Monday, August 13, 2018

KAN RILRU PUTHMANGIN KAN NAKIN HUN A HRIL THEI

He Lei hringnunah hian kan rilru puthmang hi a lo va pawimawh tak em aw.!!!!


Kan hlimna tur hian midangte hian mawh an phur teh chiam lovin ka hria. Mawhphurtu bik an awm anih chuan, keimahni ngei hi mawhphurtu chu kan nih ka ring tlat.


A êng lam thlir hrâm hrâm te, mi neih ang kan neih ve loh lam aiin mi neih ve loh kan neih te chhiar fo ṭhin i la, vanduaina kan tawh ṭhin te aiin malsawmna kan dawnte chhût hrâm hrâm zêl ila.


Nimin kha kohkir theih a ni lo a, nimin a i thiltihte sût leh theih a ni tawh lo. Mahse, ni thar duhawm tak 'Vawiin' kan thleng tawh zawk a ni tih hre thar leh ila. Hun kaltawh avanga in dawm kun mai lovin, ngaihtuahna thar pu hrâm hrâm ang u.


Vawiin i hman dân hian i nakin hun a hril a, vawiin a i rilru putmang khan i nakin hun a tidanglam thei a ni tih hre chungin Ni thar duhawm tak "Vawiin" hi fîm tak leh hlim takin i hmang ṭheuh ang u.
Ni hman nuam vek u le.


Buata Bawihtlung
(Ka Facebook wall a ka dah, hetah hian ka suan lut thar leh - Buata)

Thursday, July 5, 2018

MARTAR CHALBUANGA - MIZO ZINGA KRISTIAN MARTAR HMASA BER

(Mizo Kristian hmasa, Krista vanga tihduhdah tuara Martar hmasa ber, Khandaih Tlangval fel Chalbuanga Chhangte chanchin)   
-       Lalbuatsaiha (Buata Bawihtlung)
Buata.tkt@gmail.com
Dt. 05.07.2018 @ Azl


Mizo zinga Kristian Martar hmasa ber chu Khandaih khaw tlangval fel leh taima Tv Chalbuanga Chhangte a ni. Chalbuanga hi kum 1882 khan a lo piang a, unau mipa awmchhun niin an unau a upa lam atanga pathumna a ni. A Pa chu Thilluta a ni a, a Nu chu Famthangi a ni. A pa hi a thi hma a, a nu hoin an awm thin a. An unau chu hengte hi an ni-


1.      Tlangziki
2.      Chawntuahthangi
3.      Chalbuanga          
4.      Khuallutthangi
5.      Chawngnghilhlovi
6.      Tlangchawiveli


Chalbuanga te khua Khandaih hi Mizoram hmar lamah awmin, lal ropui Pawihbawiha fapa Vanphunga Sailo khua a ni a. Khaw taima tak, Buh leh bala a intodelh leh khaw nuam tak niin Zawlbuk pawh pahnih an nei a. Kha tih lai a Mizoram khaw lian ber niin, In 700 khua an in chhal a. Rev Liangkhaia ziah dan erawh chuan In 550 niin Mizoram khaw lian ber a ni a, Biate in a dawt a ni awm e.



Khandaih khuaah hian kum 1903 August ni 1 khan lal Vanphunga remtihnain Zosap Missionary te leh Bawrhsap ten Mizoram a Thingtlang Sikul nghet hmasa ber an din a. Zirtirtu chu Khawnbawl Upa Vawma fapa Hrangsaipuia a ni. Sikul kha Pathian thu sawi nan leh zirtir nan hmangin Biak In atan hman a ni ve nghal a, Kohhran a lo piang ta a. Khandaih ah hian ringtu hmasa Khuma leh Duma te chu Pathian thu hril a kalin “Pathian thu lo awih ve tawh rawh u” an ti a. Pathian thu awih an lo awm ve ta a, Tv Chalbuanga pawh Kristian hmasa zingah hian a tel ve a. Khatih lai khan Kristiante khan Isua lama tang an in ti thin a ni.



Tv Chalbuanga hian kum Kum 1904 November ni 2, Nilaini zan khan Mualveng Zawlbukah Zosaphluia (Rev DE Jones) kut atangin Baptisma a chang a. Zosaphluia hi Pathian thuawih hmasate Baptisma chan tir turin Khandaih ah hian, ringtu hmasa te nen Aizawl atangin an kal a. He Baptisma chantirnaah hian Zirtirtu Hrangsaipuia chuan hming a lam a, Tirhkoh Vanchhungan Fenthlirin tui a lo keng bawk a, Ringtu engngemaw zatin Baptisma an chang a ni.



Chalbuanga hi Khandaih khaw tlangval taima, tlawmngai leh huaisen a ni a. Lal Vanphunga pawhin Khawnbawl Upa atan a sawm hial a. Khawngbawl upa dinhmun hi thil namai lo tak a ni a, khatih laia lal ropui Vanphunga Khawnbawl Upa nih phei kha chu, chakawm tak tur a ni. Mahse Kristianna kha bansan a ngai dawn si a, Chalbuanga hian lal sawmna duhawm tak chu hnarin ISUA LAM ṬANG nih a tlang ta zawk a ni.



