 (Pathianni) a thleng a ni a. A champha, Ni dik tak chu April Ni 8 (Sunday) hi a ni. Mahse, vawiin hi an bul tan ni a nih avangin vawiin hian ka rawn tarlang ta mai a ni e.

        Dt. 6.4.1906 (Friday) khan khandaih pa ho chu Tuivaiah Sangha Tlangvuak turin an kal chhuak a, a ni thum ni - dt. 8.4.1906 (Pathianni) chuan mak tak main an chungah chuan thil a lo thleng ta a. Sangha dap a an buai mup mup mek lai chuan Hnuneka chu Phuaibuang ram lam Lui kamah thru chung hian a lo zai a “ Tunge lo leng Leiah hian, Lal Isua chhandamtu..”  tih hla a lo sa a. A chang leh a phun mawlh mawlh a.. “Kei chu Isua lamah ka trang, Nang ni chu Setana’n a vel che u.., kha kha a kal hual che u” a ti a. Sangha man a an buai lai leh an in duhthawh lai a ni a, an ngaihdan pawh a ni vak lo awm e. Valupa te chuan ‘In lamah hawnpui a, KHALPUI a thawi a ngai a nih hi’ an ti a. Hawpui tur chuan an in ti a, mahse an va en leh chuan Tuivai kam, a awm lohna lam pangah khan a lo awm leh daih tawh mai a. Tuihleuh a thiam si lova, engtin nge chu Li / Lui lian tak chu a kal kai hria reng reng an awm lo.

     Phunglama, Papuia leh Chawngkhunga ten In lamah an hawpui ta a, hla lo te an thlen chuan “chawl ila  ‘Lo trang ru, ka lo kal dawn e Lalin a tih chu’ tih hla kha i sa ang u” a ti a. An zai a, an trawngtrai bawk a. An trawngtai lai chuan Lung thril a vawm er er ang ri hi an hria a, a hnu ah chuan Vapual thlawk ri ang chuan a rawn ri leh huau bawk a. Hnuneka chuan “ka harh ta e, I kir ang u” a ti a, Sangha vuakna ah chuan an kir pui leh ta a.

      He thil thlenni hi 8.4.1906 Pathianni a nih avang chuan Hnuneka te chuan an Serh ta a, Pathian hla sa in an lam a, Sangha pawh an dap ve ta lo a. Pathian thu awih ve lo te mit a kham ta a. “Pathianni in Sangha ka dap thei lo te an ti vel a, Pathian thu awih ho khan a hranin an chan tur an dap anga, ‘Sawng’ a hranin siam rawh se”, an ti ta a.

       A tuk Ni 9.4.1906 (Monday) a lo thlen chuan Pathian thu awihlo ho Sangha dap na hnu ah chuan Pathian thu awih ho chuan an dap ve leh a, Sangha chu an man ta treuh mai a. An sangha man pawh chu an vai chuan an insem tlang leh ta zawk a. Hemi ni 9.4.1906 (Thawhtan) ni ah chiah hian Aizawl lamah harhna hnathawh a lo lang ve chiah a. Harhna chhim tur a Moiranga Khasi Assembly a kal te, Chhimlam a haw tur Aizawl ah an thlah a. Harhna chhim a Moiranga an kal haw atanga Thlarau Thianghlim hnathawh lang chhuak miah lo kha, Moirang a kal te hian nuam lo an ti lek lek a ni awm e. Mahse, hetia chhimlam haw tur an thlah hi an zai tawp mai thei ta lo va. Thlarau Thianghlim hnathawh a lo lang a. Zing atanga an zai kha Tlai lam 1:30 pm ah an bang chauh (Dr. Lalzama). OR  Tlai lam 4:00pm ah an bang thei chiah (Rev. SR Lalkailuaia).

       Aizawl ah hian Thlarau Thianghlim hnathawh- Hlim taka zaiho, Hlim lam, Khurh, mahni Sualna puan te chu Ni 9.4.1906 (Monday) ah chiah a lo lang a. Chu chu Moirang Khawmpui kal lo haw te, Chaltlanga an tawngtai ho atanga ni 4 hnu ah (a ni 5-na) chiah a ni. He mi ni ni hi Tuivai lui a KHANDAIH pa ho Sangha Tlangvuak ram riak ni 4- na chiah a ni a. Ringtu ho in Sangha an dap ve ni chiah a ni. Hemi hma hma chiah Ni 8.4.1906 (Sunday) kha Tuivai Lui  kama HNUNEKA (Pawihte) leh a thiante zinga THLARAU THIANGHLIM hnathawh lo lanchhuah tran na ni kha a ni ve bawk.

