Kan Zotlangram nuamah hian khel loin thlasik a lo thleng thin ang hian, Thal, Favang leh Fur pawhin a hun a rawn hlah ngai bik lo., Chutih lai chuan Mizo mipui tamzawk chu Tlangram loneih a eizawngin kawlanichhuak chhiarin an fehchhuak thin a ni.
Ramtuk thla a lo ni a mipa puitling tawh phawt chu ram lamah ramtuk (lovat) turin nitin an chhuak a, a then chuan riakin an vat thin bawk.. Tomir thla a lo thleng a Buh an han tuh a, Vawkhniakzawnthla, Thitin thla a lo thlen chuan Nula leh tlangval te chu inlawmin an loah an infehtawn sak thin.. Duhber leh hmangaih ber te, inhrepawh tak leh a then te chu la inhre pawh chuang lo a, a ruka lo in star * te an ni ve ngei ang a, Tlangram lo hring dup mai, Buh kung in chhawk no nghial nghial karah an han bung ho dial dial a, hlo rit (chek) paha an Tuthlawh te a han inkhak nak nak vel tur chuhh... a nuam thin awm bik teh e. Hmalaichawlh a lo ni a Lawm ruaitu nula hmeltha, a ruka a lo star * thin tak maiin Fanghma tuai tui tak an vel sak a, an han ei dun thin tur te chu, an hunlai chuan a aia nuam a awm dawn emaw ni le... Kum tawp a lo ni a, thenkhatin kham an thar a, thenkhat kham ai tam thar an awm a, thenkhat kham thar lo deuh te an ni nuk mai... Engpawhnise, Tlangram loneih a eizawng te hi harsa leh rethei lutuk an awm meuh lo niin a lang a, thenkhat te chuan Khawtlang hial hraiin thei khawp a inchhekmukin "Thangchhuah pa" hial an lo ni thei a ni...
Mahse tun dinhmun a Mizoram Loneitute dinhmun erawh a dang lam ta hle mai...
Tun thleng hian kan Zotlangramnuam a mipui tamzawk hi kuthnathawka eizawng kan ni a. A dawtah chuan Sorkar hnathawk an nih a rinawm.. Heti khawpa khawvel a than chak a, ram in hma a sawn chung hian Loneihna kawnga kan din hmun te, thlaithar chhuah kawnga kan dinhmun te hi chu duh thu a la samlo mai a ni lo, a lungchhiatthlak a la ni rih.. Kan ram kuthhnathawktute, nitina Lo / Huan a an kal thin ang hin Israel, Europe, Australia ramah te hian hna han thawk se, tun dinhmun ang lek hi chu an nih a rin awm loh.. Eng emaw chu a chhan a awm ngei ang.
Engvangin nge Kuthnathawktu an tam ber le?
Engvangin nge kan la intodelh chuangloh le?
Engvangin nge ram pawn atanga thlaithar lakluh a ngaih fo le?
Kan thlaithar te hi engtikah nge ramdangah kan thawnchhuah ang le?
Engtikah nge thlai thazawk, thianghlim leh hrisel hi kan tharchhuah ve ang le?
Engtikah nge Tlangram loneih dan hlawkzawk, kan ram mil tur kan hriat ang le?
Eng Thei leh Thlai te hi nge kan ram kuthnathawktute chin atana tha leh hlawk ber le?
Heng zawhna te hi Mizoram mipui te hian chhang dawn ila, kan chhanna a inang vek kher lo ang, chhanna inang te pawh a awm nual mahna..
Kan Zotlangramnuam ah hian Kuthhathawka eizawk, a biktakin Tlangram loneitu te kan tam ber na chhan chu kan ram la naupang tak, inkaihhruaina la mumal lo takah hian Mirethei te tan eizawnna nghet a vang em em a. Nitina inhlawhfa a eizawng turin Labour Law mumal kan nei silo. Sumdawnna tan turin pawisa neih a awm si lo, Sorkar hna a lut turin THIL tithei deuh nih a ngai, sorkar hna in mizawng zawng a daih lo bawk nen, loneih chu thlan tur awmchhun a ni a. Chuvang chuan Tlangram lonei a eizawng an tam ber a ni.