Kum 1905 kum tawp lamah Chalbuanga te khua Khandaihah hian Tuihri a leng thut mai a. Kum 1905 December ni 3, khan khawnbawl upa pakhat chu Lal ina Zu an in laiin a kua a khawh a, chumi ni la la chuan a thi zui ta mai a. He hripui vang hian Puitling pawh mi 50 chuang zet an thi hman a, an inphum seng lo thelh a ni an ti. He hripui hi Pathian thu awih hovin Ramhuai lal Sahmula an tihthinrim vanga lo thlengah an ngai tlat a. Sorkar mi tirh compounder in Tuihri damdawi Tuikhura a phul te pawh chu, an mahni tih hlumna tura Kristiante tihah an ngai zel a. Kristiante chu an haw zual hle a ni awm e.



Kum 1906 April ni 8 Pathianni ah chuan, Chalbuangate khuain Tuivaia Sangha an tlangvuak naah Harhna a lo thleng a. Pathian thuawihte chu zai pah a kutbengin an lamkual a, midang a kai chhawng zel a. Hei hi mipui vantlang hmuh leh hriat theih a Mizorama harhna hmasa ber a ni a. Mak deuh chu Khandaih a harhna a thlen tuk April ni 9, 1906 Thawhtanni ah Aizawl ah Harhna a lo thleng ve chiah a ni.



Harhna a lo thleng a, Pathianthu awih an pung ta hluai mai bawk si. Pathian thu awih ten Chawlhni serh a, hna an thawk lo chu Lal leh upate chuan an ngaithiam lo hle a. Nitin kawla nichhuak chhiara fehchhuah pawhin hawp khawp thar a har the lul nen, engtin nge Kham an thar ang le? tiin Kristiante chu tam hmahruai an ni e tiin an duh lo hle a. Kristianna chuan an khawtlang nun tichhe vek torah an ngai a, tih rem dan a ngaihtuah ta a.



Lal chuan a upate chu, an chhung leh khat  zinga Isua lama tang (Kristian) an awm chuan, Zu inkhawmnaah Zu no a pek kan ta zel mai a. Chu chu Upate chuan hrehawm an tiin, an fate chu Pathian thuawih bansan turin an thlem a, an vau a, kut hial an inthlak ta a. May 1906 vel atang chuan Tihduhdahna chu a hluar tan a. Khawnbawl upa fate chauh ni lo, Pathian thuawih tawhphawtte chu Kristianna bansan turin an ti a, hmuhsitna leh ensan bakah khua atanga hnawhchhuahte leh ti duhdah nasa tak an tuar a.



Hetiang a ni chung hian Kristiante pawh an rinnaah an nghet em em mai a. Pathianthu awih lo lam pawh an vung em em a, Pathianthu awih an sawisak zinga pakhat chu, a thi ni a ngaiin dai ah an kalsan a. Chalbuanga chuan a khawngaih hle a, a ruang chu va hlawm a tum a, mahse vanneih thlak takin a lo thi lo hlauh a. Chu tlangval chuan “Buanga ka tui a hal lutuk, tui min pet eh” a ti a. Chalbuanga chuan tui intur pein a baiwhsawm a, inah a hruai haw ta a.



Chu chu Pathian thu awih lo ten an lo hriatin an thin a rim hle a, hun remchang an hmuh veleh Chalbuanga chu an sawisa ve ta a. Pathian thusawih chu a bansan duh chuang lo a. Tuthlawh ha suih loh in an vua a, a hnung zang chu an vaw kak hial a. Pa nei tawh lo leh fapa mal a nih bawk avangin Lo lamah mipa hna a farnu ten an thawk chu a ngaingam lo a. Na chung chungin a feh ve a, Thlam saknaah te a farnute a lo kawhhmuh thin a.



A na chu a tui hluam hluam a, a Nuin In lama lo awm hahdam tura a tih pawhin, “Isua lamtang tan a na lo ve” a ti mai thin a ni awm e. Tuk khat chu, a hliam tui hluam hluam chu a lo hil duak mai a, a dam tawh dawn ni a ngaiin an lawm hle a. A chhungte pawh chuan ngaihtha takin an fehsan a. Mahse, a nu leh farnute feh an lo haw chuan a lo na zual hle a. A chhungte hnenah chuan “khi min hruaitu tur an lo thleng ta, ka kalsan tawh ang che u” a ti a. Tichuan Pathianthu awihlote kutthlakna avang chuan, kum 1906 khan Khandaih tlangval fel Chalbuanga Chhangte chu kum 25 mi niin a Martar ta a. Mizo Kristian Martar hmasa ber a lo ni ta a ni.



Vanphunga khua Khandaih chu kum 1906 pawltlakah lal leh upaten hma hruaiin Changzawl Kawnpuiah an kai a. Kristian tihduhdahna chu a hma aiin hluar zel a.  Kawnpui chu a hrisel lo a, 1907 ah Changzawlah an kai leh a. Hetah hian Kristiante chu kai ve an phal lo a. Kristian te chu Bawrhsap hnenah an zual ko a. Kristian tihduhdahna a thawh hlawk tak thin piang thar ta Saithuama ho chuan Kristiante chu Kawnpuiah chuan an awm a. Biak In pawh, Sikul tawmpui lovin, 1907 khan a hrangin an sa ve ta nghe nghe a. Mahse, Bawrhsapte nawrna vangin Kristiante chu Changzawl kai an remti leh ta a.