      Mahse, Ni 4.4.1906 Nilaini- Moirang atanga an lo haw a, Chaltlanga an tawngtai a, chuta Thlarau thianghlim Mei eng anga lo lang an hmuh ni, Thlarau Thianghlim in a awmpui nia an hriat ni tak kha, MIZORAM HARHNA NI ah chuan an chhal ta a ni..

       Kan peng thui ta deuh, Khandaih Pa ho Sangha vua ah kir leh ang..  Tuivai atang chuan Sangha tam tak nen an haw a. An haw kawngah chuan an chawl a, Pathian hla an sa a, an zai tawp tawp mai thei lo a ni awm e. Neihruma chuan hla chang a sawi a, Vawi 30 lai te a sawi nawn hial a, an zavai chuan an lam mup mup mai a ni. Khua an thlen hnu leh a tuk ah pawh Mual zawl ah an zai a, an lam mup mup a. Kristian te chu an lo pung chak ta hlea, Khandaih (Phullen) khaw pum chuan a chiah hneh hle a.

       Chutia Ringtu thenkhat te, hnathawk lo a an Zai mup mup mai leh Sunday a hnathawh an duh loh takah chuan Lal leh khawnbawl upa te ngaihdan a ni lo hle a. Khandaih Tihduhdahna tih pawh kha a lo chhuak hial a. Mizo Kristian Martar hmasa ber Tv CHALBUANGA pawh hemi kalzel ah hian Kum 1906 khan a MARTAR ta hial a ni. Mahse, dodalna nasa tak kar ah leh, Ringlo mi tam tak karah pawh HNUNEKA leh a thian Ringtu thenkhat te chu ISUA LAMAH AN TRANG tlat ngam a ni.

       Tichuan, HARHNA THLEN NI chu 4.4.1906 (Nilaini) ni mahse, mak tak maia  HARHNA HNATHAWH lo lanchhuah ni chu, Aizawl ah Ni 9.4.1906 (Thawhtan) ah a ni a,  KHANDAIH ah Ni 8.4.1906 (Pathianni) khan a ni ve thung. Khandaih ah hian a langchhuak hmasa zawk angin a sawi theih.

(Source - Phullen Presbyterian Kohhran Centenary Souvenir, "Mizo Kristian Martar Hmasaber" - upa Lalrinzauva, "Isua Lama Tang Hnuneka Pawite" - Upa Khuangchhana, "Phullen Kohhran Chanchin" - PB Lalruatkima, "Chanchintha Meichhitu Phullen" - Dr. Lalzama,  http://www.laldoma.blogspot.in leh hmun dang dang a mi)

PHUNGSAHMIM ( Phullus indusiatus )

PHUNGSAHMIM (Phallus indusiatus Syn. Dictyophora indusiata) A hming atang ringawt pawh hian a mak ve hrim hrim a.. "PHUNG" han tih hian a rilru a deh dan a danglam nghal riau a.. Thlahrang lam hawi lek lek te pawhin rilru a dek nia mawle..(English ho chuan bamboo fungus, bamboo pith, long net stinkhorn, crinoline stinkhorn or veiled lady, ti ten an ko a ni awm e.)

Chu zawng ai chuan kan naupan lai hun min ti ngai zawk tlat mai.. Fur lai, khawimaw lai hmun hnawng ah an lo awm kak a, a rim a chhiat avanga khawih hreh chung chung si in, hnaih tak takah kan bih thin kha a ni a..

Hmanni chu Keitum, Serchhip bulah Thian te chhiat tawh avangin ka han kal zuai a.. Keitum leh Bungtlang inkarah chuan Phungsahmin kan hmu ta, ka ding sawk sawk a, thla kan la zuai a, ruah si seng seng avang chuan kan kal leh ta mai a.. A mawi ka tih em avang leh naupan lai min tih ngaih em avangin kan post ve leh thawr mai a ni e..

PEACE CONCERT 2011@ SIKULPUIKAWN

June ni 30 hi Mizo te tan chuan ni hriat reng tur a ni a. Mizoram hian a theihnghilh tawh mai mai lo ang. A chhan chu Rambuai hrehawm tak laka Mizoram mipuite kan ZALEN ni, India nena kan inremna ni a ni miau a.. remna leh muanna hi a hlu a, duh duh a neih mai mai theih pawh a ni lemlo.. chuvang chuan He REMNA NI hian ropui taka lawm a phu thlawt a ni.

