Mizoramah Ropeway

Mizoram tlangram hmun awih tak tak ah hian Motor kawng laih man te a to em em si a. A chhawk zang khai deuh tur hian Ropeway te hi a siam ve chi loh emaw ni? Tin, ram changkang zawk te hian engtiang taka tha leh tangkai hian nge maw an siam a hman bik le? ka ti mai mai thin.

Tlem lai deuhkhan kan Chief Minister zahawm tak Pu Lal Thanhawla khan Aizawl tawt lutuk ti ziaawm tur hian Jawaharlal Nehru National Urban Renewable Mission (JNNURM) atanga siamturin Ropeway hmun li velah - Armed veng leh Mualpui inkar te, RIPANS hmun leh Laipuitlang inkar te, Laipuitlang leh Durtlang  inkar te, New Secretariat leh Civil Hospital inkar te, Civil Hospital leh Ch.Saprawnga Truck Terminal inkarte chu ruahman chhin a ni a, he mi atan hian Rs. Vaibelchhe 70. vel hmuh a beisei thu a lo sawi tawh bawk.

Chutihlai chuan Mizoram hmun thenkhat ah chuan Lung leh thil rit tak tak laksawn nan te, Kawrpui(Lui)  a thil han thiar kai nan te pawh Ropeway hi an lo hmang tangkai ve reng mai a lo ni a. Ka zinkual velnaah ka hmu fuh hlauh mai a. Mahse, Ramchangkang deuh a mi ten en chuan a in ang lo viau mei thei. Mihring tha a tel tam a la ngai hle mai. Kawlphetha (electrict power) duhtawka hmantur awm heklo le, Hrui (Thirzai ) chu lehlamah tlema sang zawngkin an thlung tawp a, an thil thiar(bungrua) an dah duhna lam chu an thlung hniam deuh a, tichuan gravitational force hmangin Lung(cubic) te, thing te, thil rit tak tak te an lo thiarsawn ve thin a lo ni a. Chu thil chuan rilru ngaihtuahna a ti kal thui phian a. Kan ramah hian kawlphetha duhtawk a hman tur awm ta se. Hei aia changtlung hi chuan awlsam te in a siam theih ang maw le ka ti mai mai a. 

A ni lah taka, kan rama power supply kan tlakchham dan nen a ngaihtuah zawm hi chuan, awt hle mah ila, tundinhmunah hi chuan mihring kalvelna tur atan chuan Ropeway hi chu a la tih chi vak lo te pawh a ni maithei bawk. Power khaihlak avanga laklawhlaia rei tak tak tan chang a awm ngei dawn si a. Mahse, tun ang reng hi ka ni bik lo’ng a, Electric power lamah kan intodelh ve hunah chuan Ropeway hi kan la mamawh deuh deuh a rinawm. Chu tur chuan kawlphetha ah kan intodelh a ngai bawk. 

Kan ram luidung te lah hi kan mithiam te hian Kawlphetha (Hydel project) siam nan a rem viau e an ti a, chuti chung chuan kawlphetha ah kan la intodelh lo hle mai si. “Hydel project lian tham siam theihna State in a nei lo” te kan ti, mahse Hydel Porject te deuh pawh tih tham kan nei chuang si lo. Kan neih chhun te lah chu man to tak tak a siam a ni a. Project Cost tur a duan fel sa chu a taka siam a nih meuh chuan a lo pung leh thur thur mai thin bawk si. Mizoram in kan puala kan Hydel project neih lian ber Serlui B Hydel project lah chuan 12MW chauh a pe chhuak thei si a (tunah hian 8mw vel an ti), a lawm awm tho e. Tin, Bairabi-a kan Thermal Plant lah hi a tangkai viau na a, kan ram retheihdan nen a ngaihtuah chuan a senso a sang hle bawk si.{A khawl 4 te hian darkar tinin Fuel Litre 5200 a hmang ral ziah ang a ni a, a Fuel hman hi Litre 1 Rs 32 man zel a ni – (Source Cheng Maktaduai 105 senga din Bairabi Thermal Plant, engtia tih zel chi nge? By Lalnuntluanga Tlomte}

Engatinge kan ram hi power ah hian kan intodelh har em em le? Eng a ti nge kan Hydel project te hi kan siam hlawhtlin theih thin loh le? A chhawrtu tur chu kei mahni tho kan ni si a! Kan Tuirial hydel project siam mek te Compensation tam lutuk avanga NEEPCO in a tawp san ringawt ni a an sawi te hi a dik a nih chuan a zahthlak hle mai. Enga tinge kan ramah hian Project lian tham kan neih apiang a, a project thatna tur lam ai a COMPENSATION hi a lar viau bik thin le. Mi ramah te hian a ni ve ang em le?

He'ng power siam chhuahna atana tha tak tak Lui nei reng si a, power a kan intodelh lohna chhan puiber pakhat chu Curruption hi a ni kan ti thei ang. Mizoram Lui leh hmun thenkhat ah chuan Sorkar chuan Hydroelectricity project(Hydel project) chu a ni ve thin. Mahse, a zawh hun tur an thlen meuh chuan a pawisa tur hmang zo tawh si in, a project a siam zo si lo te hian kan dah tawl mai mai chu a nih hi. Engtikah tak power ah hian intodelh ang i maw? Tunlai khawvelah chuan engpawh ti dawn ila kawlphetha tel lo chuan thil tam tak a tih theih tawh loh tih chu kan hre vek si.

Kau Tlabung Hydel project,  ACB in an chhui meuh chuan, kan Engineer chuan tak tak 13 ngawt mai te chuan Anticipatory bail an dil ve nghal hmiah mai nia. An eiru e chu kan ti ngam lo, mahse sawifiah tur chu an nei ve a ni mahna?. Hetih rual hian mipui te pawh hi kan inngaihtuah chian a hun ve ta hle mai. 

Heng zawng zawng ah hian tunge mawh phur ta ang le? A bul berah chuan kan Sorkar thuneitu te hi an ni chianga, chumi zawhah Department lam a kan mithiam te pawh an tel bawk. Tin mipui lam te pawh hian tuna kanram dinhmun ah hian mawh nasatakin kan phur a. Kan phak tawk theuhah hian heng Corruption te pawh hi kan haw lo hlawm hle ni hian a hriat. Miretheite inhlawhfakna atana siam Ni za (100) inhlawhna te pawh Village council level ah te pawh bothlau a awm ve fo niin kan tualchhung chanchinbu ah kan lo hmuh thin kha.. Chuvang chuan kan zavai hian kan insiam that chu a ngai a ni. Chuti lo zawng Eiruktur hmu tam deuh te an ho sa thur thur anga, eiru ve duh tho, mahse eiruk tur hmu tlem deuh te an hausa lo deuh ang a. Mipui nawlpui an rethei tual tual bawk si ang.. Rope-way pawh lo siam teh reng ila, kan chhawr tangkai tak tak thei lo ang. A pawiber mai tur chu kan

ramin a chhiatpui tur hi a ni..