Chalbuanga hi a dam laiin, a chhung ten a nupui tur Pathian thu awih nula an lo be hmin vek tawh a. Inneih hun tur nghaka an awm mek laiin, tihduhdahna a tuar ta a. An sawisakna avanga a hliam te chu na hle mah se, Isua phatsan a duh ngai lo a. A chhungten Kristian a nih vanga sawisak a tuar chu an manganpui em em a. Mahse ani chuan Thlarauthianghlimin a awmpui tlat a, “Lalpan, rethei leh manganga kan awm reng hi a phal hauh lo ang, nakinah chhim chhaklam atangin Khuallutthangi (Mambawihi) hian inleng a nei ang a, chu chu in lo neih tir dawn nia” tiin a chhungte chu a hrilh nghe nghe a ni awm e. Tichuan, Tv Chalbuanga khan a Nupui tura an biak fel vek tawh chu a thihsan bawk a ni.



An innghahna ber, mipa awm chhun Chalbuanga a thih takah chuan, a chhungte chu an khawhar zual hle a. Nakinah chuan Hmunhmeltha atangin Pathianthu awih hmasa ber Chawnghnuna chuan Khuallutthangi chu nupui atan a rawn rim ta a. A chhungte chuan an inneih tir ta a. Hmunhmeltha ah hian Khandaih tihduhdahna avanga pem lut an awm hlawm a, Rev Zairema pa Pu Doliana te, Tekrawiha (Upa) te, Suakdaia te, Chaleka te, Rualkhuma te, Famthangi te leh Chhuanbuanga te an ni. Martar Chalbuangan a lo sawi lawk tawh chu a takin a lo thleng ta a lo ni reng mai a. Chawnghnuna te hi sa la thei tak, khawsa thei tak an ni a. Nupui a neih hnu hian lehkha te zirin Khawchhiar ah a tang nghe nghe a ni.



Vanphunga khua ah chuan Kristiante tihduhdahna chu a la hluar sauh sauh a. Tichuan Martar Chalbuanga nu Famthangi te chuan, an makpa Chawnghnuna te awmna lam, Hmunhmeltha khua ah chuan pem an tum ta a. Zanah bungrua nen, a ruk thei ang berin an chhuak a. Hmunhmeltha an panna kawngah hian, an hma lawkah Keipui a kal zel a. Chutia Sakeiin an hma a hruai chu, Famthangi chuan, “Pathianin min hruai turin a rawn tir a niang” tiin, thlamuang takin an kal theih phah a ni awm e.



Khandaih lal Vanphunga leh a hoten Kristiante an tihduhdah hi, tun hnua ngaihtuahin an demawm viau a ni mai thei a, mahse khatih hun lai ngaihtuah kha chuan an dem awm lem lo ve bawk. Kristianna a lo luh khan, Fathang te an chhung lo a, Chawlhni ah hnathawk lovin an serh bawk a, lal thu aia ngaihpawimawh an nei ta bawk si. Kristianna khan Mizo khawtlang nun kha a rawn sawi danglam dawrh a, Kristianna chuan an nun kha a rawn ti chhia ah an ngai a ni.

 

Thlirna dang atanga thlir chuan, Khandaih lal Vanphungan khatiang taka Mizo sakhua leh culture vawnghim tura theihtawp a lo chhuah kha a chhuanawm tak zet zet zawk a ni. Kha tihduhdahna avanga Kristian pem chuak ten khaw dangah Kristianna an pu darh zel te kha Pathian rem ruat zawk a nih a rinawm hle a. Vanphunga kha Pathianin hmanruaah a hmang mai zawk a ni. A hnuah Vanphunga pawhin Piantharna duhawm tak a chang zui ve leh ta nghe nghe a, a hovin Krismas te an hmang a, Kristiante thlamuantu a ni zui ta zawk a ni.



Khawkhat tlangval fel leh tlawmngai Chalbuanga, a pa thih hnua an chhungkaw innghahna, mipa awmchhun chu Krista vanga tuarin Martar mahse, a chhungte leh an thlahte chu Pathianin a awmpui zel a. Pathian leh a Kohhran tan mi tinawm tak tak an ni zui ta zel a ni. Khandaih Kohhran kal zel, tuna Phullen Kohhran ni ta chuan Biak In tualah Martar Chalbuanga pual hian Lungdawh mawi tak “MARTAR CHALBUANGA LUNGDAWH”  an siam nghe nghe a ni.




*********************

Saturday, June 23, 2018

FIFA 1994 WORLD CUP PHULLEN AH ROPUI TAKIN KAN DAWNG


FIFA World Cup vawi 15-na 1994 World Cup kha June ni 17 aṭanga July ni 17, 1994 chhung khan khawvela Football thiam zual ram 24 ten America ramah an khel a nih kha. Kha ‘94 World Cup khan, a hma a World cup lo awm tawhte chu kawng hrang hrang a rawn khumin, World Cup Record tam tak a siam a nih kha. Mahse, chu lam chu sawi tam vak lovin, Phullen in kan lo dawn dan lam kan thlur deuh zawk ang.