Buai han tih ah pawh Rambuai hi chu a hrehawmin a runthlak a, nunphung pangngaiin a nun theihloh a, ropui leh hausak tehnan pawisa a tawk lo a, hausa deuh te pawh an pawisa in a thlamuan zo lo, nula ten an mawina leh hmelthatna te chu an chhuang ngam lo a, thenkhat phei chuan an buai phahin an nanganpui hial zawk thin. Lehkhathiam pawhin awmzia a nei thui tak tak thin lo. Ram a buai tawh chuan engkim a buai nghal thin. Khawvel hmun hrang hrang buana a chhuak fo. Mizoramin rambuai a tuar ve khan, nunau, pitar putar ten an tuara, nunphung pangngaiin a nun theihloh. Mizoram buai vanglai a harsatna thleng thin te kha a neplo hle a. Mawlna leh media la chak tawklohna khan a harsatna a tizual hle. Chu rambuai hrehawm ata zalenna han hmuh chu a lawmawm a, buai hrehawm zia hretawh tu tan phei chuan a hlu lehzual a.. ropui taka lawm pawh a phu bawk.

Chutiang ni ropui chu June ni 30 hi a ni a. Mizo hnam sipai (MNF) te leh India sorkarin remna thu an thlun na ni a ni. Kumin 2011 June 30 hian ropui bikna lai a nei a, a chhan chu Mission veng North YMA ten remhre taka Remna ni pual leh a lawmnana 'Largest Guitar assemble - Mizoram Record 2011 & Peace Concert' Sikulpuikawn a an huaihawt hi a ni..

Thenkhat chuan he ni hi lungngaihna ni ah an
hmanga, rambuai avanga an harsatna tawh te, an ulehnau an chan takte hriatchhuahlehnan te an hmang thin. Chutiang anih laia ropui leh thianghlim tak, hlimawm tak si a he ni lawmna huaihawt tute an fakawm e...

PETROL ETC

Khawnge… thu kal lam leh hawlam pawh hrechiang manglo hian, mahni vei  zawng zawng I han thai kawi veleh tawp mai teh ang..

Tun hnai mai hian Mizoram ah Petrol man a sang chak hle mai. Petrol a pawimawh si, bungraw phur leh zin veivak motor, khualzin phur te chu sawiloh, mipui mimir mahni mimal mamawh atana motor nei te pawh hi Petrol  tel lovin kan khawsa hlei thei lo chu a ni ber tawh mai si a. A man lam chu engzat pawh nise kan mamawhna a sang miau si a, kan hmang zel tho lo thei si lo.

Hetia petrol man te a san takah chuan kan Petrol te hi lo thianghlim ve deuh thei se a duhawm hle mai. Chanchinbu ah Petrol pawlhdal leh pawlhdal tum man tih te, Petrol thianghlim tawklo chungchang te hmuh tur a awm zauh zauh mai. May 19, 2011 Aizawl chanchinbu chhuak thenkhat – The Zozam Times chuan Mizorama Petrol Pump zawng zawng khar vek thu an chhuah kuau hlawm mai.  Hetia Petrol pump khar chhan ber ni a an sawi chu Indian Oil Corporation (IOC) in heng Pump – Lalnghakliana Filling Station, Mizofed, Lalsangliana, Lalboi leh Hrangbana Petrol Pump te a khartir avangin All Mizoram Petrol Pump Dealer Association (AMPDA) ten inlungrualin an khar vek vang a ni.

Han ngaihtuah neuh neuh chuan kan Petrol pump a Petrol te hi engatinge a thinghlim loh bik fo thin le. Hlep neiin an lei a, an hralh leh tho awm si a.. Dealer te hian hlep hnem an tum luatah engemaw an pawlh ta mai thin nge, a phurtu ten an pawlh zawk tih pawh hriat a har hle.

Kan rama Petrol te a tha tawk em tih chu he lam enkawl tu leh enfiahtu  Legal Metrology Dept. an awm a. Heng mithiam ten an enfiahna hmanga Petrol pump hrang hrang dinhmun an rawn tarlan thin te hi a dik ngei turah ngaih a ni a. Legal Metrology lam ten petrol pump tha an tih chu kei ngei pawhin ka pan hram hram thin.

