Khawnge a tha in a ngaihnawm thin si a,, mahni irawm chhuak ringawt chuan mit a tlung lo lutuk dah ang e....
Hman deuh tawha kan chhim lam hruaitu, Pu Manghnuna’n kan Mizo officer pakhat nena an inkawmna thu min hrilh khan, harsatna eng vang emawa lehkha zir sang thei lote’n rual an awh thinzia leh sap tawngte thiam ve an chak thinziate chu sawi loh, kan mi lal, mi liante thleng pawhin sap tawng thiam nih an chakzia a tilang chiang hlein ka hria.
Pu Manghnuna sawi dan chuan chu officer chuan, “Mizo ainga sap tawng thiam ber i hria em?’, a ti mawl tawp mai a ni. Pu Manghnuna chuan hranghlui deuh, Pu Sanglianate atanga tanin thiam awm deuha a rinte a sawi zel a. Mahsela, chu officer chuan a sawi apiang chu lu thing meuhin, “Aih, a ni lo,” a ti zel mai a. A tawpah chuan Pu Manghnuna chu a harhg chhuakj zawk mai a, “A... nangmah hi i ni ang chu,” a han tih chuan officer chuan, “Dik mai thei,” a ti nghgal a, chuta tang chuan lungrual taka ti ti dunin an nui dun ta bawrh bawrh mai niin a sawi.
Sap tawng kan zir dan hi a kawng a thui deuh a, chuvangin a tawng neitute tih dan loh ang taka kan tih chang a tam thei viau ang. Pu Chuauthuama {RIP) khan fiamthu ti takin a sawi thin, “Lower primary-ah Pu Laia’n mi han zirtir a, dam duai mai hian ‘Ka la = I theek, Ka la ta = I tuuk,” a han ti a, upper primary pawlah Pu Pasena’n min lo zirtir leh a, fiak ang thek thawk hian ‘Ka la = I theek, Ka la ta = I thuk’ a lo ti ve leh a. Middle pawlah chuan Pu Hrawva’n min lo zirtir leh a, ‘Ka la = I teek, Ka la ta = I tuuk,’ a lo ti ve leh a. A eng bera chu nge dik tih kan hrethiam tawh thin lo a ni. Welsh-ho hnen atangin an zir chhawng leh a ni a, kan zir dan hi a kual thui tawh em a ni,” a ti thin. Pu Chuaua sawi dan atang hian kan chhim lam unaute, London Baptist Missionary ho atanga sa tawng zir intite hi an hawi champ dawn ngawt a nih chuan British Aristocratic Family atanga lo chhuak, Eton leh Oxforda zirchhuak, Major Joyce-a’n kan chhim lam unaute sap tawng a sawi dan pawh kha a chapopuiawm fahran loh viau asin! “Mizoram chhim lam missionary chhuak hmasa ber kha a ha a bal a ni lo maw? An sap tawng reng hi a mak em mai,” a ti ve tho mai.
Kan sap tawng hman hian a tawng neitute tih dan a an lohna chhan lian tak pakhat leh chu vaiho, sap tawng hmang nasa si, Kushwant Singh-a’n, ‘English hrula Indish tawng hmang’ a tih maiho lam dan leh hman dankhuan thui tak min hneh vengte pawha ni mai thei. Dam teiin inthlanpui kan han thleng leh ang, poster, Vote for Congress tihte chu kan hmu tam leh mai mai teh ang chu. A aia tawi zawkin, Vote Vote Congress han ti se la chu a ni ale! He laia tul lo zet maia for an han telh talh mai ka hmuh hi chuan Pu Ngurauva naupan laia home work a tih dawn a, ka thianpa U Lalthlamuana hnena, “Pu Muan, ‘Tu nge siam che?’ tih chhanna atan hian ‘God’ ka ti mai dawn em ni?,” a tih a, U Lalthlamuana’n “Ti mai rawh,” a tih a, Huzauva pa Lalupa’n, “Ngawi rawh, Muana ‘God’ tih ngawt chu a tawi lu deuh lo maw, ‘He God’ emaw, ‘His God’ emaw tih tur a ni dawn lo’m ni? a tih kha ka hre chhuak thin. Vote Congress tih chu a tawi lu deuha an hria a nih pawhin Vote Congress to power emaw tal ti ta se la chu a him dam mai tur ale!