Kha FIFA ‘94 World Cup kha Phullen in kan khuaah ngei FIFA World Cup kan hmachhawn hmasak ber a nih laiin, kan ngaihsan Maradona hun hnuhnung a ni tlat mai a, a hrilhhaithlak ang reng hle. Chutihlaiin, Germany – East leh West inzawm hnua World Cup an khelh leh hmasak a nih thute, USSR keh darh hnua Russia anga an tel vawikhatna a nih thute, Colombia player nungchang ṭha “the Gentleman” tia an koh fiam, anmahni lama a tih goal vanga an kah hlum tak Andrés Escobar chanchinte, Bebeto nau awih dan zir velte pawh kha, sawi tur a tam a, sawi zui lo mai ang.

World Cup thleng tur khan FIFA chuan khawvel ram ropui USA kha Ni 4 July 1988 daih tawh khan a thlang fel diam tawh a. Chutihlaiin, World Cup Committee Phullen erawh chuan chawpchilh takin Upa J.Ngurchhawna Kawt (Pu Ngura Stadium), Diakkawn, Phullen chu a thlang ve hmiah thung. USA ah chuan khawpui 9 ah khelin World Cup history ah a vawikhat nan Indoor stadium (Pontiac Silverdome Stadium) ah te khelh a ni a. Kan khua Phullen ah erawh Pu Ngura Stadium ah Opening atanga Closing thlengin nghah tluan parh a ni thung. A thlengtu Upa J. Ngura te hian an tlin hle a, an inpekna a chhuanawm ngei mai.

Opening Ceremony te kha aw! June ni 17 a Chicago's Soldier Field, USA ah President Bill Clinton-a hovin, Germany Chancellor Helmut Kohl te, Oprah Winfrey te nen ropui taka hman a ni a. Diana Ross-in zai paha field dung zuia tlanin, goal ruakah ball pet luh ṭhelhin, Goal ban a rawn tlu der vel a, chumi hnuah Opening Ceremony Dawhsan (Dais) mawi eltiang mai chu a rawn hawng a nih kha. Khatih lai khan Phullen lamah pawh kan VCP thar (June ni 3, 1994 khan VC Election result puan a ni) Pu R. Lalchhanhima te, VC member Pu C Lalfamkima (RIP) te nen Pu Ngura Stadium, Diakkawn ah World Cup kha phur takin kan lo hawng ve a nih kha.

Han sawi zau hret ila. Khatia, World Cup khel tura Football thiam zual ram 24 te an inzir tluk tluk lai leh a thleng tur leh a en tura Khawvel a inpuahchah mup mup lai khan, keini khua Phullen pawh kha nasa takin kan inpuahchah ve a. Hlo thlawh lai, hna tul lai a ni a, a hmuna USA a en tura kalchilh hman lo kan tam bawk si avangin Phullen chuan kan pualin World Cup Committee din a, Upa J. Ngurchhawna Stadium a World Cup nghah mai kha a rel ta kha a ni a. Khami ṭuma World Cup Committee Phullen te chu hengte hi an ni-

1. Chairman : Pu C. Lalfamkima (VC Member)
2. Vice Chairman : Pu Zahruaia (Khawtlang pa rawn)
3. Secretary :  Pu J. Pachhunga (YMA hruaitu hlun)
4. Asst Secy : Pu KC Zahmingthanga (YMA hruaitu hlun)
5. Treasurer :  Pi Lalramliani (MHIP hruaitu hlun)
6. Fin. Secy : Pu YS Singh (High School Teacher)

World Cup hi thlen mai mai a harsa a. Kan dawn vawikhatna a ni bawk nen, World Cup Committee Phullen pawh a ṭang hle a. Fur lai a ni a, World Cup Committee Phullen chuan a hmun (Pu Ngura Stadium) ngei a World Cup entute chu ruah do lo a, hul phianga inkhel entir ngei a tum tlat a. Pu Ngura Stadium chu cheiṭhain, Hulhliap (Pandal) zau zet mai a zar hluap mai a. Stadium a diak lutuk loh nan Thingphek in a dawh kang bawk a. Chutah chuan YMA thutthleng engemaw zat rem khah vek a ni a, VIP te leh a thlengtu te ṭhutna tur bikte siam vek a ni.  USA, Pasadena hmuna Rose Bowl stadium chu tiat lo mahse, entu engemaw zatte chu berh lo leh hul phianga awm thei tura duan a ni a. Mahse the Greatest Show on Earth a ni miau a, USA ang bawkin Pu Ngura Stadium hulhliap hian a daih seng bik meuh lo a ni.

World Cup meuh thleng tur chuan mamawh a tam a, FIFA atangin pawisa dawn a nih loh avangin Sponsorship zawn a ni a. Kha 1994 World Cup Phullen, main Sponsor atan khan Food & Civil Supply Deptt, Aizawl chu, anmahni dil leh hriattir lawkna pawh awm em em lem lovin, thlan an ni tawp a. F&CS hotupa kan tlangdunga lo zin remchang hlauh chu lehkha hawn tir nghal a ni a. Main sponsor hnenah hian, Phullenin tluang taka World Cup kan thlen theih nan leh inkhel en a khaihlak loh nan Generator a hman tur Petrol dil a ni a. F&CS Deptt lam pawh, World Cup meuhin sponsor tura sawm an ni chu an lawm thiamin an hlimpui hle a ni awm e. World Cup atan hian Petrol Litre 20 zet min rawn pek bakah, World Cup Committee te Thingpui lumna vel senso turin pawisafai Rs 200 (za hnih) zet min rawn pe bawk a ni. Main sponsor chungah hian World Cup Committee a lawm hle a ni.