Tlem lai deuh a Mizoram Legal Metrology lam ten petrol pump tha, petrol neitha a an sawi, kei ngei pawhin a ka pan ziah te chu tunhnai a IOC in Petrol pump a kharsak lailawk zingah hian a tel tlat mai.. Neih ang chhun chhun a harsa taka Lirthei lei a, duat taka enkawl tu te tan chuan lung a awizan lo duh khawp mai. Legal Metrology lam ten Petrol neitha a an sawi kha IOC lam chuan a kharsak bawk si. Hriat thiam a har duh hle mai.

Hemi chungchangah hian tunge thiam a, tunge thiamlo tih chu keini lo sawi ve theih a ni lo. Mahse Petrol tha leh thianghlim hi chu nei ve thei tawh ila a duhawm khawp mai. Vairam atanga Petrol tha tak la si, Mizoram a lo thlen a chu petrol tha ngei a chu a lo danglamleh thin si hi chu a chhan hriat a chak awm hle.

Chapchar Kut @ Hotel Holiday Resorts

Hmanni 2011 February thla tawp lam atanga March thla tir lam thleng khan, ka nithin hnathawh na lama pu ten Exposure visit a India ram hmun thenkhat a kaltur hruatiturin chawpchilh angreng takin min hrilh phut mai a.. Peihvaklo chungleh chak deuh reuh chung siin, mahni pawh la kal biklohna hmun lamah chuan Mizo pa (thingtlang pa???) mi 11 te nen chuan kan in hruai liam veleh ringawt mai a.. Hetianga han in hruai hi a nawm viau rualin, participant a ten nuam an ti lo ang tih leh, 'min hruaitu hian kan chan ai Pawisa hi a eiru ang a??' ti a an sawisel nih hlau tak chung chuan hlim takin kan kal thei a. Thenkhat in Vairengte thlang lam hi mi tak tak hriat theihna leh tehna tha tak a ni an tih te pawh keini lakah chuan a dik tluantling chiah lo deuh., mahse tehna tha ve tak chu a ni tho mai..

Kan kalna ah chuan eng eng emaw kan ti a,  March 4, tak mai hian kan kalna vel reports leh sawihona hun Hotel Holiday Resorts- ah neihtur a ni a.. chu chu Orissa (Odisha) lama Official (Bankers) lian tak tak te leh mi pawimawh thenkhat te chuan min rawn hman pui dawn a.. Hemi ni tak hi Chapchar Kut a ni tih chu Roman Cotholic Father pakhat hian a lo hria a, ti chuan Chapchar kut puala Engemaw kan tih theih leh theihloh min zawt a, tichuan Chapchar kut chu hmang tur chuan kan in puahchah ta a.

Hun kan nei tlem si, minutes 10 chhungin kan Hlasak tur leh Lam kan entir tur chu peihfel a ngai a, Hotel hmun awl zau laiah chuan Silpouline kan phah tir a, tichuan German run zai ( a dik em aw??) leh Chai lam chu entir kan tum ta a. Hotel tual zawl nuam takah te chuan kan practice ve nual a.

                                                    Chapchar Kut a entir tur Lam kan zir lai

A hun a lo thleng ta, Vaipa min lo dawngsawng tu pa chuan 'Enge Chapchar Kut chu a awmzia' 'Enge a tobul?' te a rawn ti ta mai.!! Kan zinga rual u deuh kum 50 pel tawh te, leh he hun rawn hmang ve tur Apex Bank lama kan Board of Directors te lah chuan 'ka hre bik lo' an ti bawk si.. chutia mahni hnam KUT chanchin chhan theihloh chu a zialo mange ka ti a., ka hriat dan chu a dik nge diklo tih pawh chiang chuang lo chuan kan dinchhuahpui ve tawp a.

Vaiho leh kal ho chuan Chapchar Kut chanchin leh tobul ka sawi vel chu an ngaithla thap a, " Hmanlai kan mizo pi leh pu te khan Loneih kha an in nghahna ber a ni a, an lifestyle pawh tlangram Loneih nen a inzawm tlat a, March thla lai vel hian Lovah an zofel tawh thin a, awllen lai a lo nih bakah, pasaltha te tan ramchhuahna hun tha taka lo ni bawk si a...tum khat chu Pasaltha te chu an ramchhuak a, mahse hlawhchhamin an lo haw a, an zak em em mai a, an lalpa leh khaw mipuite hmuh chu an hreh em em mai a.. tum dang chu nise Salu nen, khaw-dai ah Hlado chhamin an au ang a, lal leh khaw mipui te chuan lo hmuakin an sa kah Lu chu an 'ai' leh ngei dawn a,,chu hun chu pasaltha te tan a hlu si a, nula leh khawmipui leh lalpa lakah pawh an tlaktlum phah na remchang a ni fo thin a.