Kan sap tawng hman danah hian vaiho tih dan Indian English Usage hian min hneh thui hle tawh tih hriat ve hrim hrim a tha. Bio-data kan tihte hi India sap tawng a ni a, a tawng neitute khu chuan curriculum vitae an ti. Inti hawi zau deuh an nih vang nge ka hre lo, hmeichhe charman te, charman ti mai duh lo va chairperson han ti deuh kherte pawh hi anmahni sapho tih dan dik tak chu a ni lem lo. Sap tawng thiam tak tak Pi Margaret Thatcher, an Prime Minister thinte kha chuan an hmeichhe chairman a address chuan, Madam Chairman a ti mai a ni. Gospel Centenary kan lawm tuma Salvation Army General ni thin, Pi Eva Barrows, sap tawng neitu tak takte zinga mi kha chuan, “Salvation Army chairman ka nihna anga ka zinnaah chuan.....” a ti ve mai a nih kha maw le! A ni tak a, hmeichhe graduate pawh hi Bachelor of Arts kan ti zel mai chua ni a.
Sap tawng hi kawngkawia mitkalh pahnih intawk an sawi, an insu sawk mai a, pakhat zawk chuan, “I kalna tur i en lo em ni?,” a han ti a, a pakhat ve thung chuan, “Nang pawh i hawina lamah kal ta che,” a ti e, an tih ang deuhin an ziak loh anga lam apui hi a tam em em mai a. Chu’ngte chu sawi sen pawh a ni lo ang, kan hman lar deuh sim a tawng neitute tih dan ang lo deuh taka kan tihrik thin chu plumber te, bomber tihte hi an ni. He’ngah hian b hi a ri lo(silent) hmiah a ni tih hriat a tha (with deu apology to English Lushai Dictionary by JFL). Sawi tak zelah chuan evangelist, a hming kan sawi lar em em, mi thiam pui puite pawhin an lam fuh hleih theih loh chu Billy Graham hming hi a ni. Graham tih hian h hi a ri lo tur a ni. Durham tiha h a ri lo ang hian, Gra’em tia lam tur a ni. Graemme tih nen hian a lam dan a thuhmun chiah tur niin Collin Gem Dictionary of First Names chuan a sawi
Hmanni lawka kan mi thiam thenkhatte’n Reverend tih kaihtawi ziak dan chungchanga ngaihdan inang mang lo an neih dante kha chanchinbuah ka lo chhiar ve nual a. Kha khan ram buai tirh lai vela Pu Manliana (RIP) hova MNF ramhnuai sipai rammute chanchin an sawi kha mi hriat chhuahtir a. Inngeih dial dialin emaw an awm a tih laiin thubuai rem khirh tak mai a nei ta der mai a. An buaina chhan chu an hotute’n an kaisantir ni lo va, mahnia lo kaisang ta ngawt a, an duh duh, captain bel te, major bel te, bel zel mai an awm nual tak avang a ni. Pu Mana chuan an buai thelh nan chuan “Nau te u, in duh duh kha lo kaisang zel mai rawh u,” an tih ang deuhvin Reverend title hmang theihote chuan zahawma an hriat zawk hmang mai se lo; amaherawhchu, English tawng hmangtute’n an tih dan ang khuan Rev tih an hman chuan a tawpna (period, .) dah se la, Revd tih an hman chuan dah lo se la a tawk mai. He lai thua IAS officer leh Cambridge graduate meuh an han inhnial hi chuan buai laia Ngaizawl khauaa MNF Volunteer an lut tih a hriat a, Khawzawl post comander thinrim lutuk Ngaizawl khuaah a hote nen an thawk phei a, an khaw hotu hnenah, “Eng ati nge in rawn report vat loh?,” tia namen lova a vau a, Ngaizawl village chairman chhanna an sawi thin kha ka hre chhuak thin. “An chem em