Khawvel huap thil a ni bawka, main sponsor bakah sponsor tu dang pawh an awm nual a. Kohhran pawh an bang thei bik lo. 1994 World Cup Phullen atan hian Phullen Presbyterian Kohhran chuan Generator a thawh a. Tin, kan BDO chhuan em em Pu K.Lalthawmmawia MCS (tuna IAS nit a) khan a Generator a thawh bawk a. Kan mamawhna hriain, kan khawchhuak mi tangkai Pi Lalenghluni Zarkawt  chuan a Generator min hman tir bakah YMA neih zui turin min pe zui bawk. Tin, World Cup enna Pu Ngura TV a chian loh karlaka hman turin kan Bialtu Pastor (Presbyterian) Rev A.K Dawia chuan a TV chu a thawh hmiah bawk. World Cup Committee Phullen in hnehsawh taka 1994 World Cup a dawn dan hian fak a hlawh hle a. Mizoram chanchinbu lian Vanglaini meuh pawhin a chhuah chhawng hial a nih kha.

World Cup Committee Phullen khan ruahmanna siam leh mipui han chawh phur kha an thiam em em mai a. TV lama Commentator aimaha zei leh ngaihthlak nuam zawkin Pu Ngura Stadium aṭang khan Aurinna hmangin Live Comment neih thin a ni a. Khami ṭuma commentator te kha YMA lama kan mi chhuanvawr Pu KC Zahmingthanga leh Pu J Pachhunga te an ni nghe nghe a. Kan khaw chhung Tournament vela lo comment thang an ni bawk a, an zeiin an hna an tlin ngei mai. Mahni ṭawng ngeia World Cup comment ngaihthlak kha mipui ten kan tangkaipuiin, a hlimawm tak zet. Mizo ṭawng ngeia World Cup Live comment pe hmasa ber kan ni hial mai thei.

Commentator te khan an tlin em em a. Puan tur ṭul an puang zung zung bawk a. FIFA lamin inkhelh dan tur Fixture a siam sa te kha, tunlai angin ziaka hmuh mai mai tur la awm ve hek lo, FIFA in inkhel tur ram leh an inkhelh hun a ruahmante chu, Phullen World Cup Committee in a ruahman angin Commentator te chuan mipui hmaah chuan thiam takin an puang mai ṭhin a. Zan reiah te khelh a nih avangin mipui kan rim ve hle a. Knockout stage chinah zan zawn zat ni lo va, zan awl a awm ta zeuh zeuhte kha, mipui kan chauh lutuk loh nana Phullen World Cup Committee in a ruahman a nih thute chu aurinna hmangin hlimawm takin an puang zel a. Nu leh pa tam tak chuan kha ruahmanna kha ṭha an tiin, Phullen World Cup Committee te an fak thin hle.

Tin, July ni 6 kha MHIP Day a ni a. World Cup lai ni mahse, MHIP members ten hlim taka Day an hman theih nan, inkhel awm tir lovin World Cup chu chawlh lailawkpui a ni anga, Ni 8 zanah chum zawm leh a nih tur thu Phullen World Cup Committee Secretary in Pu Ngura Stadium mipuite hriat tura an puang chiah mai phei kha chu MHIP member te pawh an lawm hle. Group Match a zo a, Round of 16 khelh hma chawlh lailawk awm, MHIP Day nen a lo in nang kha, Phullen World Cup Committee ten thiam takin MHIP Day vanga awl tir angin an puang a. MHIP member tam takin World Cup Committee te ruahmanna that zia leh MHIP te an ngaihpawimawh zia hahipin an sawi zui a ni.

World Cup huaihawttu FiFA leh World Cup Committee Phullen te kha, mahni tawkah an buai em avangin mahni seh seh mual hranah tiin, an inrawn tawn lutuk lem lo a. Ruahmanna engkim peih a nih hnuah FIFA hnenah chuan Phullen in World Cup kan thlen dan chungchang chu World Cup commttee Phullen hmingin ziaka thawn a ni a. English leh French ṭawng a thehluh tum a ni na a, Phullenah French ṭawng thiam kan awm mai loh avangin English chauh a thawn a ni ta a. Hei pawh hi Dak a thawn a ni a, a thleng chiah em tih hriat zui a ni ta lo.