"Mahse engmah hawnlo a an lo haw chu hrehawm an ti em em mai a, Chutihlai chuan an khaw lalpa chu a lo fing hlauh  mai a, a pasaltha te chu tum dangah an hlawhchham ziah chuang lo a, Sa leh Ral hlauhawm laka a khua te chhanhim thintu an ni tih a hai lo,, tichuan lalpa chuan a khaw mipuite chu a ko khawm a, a Zu tui ber ber te chu a phawrh a, mualzawlah chuan an zai a, an lam ta a.. Chutia zu te an ina hlimtaka an khaw lalpan a lo dawnsawn takah chuan an hlim ta em em mai a, mipuite pawh an lo pung zel a.. hlim takin chu hun chu an hmang ta a. A kum dang leh an pawh chumi hun velah chuan an Zai a, an Lam leh ta a. A hunlai hi Chapchar awllen lai a nih avangin 'Chapchar Kut' an ti ta a, kumtin an hmang ta ziah thin a ni awm e" tiin kan sawi ve ringawt mai chu(h). A dik nge diklo pawh ka hre chiang ngam silo..

A chanchin hriat chianloh bakah mahni tawnglo lehnghala a dik nge diklo chianglo chunga mi zahawmpui pui te hma a thu han sawi ve ngawt chu a nuam zan lo,, Vaiho chuan ngaihnawm an ti ve emawni an Ka-ho mai a, a then chuan an Note bu ah te an la chhinchhiah zui lehnghal a, a dikloh vaih chuan a van pawi dawn tehreng em aw...ti chungchuan sawitha ve tak ni awm tak chuan ka sawi zawh chuan puithu hmel tak chuan kan thu ve leh a. Tichuan Chai leh hlasak a lo hun a

               ... manding sap e lungmawl e, lungmawl e...
                   German ral lian tawnin tir suh... 
                  ..a surin ngen mu a sur sung sung.. heih heih chheih.....

                An awi liam dawn ngei e khuangpui nen.... khuangpui nen..
                .. hei heih heihh....



kan han ti meuh chu a Zo a vai (Mizo leh Vai te) in kan lam ta a, mahni khaw lama Kohhran upa (Lengpui Upa Puia) te pawh an phar hniam da da khawp mai..

Mizoram lamah AR Ground-ah grass (turf) phah thar chungah Chapchar kut chu Minister te hoin an hmanga, awmve ila chu a thlirtu mai kan ni awm si a, Orissa lamah ve thung chuan Kut pa ber ni awm fahranin thu te kan sawi ve chu a ni si a. A nawmdan a danglam a, kan inchhir lemlo hlawm khawp mai..

A buaithlak leh ngaihtuahna ti thui ber erawh chu... Chapchar Kut tobul leh a chanchin kan sawi ve chu an (official te) Thlalatu rawn hruai chuan Video in a record vek mai a, thenkhat chuan an Note bu te ah chuan an lo chhinchhiah ve bawk si.. A diklo vaih chuan ka van mualpho nasa dawn em?? khatianga mi pawimawh hmaa dawt han sawi chu, tiin zak theilo min ti viau ang le.. Mahse, ka sawi sual lutuklo te chuan ka hre bawk si.. Nuam tak leh hlimtak a Chapchar Kut chu kan hmang ve tilo chuan a hnu lamah chuan Rilru a nuam vaklo duh kher mai... ka sawi dik em ang chu maw.!!!?  tun thleng hian ka la finfiah ta chuang hlei lova...



              

Laltheri ngaihzawng Chalthanga Puk

Kum 2010 December thla chu thiante ho kan inrawt phur a, Laltheri ngaihzawng Chalthanga an zalhna puk kan tlawh a. He Puk hi Mawmrang kham hnuai, kham chhengchhia intanna tur takah a awm a. A bul vel ramngaw pawh Thiangzai zuar thenkhat ten Thinglian tha te kit tlu nual tawh mahse, kal anuam a, thing lian tak tak hnuai vela han kal chu a nuam khawp mai..