a, solkal pui tan meuh chuan chihsamah ka luat lo alawm,” (An tlem emn a, Sorkar pui tan chuan tihthamah kan ruat lo alawm) a tih kha ka hre chhuak. Kan mi thiam hawlh lawrte tan meuh chuan inhnialna thamah ka ngai lo a ni ber e. Sapho chuan kaihtawiah chuan a spelling tluantling bul leh tawp an hman chuan tawpna (period) an hmang ngai lo. Entir nan- Minister tihnan Mr (Mr. ni lovin), Doctor tih nan Dr (Dr. ni lovin)an hmang thin. Heta tanga thlir hian kan Nilai Thupui bu kawma Revd. tia a bu chhutute’n an ziak hi sapho tih dan chu a ni hauh lo mai! Sawi tak zelah chuan Dr Lala, M.A., Ph.D. tihte hi chu a duhamthlak bawrh bawrh deuh. Dr. Lala ringawt emaw, Lala, M.A., Ph.D. tia ziak mai tur a ni.
Kan hman lar angreng tak, a tawng neitute’n an hman ve ngai mang loh chu musical concert tih hi a ni leh bawk. Concert tih hi musical performance tihna a ni tawh sa a, chuvangin musical concert tih chu khaki tih emaw, round kual vel tihte ang a ni. Heti ang deuh bawk hian hun chungchang sawina lamah hian tihfuh zan loh kan nei tam angreng hle. Changkannaah kan ngaih deuh vang ni maw, ni han tih mai ai chuan Dt emaw Date han tih hi kan ching viau mai a. A uar zual phei chuan sawmnaahte dated 15.2.2003 emaw kan ti thin. A hun la thleng lo na na a, dated tih hi chua a dik lo hrim hrim. Office lehkhaa Dated the 15th Feb. 2003 tih chu kha mi nia tihchhuah emaw, sign emaw tihna a nih dan atangin han ngaihtuah ila, heti ang thila dated tih a fel loh dan chu a lang chiang mai ang.
M/S emaw, Messrs hi Mister/Monsieur plural form a ni a. Chuvangin M/S or Messrs hmanna tur chu - i) Mipa pakhat aia tam sawina; ii) Mihring hming hnuah. Entir nan, M/S Lala & Sons tih chu a dik a, M/S Lali emaw M/S Eatern Enterprise tih emaw chu a dik lo. A thuhrimah Mister tih te, M/S tihte hi chu mahni kan intihna tur ni lovin, mite’n min address-na tur zawk a ni. Tu nge i hming, an tih a, ‘Pu Bawnga ka nia,” tih chu a tih chi vak lo ang! Kum ziak dan thuah hian khawi lai laiah emaw chuan tihsual palh kan ching leh bawk. B.C. hi a date hnuah dah tur a ni. Entir nan, 100 B.C.. Chutih lai chuan A.D. hi chu a date hma lama dah tur a ni thung. Entir nan, A.D. 100. Century sawinaah erawh chuan A.D. pawh hi a hnuah tho dah tur a ni. Entir nan, 20th Century A.D..
Sap tawng thumal thenkhat, a tawng neitute’n an hman dan ang lova kan hmante a awm nual mai. Entir nan, Souvenir tih te hi mi tam tak chuan chanchinbu tihna emaw kan tih hial tawh hi noun-ah chuan hmun emaw, thil lo thleng emaw hriat rengna tura tlereuh kan inpek emaw, kan lak/lei thin emaw hi a ni a. Verb-ah thung chuan ‘ru’ (pilfer or steal) tihna a ni. Tun chinah chuan kan college te hian souvernir ai chuan magazine chhuah thin zawk se la a tha lo maw? College han sawi kai takah chuan kan Mizoramah hi chuan Inter-College Sports-ahte meuh pawh carrom board, chess board, draught board competitionte an nei thin a. Heti a nih chuan badminton court competition te, football ground competition te, cricket pitch competition te pawh kan la nei zel mai ang a!