World Cup Phullen a buaithlak deuh ber chu, mipui khati zat fuankhawmin TV hmai zim ve tak mai kan thlir ṭhup kha a ni. A hnunglama Nuho ding leh duhberte nena a thim chin deuha dingte phei kha chuan, TV kha an hmu thei kha a ni deuh mai a. A sen lamin an ti goal leh tawh tih vel kha a tam zawk sawi dan a ni. Mahse, World Cup boruak hi chu a namai lo a, heng players lar tak tak – Maradona, Carlos Valderrama, Bebeto, Cafu, Claudio Caniggia, Gabriel Batistuta, Jürgen Klinsmann, Lothar Matthäus, Rudi Völler, Oliver Kahn, Josep Guardiola (Coach lar ni ta), Luis Enrique (coarch lar ni ta), Paolo Maldini, Roberto Baggio, Gianfranco Zola, Roy Keane, Ronald Koeman, Frank Rijkaard, Dennis Bergkamp, Edwin van der Sar leh rawl thar duhawm Ronaldo (Brazil) te pawh kha an hming kan lam ri ve nak nak thin a.

Kan han tang tak tak kha chu, mahni khaw A-Team a substitute pawh ni pha ngai hlei lo khan, players ropui leh lar tak tak, match khata Goal 5 khung thei Oleg Slanko te leh top scorer a nih pui Bulgaria thiampuipa Hristov Stoichkov te bakah Top Scorer ni pha lo chunga Best Player ni thei Romario te, Silver ball dawngtu Italian striker hmingthang Roberto Baggio te, Best Young Player Marck Overmars te leh Champion Team captain Dunga te, football thiam chungchuang Maradona te pawh kha, kan duh khawp lo lek lek fo thin a. Kan lo au nasa in, tih dan tur kan lo hrilh ve nasa thin a nih kha. Maradona mawlh mai kha, damdawi vangin hnawhchhuah a ni ta mai kha kan va ui hlawm tak em!

Kan khua hi Lo nei a eizawng, thalai pang dam tan in a awm zahthlak an tih thin na khua. Feh kawnga Beramno leh Halleluiah Chorus sa liam vung vung thin kan ni a. Hlo tlawh lai a ni a, zing dar 3 hnu lamah te inkhelh a zawh pawhin, a tukah feh a kham ngai chuang lo a. Tlai var zak zak mah se, feh kha thulh tumna an nei lo. Nl V. Lalramhluni (Tuna Teacher nit a) te thianho inlawm pawh, hlo thlawh hmain an inbual harh phawt zel a ni awm e. World Cup inkhel hmaih miah chuang lovin Hnuhpuite kha kan thlo zo thak hlawm a ni.

Ni 17.7.1994, Final zan mawlh mai kha. Khawtlang mipui ten hnuhpui kan thlo zo tawh bawk nen, engto em em awm lovin Pu Ngura Stadium kan pankhawm a, kan phawklek a ni ber mai. Qualifying round a tling hram hram Brazil leh goal inthlauhna hmanga Group stage paltlang hram hram Italy ten Final an khel a nih kha. An thiam tih inhre tawn, chak loh hlau fimkhur lutuk khan inkhel a ti hmuhnawm loh lek lek zawk hial. World Cup final a hun pangngai leh hun pek belh thleng, Minute 120 chhunga Goal luh miah loh vawi khatna a ni a, a vawi khat nan Penalty hmangin World Cup Final chakzawk zawn a ngaih phah ta a nih kha.

Kha Penalty kha Champion leh champion loh hriltu a ni leh zual a, a boruak sang ngei mai! Romario leh Roberto Baggio te mitthlaah an lo lang zut zut a. World cup super star Roberto Baggio an Italy tan Penalty a’n pet over tlat mai kha a va pawi tak em!  Italy ṭantu leh Banbun a Baggio hming lo phiar a, lo bun ve far tute mittui a hnam. Brazil erawh an thiampuipa Romario ten an khung zat zat mai si a, 3-2 a chakin World Cup vawi 4 Champion thei awm chhun an nih phah ta a ni.

World Cup lai khan, inkhelh zan apiangin thawhkhawm lakkhawm thin a ni a. Chu chu Petrol man leh tul dangah hman thin a ni a. Kan khaw nu leh pa thenkhat phei chuan World Cup kha keimahni chauhin kan dawng tak tak emaw an ti tak tak a. Vengthlang nula pakhat phei chuan Mikhual lo thleng har lutuk kha a lo mangang hman hial a ni. Mipui inpekna a tha hle a, inkhelh en zawh apiangin stadium seat (Thutthleng) kha Community hall ah dah fel leh thlap zel a ni.

Kum 1994 World Cup zet kha chuan khawtlang mipui min chiah hneh hle a. Inkhel zawng zawng enkim vek an awm nual a. Chung zingah chuan MHIP member senior Pi Lalsangi (RIP) te leh Pi Laltluangi te pawh an tel a ni. Kha World Cup zet kha chu, FIFA World Cup history ah leh Phullen History ah World Cup ropui ber ti a chhal a ni reng tawhin a rinawm.

Buata Bawihtlung

Thulakna:
Pu J.Pachhunga (FIFA 94 World Cup Phullen Commentator) leh World Cup entute titi.

Wednesday, January 24, 2018

ZORAM TLUANA MI RIANGVAI THANGTEEKA




Thangteeka hi rualban lo, chhungkhat laina sawi tur pawh nei lo, ringvai a ni a. A nu leh pa hming takngial pawh a hre lo a. A pian kum chu Thli chhe tleh kum a ni.  