                                    Chalthanga Puk awmna Kham pang - Mawmrang tlang

Chalthanga zalhna puk hi Aizawl atanga kal chuan Saitual kal tlang hnuah Phullen ah kalin, he khua atang hian km 5 vel a hla a ni. Puk awmna tak hi Luangpawn leh Phullen inkar, Luangpawn ram lam a awm a ni. Phullen atang hian Motor leh 2wheeler in a kal theih a. Mahse Kawngpui atang hian 1.5 km vel ke a Kham lawn a ngai a ni.

Chalthanga leh Laltheri te chanchin hi ka hre thui vak lo a, mahse he puk hi tlawh ve kan chak em avangin  dt 30th December, 2010 khan kan han tlawh ve tawp a ni. An sawi dan leh ka hriat ve dan chuan Sailo Lal fanu Laltheri chuan an khaw tlangval, mi naran Chalthanga chu a ngaina a, a duh ta riau maia, chutia Lalfanu meuhin a duhve ta chu, ani tlangval naran ve mai tan a thil hlauhawm tak pawh nise, a hnar phal ta biklo a, an in ngaizawng ta a ni awm e....

Chalthanga Ruang an zalhna lai tak

Mi naran tan Sailo lal fanu ngaihzawn chu thianglo a ni a. Laltheri Nu leh Pa Sailo lal chhungkua ten an hriat chuan an ngaihdan a ni ta lo a,, Chalthanga chu  tihhlum (thah) an tum ta a. Chumi an hriat chuan Chalthanga chu a tlanchhe kual ta a, he PUK Mawmrang kham hnuai ngaw dur pui mai hnuaia awm ah chuan a biru ta a.. a bul vel khua a miten an khawngaiha, chaw leh eitur te an pe ru thin a.. Sailo lal leh a lamtang ten a bihrukna PUK chu an lo hre ta a, an that ta a. Tichuan a ruang pawh chu he Puk ah hian an zalh ta a ni, an ti.

                                                        Kan Camera Battery a zo thut a..

                            A hmun kan thlen hlima kan lakchhin vel chu kan neihchhun a ni mai..

He puk awmna hmun kan han thleng a, a fianrial dan leh khawharthlak dan tur te rilru ah a lo lang a, Ramngaw chhah tak hnuaiah Ramsa kawlh te, Thli leh ruahte pawh chu he puk ah hian Chalthanga chuana lo tuar thin a ni si a.. Hmangaihna vang chuan a van tuar nasa tak em!!! Chutih rualin a Laltheri khawhar leh lungleng lutuk chuan Lalfanu a nih pawh hrechanglo lekin a nung ve mai mai a... chu chuan a nu leh pa te rilru pawh a hneh let ni awm tak a ni.

Tunlali hun han ni se zawng aw!!!! Lalfanu in a ngaihzawn tlat mai leh a hmangaih tlat tlangval nih chu sawiloh, lalfanu kawm phak tlangval nih ringawt pawh inchhuan na tham a ni ve ngei ang.. Heng te a nih avang hian Chalthanga pawh hi Sailo lal fapa ni lo mahse, tlangval satliah ve mai zawng a ni bik hauh lovang le.. Mahse chutiang zawng zawng chu hmangaihna vangin a chan a, chumai piahlamah a nunna hial a chan ta si..

An hunlai dinhmun en hian Laltheri pa te pawh khan an ngaihtuah chianglo a ni maithei, Chalthanga leh Laltheri te pawh khan an dinhmun tur hre lawk sa rengin an induhna chu an lan tir ve tlat a, lal tirhkahten Chalthanga an that hial pawh kha an demawm viau a ni maithei, mahse lal kha engkim a engkim a ni tlat a.. Engpawhnise, heng thil thleng zawng zawng hi HMANGAIHNA vang vek a ni a.. Tun hma leh tun hnu ah te, nakin hun lola awmtur ah te pawh Hmangaihna hi chu a danglam lo va, a nep thei lova, kan hunlai theuh milin kan tawng a, kan chen a, kan tuar a, a thenin kan hlimpui a, a thenin kan tahpui vawng vawng mai... Hmangaihna hi zawng retheih emaw hausak emaw, changkan emaw avang hian a lo danglam tak tak lo a nih dawn hi....