Samang inthenna - Inthenna Runthlak

Kan pi leh pu te khan an lu kha kawng takin an met ngai meuh lo ni tur a ni. An sam te chu an chalah tak then pawkin, an bek veilamah a chan ve, a lehlamah a chanve dang an han then pawk a. Tichuan sam chu hawi lam hrang daihin an lo awm ta.. Chuvang chu nitur a nia, mihringte chhan eng eng emaw avanga inhmu tawhlo tur emaw, in hmuleh tur nihleh nihloh pawh hriatloh a inthen te sawinana SAMANG THEN ti a he inthenna hi an lo sawi thin le..

A ni reng a he inthenna hi zawng a runthlak em a ni. Inthen te reng reng hian engemaw tala in zawmna, inpumkhatna, kan lo nei lawk thin. He inthenna hian unau, nupa, thiantha, laina te a then thin a. Chu chu thihna hmang ten a ni a, thildang hmang pawhin he inthenna hi a thleng bawk. Chung zingah chuan Nupa inhmangaihtak thin te thihna vang ni silo a inthenna hi a runthlak hle mai..

Thihna in mihringte hnena inthenna a thlen hi chu tupawhin a kan hriatlawk, a hun tak kan hriatlawkloh mai a ni a. Mitin tena kan tawn tur vek a nih avangin, a hunlaiin na hle mahse tawrh dan pawh thiam a la awl zawk in a lang.. Mahse Nulat lai leh talngval lai atanga induh ve tak, an karah chuan engmah lenglo khawpa induh ve thin te, thiantha palai pawh ngai lo khawpa inpawh tawn leh inngaina te Nupuipasal ah an han insiam a, Kohhran leh Pathian hmaah an mahni ngeiin thu an tiam zet hnu lawka an han inthen leh thin hi chu a runthlak thin hle mai.. Mihringte hi inthenleh turin a lawm kan intawn kan ti fo thin, mahse he Inthenna kan sawi mek hi chu pumpelh theih chu ni chiang a, a pumpelh dan zawn fo hi a tulin finthlak hle.

Mi thenkhat chuan "Nupa tangthen (nupa inthihsan) chu Dar(shoulder) lehlam sahthlak ang a ni" an ti thin, a na hle ni tur a ni. Mahse thihna hi chu mihringte thuneihna piahlam engkima roreltu thu ani a, kan sawisel thei silo. Sawisel pawh ni ila a sawt chuang lo. Chu Thihna avanga inthenna chu pumpelh turin Natna ata emaw, thihna ata emaw pawh lo damleh pawh nise, thihna avanga inthenna chu a pumpelh theih chuang loh.. Chuvang te pawh chu a ni mahna le mithenkhatin a nupa a thihdun an lo thlan ni.. Mahse chu zawng dem phal chi a ni lo, in hmangaihna vang a ni tlat.. In hmangaih tawhloh avanga inthen ai chuan a ropui tlawt..

He inthenna, thihna vang ni silo, chhuanlam siam chawp te te hmanga nupa te inthenna hi chu a runthlak em em a. Uluk taka Pathian leh Kohhran hmaa an thuthiam kha an han palzuta, mahni thutiama dinglo an han ni phawt a. Hmangaihna leh induhsak tawnna avanga nupa ni thin kha, hmelma ah a chang thei a, chhungkhat laina ni thin kha hmelhriatloh chhungkua ai pawha inngaina tawn lo chhungkua ah a chantir a, naupang duhawm tak tak te chu Fahrah lainatawm taka te a siam a, Nunhlimtak thin kha nunkhawhar taka te a siam thin a, chuchuan a chhe zawngin nasa takin nghawng a nei thin.

He inthenna ti runthlak lehzual tu chu an rila rah an fanaute dinhmun hi.. Naupang engmah la hrethiam ve lo te, an hun lo la kal tur thuitakin a tibuai a, nuhrawn te, pahrawn te bula an awm a ngaihphah fo thin.. Engang pawhin lainat leh duat hlawh mahse Nu chu NU, pa chu PA an ni tlat a. Nu hmangaihna te, Pa hmangaihna te chu a nep chuang kher lo ang, mahse a dawngsawng tu, a hlutna hmangtangkaitu, a zarzotu ber tur Naupang te tan erawh hriatfiah thiam a har tawh thin a. A tu zawkin nge hmangaih a, duat zawk tihte chu naupang te rilruah a lo piang thei thin a, chuchuan anmahni hringtu nu leh pa ngei te lakah ngaihdan thalo a siam thei.


Heng zawng zawng hi Fimkhur lo leh ngaihtuah chianglo taka nupui pasala insiam vang te pawh a ni mahna le, chhan hrang hrang a tam thei ang.. Mahse mihring puitling chin te, Pathian leh Kohhran hmaah meuh intiam a nupa a insiam duhna khawp inhmangaihna nei tawh chuan, chu hmangaihna chu engvang pawh nise a vawnnun hna chu an mawhphurhna a innghat tlat a. An thutiam chu an vawng nung reng tur a ni. He Inthenna Runthlak tawng lo tur hian kawppui tur thlan kawngah fimkhur a ngai a. Hun reilo te chhung atan nilo, damchhung (Till death do us apart - ti a chham thin ang khan) atan a ni tih hi Inneih Thutiam chhamlai hian rilruah vawn ngei tur a ni.

Chuti lo zawng he Inthenna Runthlak hian a man hlauh dah ang che.