Tihdik an tum luatna avanga tihsual palh ni mai thei, a chang changa chanchinbu-ahte kanhmuh thin chu hming kaihtawi ziak dan hia ni leh bawk. Kaihtawi, thumal anga lam mai thin, OPEC, NATO, FIFA, CONCACAF, ENSA etc, te hi a kara tawpna chhun thliah thliah lova ziak mai thin an ni.Tin, hman than avanga thumal thar anga pawm tawh, quasar, laser, radar, sonar, scuba etc., te angte phei hi chu capital ni lovin word pangngai anga ziak mai an ni. Tunlai chin dan a ni bawk a, U.N.O. te U.S.A. emaw tih teh duah lo hian UN, US tih hi a tha mai.
Telephone directory-ahte leh thil dangahte keiniho tihdan anga alphabetical order-a hming thla hi ram dangahte awm ve tak ang maw! Aikhuma leh Zulawma te hming tlarho thei thlat. A chhan maw? E le, an hming bulah C an dah ve ve miau alawm! Mi hming hre mah ila, a initials kan hriat miau loh chuan zawnchhuah harsa tak mai a ni thin. Tin, doctor reng reng, an hming eng pawh nise, D hnuaia tlar khawm vekna hi khawvel hmun dangah awm ve tak maw! Khawvel hmun dang sawi takah chuan opiinion poll hi ram dangah pawh an uar a, ram a changkan poh leh an uar emaw tih mai tur a ni. Mahsela, kan ram anga opinion poll chhangtute’n kan duh dan anga an chhanloh mai avanga sawiselna leh heti khawpa bengchhanpui zuina hi ka la hre ngai lo. Kan India ram ngeiah pawh hian opinion poll hi kan uar a. Times of India chanchinbu-ahte hian opinion poll hi a awm deuh reng a, a result sawiselna pakhatmah ka la chhiar fuh lo.
Kan ramah hian pawl thenkhatin an din tankum atanga kum 30 na te, 40-naahte Jubilee an lawm thu kan chhiar ta zauh zauh a. He’ng hming phuah thliah thliah hi a thlangpuiah chuan inneih champhaphak hming an ni. Kum 1-na paper atangin Kum 15-na Crystal thlengin kum tin hian hming an nei a. Chuta tang chuan kum 70/75-na thlengin kum 5 bi zelah hming an nei chho leh a. Tih dan tlang puiah chuan kum 25-na silver, kum 50-na golden, kum 60-na diamond te hi Jubilee tih an ni. Jubilee tih hi Bible atanga lak chhuah a ni a. Hebrai tawng a ni. A rik dan leh a awmziaah pawh inhnai awm tak, sap tawnga jubilation tih nen hian a bobul lamah inlaichinna nei chuang lo angin Bloomsbury Dictionary of Word Origins chuan zuk sawi tlat thung a! Eng pawh ni se, kan pawl kum 40 tlin lawmna neihkanduh chuan, ruby jubilee ti lovin, ruby anniversary emaw, chuti ang zelin coral, sapphire anniversary etc., te vuah ila, a tawng neitute tih dan ang a nih dawn avangin a tha zawk awm e.