Amah hi Piangsual, ke lek lam deuh a nih avangin a thatlai deuh pawhin kal pangngaiin a kal hlei thei lova. A kawng kal hi tlan deuh reuhin a petek euh euh thin a ni. Tum khat chu Aizawl ah miin Pheikhawk an lo pe a, a Pheikhawk thar bun chuan Durtlang lamah a kal ta a. Durtlang a thlen chuan a Pheikhawk thar chu a chhip a pawp hman tawh a ni. Chutianga pian dik lo chu a ni a, a lainatawm hle.

Chutiang a ni chunga kawng mumal lo leh fur khaw chhe karah pawh, khaw hrang hrang a tlawh kual reng tho a. Mi ten mak an ti hle thin a, Sapuiin a hruai thin a nihte an ring hial thin. Hmun thenkhatah chuan naupang ten an lo chhaih nawmnah chang a tam a, chutih rualin, amah lainata, duhsaktu pawh a tawng ve zel bawk.

Chutianga khaw hrang hranga a awm kual hnu chuan Phullen chu nuam a ti hle a ni ang, Phullen a thih a, Phullen a lunghah a duh thu a sawi a. Phullen tlangval leh pa ho chuan Phullen ah hruaiin an zawn haw ta a. A pualin Lailak veng, Pu Hmingthanga In bulah a In tur an sak sak a. Tah chuan awm ve in, khawtlang mipui ten Buhfai te an khawn khawm sak a, eitur an pe thin a ni.

Phullen a In a neih ve hnu pawh hian khaw thenkhatah chuan a la zin zauh zauh a. Tum khat chu Chhawrtui khua ah coat an lo pe a. Chu coat chu a buang, fual lam deuh a ni nghe nghe a.  Chu a coat dawn chu ama mamawh lei nan pawisa a chantir kha tha zawkin an hriatsak a, Rs 20 (sawmhnih) laiin an lei chhawn sak ta a ni.

A pian dik tawk lo vang hian a mu te hi thawh a harsat a.  A upat deuh hnu phei chuan kal a harsat zual a, tlangval hovin an riahpui thin a ni. Vawikhat chu, Pu Ralzinga leh Pu Lalbuanga ten an riahpui a. Zan ah a zun a chhuak ta, a tho mai thei si lo, “Tlangval te u, ka zun a chhuak e” a ti a. A riahpuitute kha an lo mutui deuh a ni ang, an hre thei si lo. Kawmchhak pa chuan a lo hria a, a zuk kai tho ta a ni awm e. Chutiang chuan thenawm khawveng nula tlangval ten an ngaihsak hle a ni.

Thangteeka hian Kohhran a belbul hle a. Kohhran inkhawm a thulh ngai lo a ni. Mahse a ke dik loh deuh vangin a kal tha thei vak lo va. Tlangval hovin a inkhawm turte hi an zak zeh a, an kalpui nawl nawl thin. Biak In ah pawh Pulpit hnung lam deuh ah chuan thutna chuam bik a nei a, a thlen tlai pawhin chulai chu a pan vang vang thin. Bible hi a kawl reng thin a, a Bible chhiar erawh a awmzia hriat fiah hleih theih a ni lo.

Chutianga hun a hman hnu chuan, kum 1947 October ni 23, Nilaithawhtan khan chatuan ram a pan ta a. Thangteeka thih ni hian, mak tak maiin, khua a chhe nasa hle a. Thli a tleh hum hum a, nasa taka ruah surin, khua a cheng a, a hrehawm hle a. Tlangval thlan lai tan pawh Thlan khur pawna awm kha a hrehawmin taimak leh tlawmngaihna zawkah ngaih hial a ni. He a thih ni a thli tleh hian Kawlthei hnah leh thing hnah dangte pawh a len fi thulh nghe nghe.



Thangteeka a thih hian, Phullen tlangval leh pahote chuan a puala Thlan lung tha tak phunsak an tum a. Nula leh tlangval ten Thangteeka lung dawh tur hi an la a, phur tak leh hlim takin an zawn haw a, an haw haw hulh hulh a ni. A thlan lunga thu ziak dah tur pawh Upa Zalawra (Sande Sikul lama mi lar tak) hian phai ah a thwn sak a. Tichuan a thlan a thu ziak chu thir phekah reh thei lo turin thil var phum hmangin tha takin an ziak a. Kum 1948 khan Phullen YMA chuan nalh leh mawi takin Lung a phun sak ta a ni.

Thangteeka Lungdawh ah chuan a hnuaia thu ang hian ziah a ni a, a laiah Kros lem mawi tak ziah lan a ni bawk –

ZORAM TLUANA MI RIANGVAI
THANGTEEKA
KUM 76, THIH NI : 23.10.’47

Kuta sak loh chatuan In chu
A tan buatsaih a ni.

LUNG PHUNSAKTU:-
PHULLEN
YOUNG MIZO ASSOCIATION
(Y.M.A 1948)

A pian kum hi Thlichhe tleh kum tih a ni a. Thli chhe tleh kum chu 1876 a ni a. Mahse a Lungdawh ah chuan kum 76 mi niin ni 23.10.1947 ah a thi tih ziah a ni a.  Thli chhe tleh kum a piang a nih chuan kum 72 mi ni awm tak a ni. Thlan lung phuntu Phullen Branch YMA te hian Thli chhe tleh kum hi an hai nge a kum zat hi an chhut sual palh zawk tih chu hriat mai a harsa deuh.