Kan ramah Lehkhathiam ten Sorkar leh Company hnuaiah te han tha leh hlawk zawk an thawk a, pawisa tam tak tak an la lut a, chutihlaiin kuthnathawktu te chuan Eikhawp pawh an thar si lo. Heng te avang hian mithiam zawk ten kuthnathawka eizawn an tum ngailo a, lehkhathiam lo leh rethei te te tan Loneihdan system, hmanlaia kan pi leh pu te loneihdan hmangin Lo an nei a.. , hlawk taka thar chhuah a Intodelhna khawp thar chu a har reng a ni. Kan mithiam leh hausa zawk te hian tih tak takin Kuthnathawkin ei han zawng se, huan zau pui pui neiin Loneihdan mumal zawk leh thaithar hlawk zawk Mizoram mil tur hmuhchhuah tumin an thiamna leh sum te han hmang tangkai se chuan kan ram Loneihdan hian hma a sawn ang a, Loneitute pawhin hmahruaitu leh entawntur an neih chuan hma an sawn ve ngei ang.
Kan thlai tiak phun thin - Serthlum tiak, Nimbu tiak, Thei hai tiak, etc. te lah ni khawilam a mi nge pawh kan hriatloh, khawilai nursery emaw a kuitiah, a kung/tiak chu a hrisel tha em? a mother plant a a hrisel tha em? tih pawh hriatchian loh a ni hlawm. Serthlumtiak tam zawk hi chu Bangha leh Tripura lam a Vai ho ten an mahni hlawkna tur chiah ngaihtuaha an kuithiah, Serthlum puichang pawh nilo, thang duh satliah ringawt an kuitiah an rawn lak luh a ni a. Keini lam lahin a tiak chu khawi atangin nge an rawn lak tih ngaihtuah loin kan lo phun tawp tawp mai thin.. Australia ram te, Europe ram te, Americ ram te chuan Thlai tiak zuar reng reng ten Certificate an nei vek a, Certified Seed Nursery atang chauhin thlai tiak an la thin.. ( an ti..)
Kan ramah chuan kan Loneitute / Kuthnathawktute hi kan mithiamte leh sorkar hnathawk tute hian Sum siamna atan min hmang emaw ni chu aw a tih theih.. (... huat awihloh). Saitual a kan Sugar Mills te, Chhingchhipa kan Theitui sawrna te hian eng tiang a nasain nge kuthnathawktute a puih le,,, Theitui litre khat her chhuak tur hian Sorkar hian pawisa engzat nge a hmanral ang le?? Hria chu an awm ngei ang le.. Sum eng zat pawh lo seng se, sorkar pawisa a nia lawm kan ti a nih pawhin Farmers ten an thlaithar hralhna an neih phah chuan a tha tho e.. Mahse kum 2009 te kha chuan Sapthei man Sorkarin a bat sak, buai fe fe hi Aizawl ah an vei fua fua hlawm an tih chu le.. Saitual a Sugar Mill phei chuan enge a tih hria kan tlem hle mai. Saitual khua leh a chhehvel te chuan an eithlum deuh a ni mahna..
Mizoram mipui tam zawk ( 70%-80% te an ti.. record diktak erawh ka hre mai lo) Loneitu an nih tlat si avang hian Sorkar hian tha a thawh a ngai a, abik takin a kaihhnawih Sorkar department te an tan lehzual a ngai.. Kan mi hausa leh mithiam te pawhin Agriculture, Horticulture lam kaih hnawih hi kan ram innghahna a ni tih kan hriat a pawi mawh. Leilung hausakna lam te, sumdawnna lam te ai chuan kan Ramngaw leh thlai huan siamte, loneihna hmang te hian kan Pathian pawh hian Mizoram hi mal a sawm a ni tih hi kan pawm a tul viau lo maw...
Pay Revision neih a piang hian keini Engineer te, Doctor te, Teacher te, etc. eng emaw ber te hian an lungawiloh thu an sawi ziah a. Kan level pui te kan pha ta lo an ti thin,.. Keini Loneitu (Farmers) te hian kan level pui te kan phalo zel zawk chu a nih hi..
Heng te avang hian Tlangram loneih hi a hlawklo a, a thalo e ka tihna chu a ni lo,,, A kalphung hi a dik tawklo a, kaihhruaina mumal a awm tawk loh vang mai niin a lang. Kan Zotlangramnuam a mipui tamzawk te hian kan thawh phu tawk hlawh hi eng tik hunah nge kan hmuh ve dawn le..
No comments:
Post a Comment