Heti ang chi hi sawi tur apui a tam khawp mai a, a tawpna atan chuan sap tawng, Mizo tawnga kan lehlin dan lam hi han sawi leh thuak thuak ula. Cleanliness is next to Godliness tih te, Fai hi Pathian anna a ni tia kan han letlingte hi chuan a pawi a sawi lem lo va. Pathian an theihna tura kan sawi hi a nep em a, tih thu mai lovah chuan Jesaia fapa, ka thinlung ang pu mi ka chhar ta tia kan Pa Pathian kan han tawngtir tate hi chu, ‘Ka duh zawng mi tak’ emaw, Ka thinlung duh zawng mi tak......’ tia lehtlin atan a itawm ngawt mai. A chhan pawh he lai thu sermona hmangtute hian Davida, pa hriam hre angreng tak mai Ppathian thinlung ang puttir tep tuma an buai viau thin avang a ni.
Apostles Creed (KHB 491) chang 4-na a, ‘Pontia Pilata’n nasa takin a tuartir a..... tihte pawh hi a tawng bulah chuan ‘Under Pontius Pilate tih a nih avagnin Pontia Pilate hnuaiah emaw, Pontia Pilata rorelna hnuaiah tih emaw ni ta se la chu, a tawng bul thu nen hi chuan a inhmeh zawk ang. Dik tak phei chuan Pilata kha chuan Lal Isua chhuah theih dan kha a zawng ve hle niin a lang nghe nghe a ni a, roreltu a nih laiin a rorelna hnuaiah khan Judate’n namen lovin an tuartir ta kha niin a lang. Lal Tawngtaina a, Hallowed by the name tih I hming zahawm rawh se ti a lehlin pawh hian a sap tawnga a thu tum chu a thelh tlatin a lang. Lalpa hming zahawm sa hi kan zingah zahin awm zel se la, tihna ani a, chuvangin I hming zahin awm rawh se tih zawk tur ani lo maw?
Zosaphluia chuan, I’m not ashamed to own my Lord tih chu sap tawnga a awmzia rawn phawk chhuak deuh, Ka Lal awmpui ka zak lo ang tiin a rawn letling a, chu chu kan music committee te’’n , Ka Lal duhawm ka zahpui lawng tiin an rawn thlaksak ta a. He hla phuahtu sawi tum chu a Lalpa neih (own) a zah loh thu liau liau a ni a, Lalpa duhawm leh duhawm loh thu a sawina niin a lang lo.
Hetiang deuh bawk hian Upa Pasena’n
O Chirst, in Thee mu soul hath found,
And found in Thee alone;
The peace, the joy I sought so long,
The bliss till now unknown”
tih chu -
Ka thlarauvin Krista-ah chauh,
Muanna a zawn thin kha...
tiin a rawn letling a. Chu chu-
Ka thlarauvin Krista-ah chauh,
Muanna kim a hmu a
tiin a rawn thlaksak leh bawk a. A phuahtu’n peace (muanna) leh joy (hlimna) rei tak a lo zawn thin thu hi a hla tihdanglam hnuah chuan lang tel ve ta reng reng lovin, a hmuh thu chu tum hnih tawp a lang leh bawk si a ni. Ka ngaihdan chuan Upa Pasena lehlin dan hian a phuahtu sawi tum chu a phawk zawk.
Kan Bible lehlina thusawmpek, Remember the Sabath day, to keep it holy tih Chawlhni hi thianghlim taka serh tur ani tih hre reng rawh tia kan han letling ta hlauh maite hi a chu a thu zirna chu a tha em em tho mah se la, kan Kulikawn Biak In-a thuhriltu p0akhat, pulpita lo ding chhuakin, “Ngawi teh u, ka subject ka hloh daih mai,” a tih ang deuh kha niin ka hria. Heta hriat reng tura tiha chu Chawlhni (Sabbath) kha a ni - thianghlim taka serh tur a nih mai ni lovin. Thianghlim taka an serh tur chu hriat saah ngaiin a chawlhni taka thianghlim taka an serh tura chu hre reng turin a ti niin a lang.
Hei hi Sangzuala Pa thu ziah, Thlipui Chanchinbu, April-May, 2003 chhuak a mi lak chhawn a ni.
No comments:
Post a Comment