Thangteeka Lungdawh hi tunah Phullen daiah a la awm a ni.



Buata Bawihtlung
Dt. 6th July, 2017


*******************

Monday, January 22, 2018

MAWMRANG TLANG HUAI LAL SAHMULA





     Kan pi leh pu te atangin Ramhuai chi hrang hrang an sawi kan hre awm e. Ramhuai zingah hian mihringte tina thin leh nunna hial laksak thin an awm laiin, Ramhuai fel tak tak, mihringte malsawmna pe thinte pawh an awm bawk.

        Mizo pi leh pu ten Ramhuai an sawi thin hrang hrangte chu, a vai chuan kan sawi seng lo vang a. Ramhuai tam tak zingah Lasi, Khuavang, Maimi, Tau, Khawhring, Phung, Chawm leh Huai te hi hriat an hlawh viau. Huai kan tithe pawh hi Tui huai, Tlang huai, Sih huai, Bung huai te an awm ve leh bawk a.

        Mizoram a tlang huai zawng zawng zingah Mawmrang tlang huai lalpa Sahmula chu a thu ber leh huai ber a ngaih a ni. Mawmrang tlang hi Aizawl atanga hmar chhak lamah a awm a. Mawmrang chhim lam tlang chhip ah hian Lungpui tohlawt lianpui, fai vuk mai hi a a awm a. Chumi chung zawl chu thing vel to lovin phul te a awm a, a fai nuam hle a. Chulai chu Mawmrang tlang huai lal Sahmula tualchaina niin an ngai a, Sahmula Tual tih a ni.

        Sahmula pa hi Sabereka a ni a, Sabereka pa chu Belebuta a ni a, Belebuta pa chu Tuanlehmanga ni a sawi a ni. Sahmula hian fanu a nei ve a, a hming chu Lengthuampuii a ni awm e. Sahmula hi a huai hle a, ramhuai dangten an zahin an hlau hle a. Mihringte pawhin tihlungawi loh an hlau hle thin a ni.

        Hmanlai hian Reiek tlang huai hote chu, an lalnu Khawluahlali hovin Tlawng huai nena an  indo zo, hnehna lawmin chawng an chen a, an lam mup mup a. Chutih lai tak chuan thlang lam atangin Chhawrpial  Tlang huai ho chuan Reiek huai ho chu run an tum a. Reiek thuai ho awmna lungpui lian tak takte chu tih chim vek tumin a rukin an bei ta tluk tluk a. Chu chu Belkhai Tlang huai chuan a lo hre khiau a, Reiek Tlang huaite chu a khawngaih a, a hrilh ta a.

        Chutia an chawngchen hlim laia an awmna Lungpui kar chim vek tuma Chhawrpial tlang huai ten an lo bei chu an thin a rim a, Reiek huai ho chu Sialsir ah changing an thlawk chhuak a. Chhawrpial huai ho nen chuan vansang indona rapthlak tak mai chu an nei ta a. Thisen nasa takin a far a, Lu bung leh thla tliakin an tla a, an let rem rum a. Reiek Tlang huai lalfanu Darthaikawii pawhin nunna a chan phah a. An sal mante hnanga an phuar theih loh nan tiin Belkhai huai ho chuan chu lai Mau ho chu a chang vet chhuak chiatin mit a neih tir vek a. Hei hi tun thlengin a la ni zui zel a ni awm e.

        Chu indona rapthlak tak chu tlang huai lal ber Mawmrang tlang huai Sahmula chuan a lo hre ta a, tha a ti lo hle a, tawp turin a ti a. Mahse an indo nasa mai si a, an tawp mai thei lo va. Chutah Samula ngaihdan a ni ta lo va, Reiek tlang leh Chhawrpial tlang te chu a sai ta dum dum a, a hek huai nghe nghe a ni awm e. Chutia Sahmula a thinrim tih an hriat chuan, Reiek tlang huai leh Chhawrpial tlang huaite chu an indo chhunzawm ngam ta lo va, an tawp san ta a ni an ti.

        Mawmrang tlang atanga hla vak lo Zawngin leh Phullen ram inrina bul ah hian Lungleng kham a awm a, a bulah Tuivawl lui a luang bawk a. Zawngin ram ah hian Puk huai lalpa Melmula a awm a, Zawngin nula hmeltha Siami chu neih tumin a rim thin a ni awm e.  Tumkhat chu, Lungleng kham Huai ten Tuivawl tiau pho a an fate Ni lum ai tira an pho chu, Zawngin khaw pasaltha ramvak ten an rah hlum sak hlauh mai a. Lungleng kham huai te chu an thin a rim ta em em a. Phuba lak ngei duhin, mihringte chu tihlum ve ngei an tum a.

        Lungleng kham huai te chuan Puk huai lalpa Melmula chu an berawn hmasa ta a. Melmula chuan, “e Mihringte thih leh dam thu te chu, keia rel theih rual a ni lo ve, Mawmrang tlang huai lal Sahmula rawn zawk rawh u” tiin a lo hrilh a. Sahmula chu an pan ta a.

        Mawmrang tlang huai Sahmula chuan, Lungleng kham huaiho henah chuan, “mihringte hmuh theih lohin in insiam a, an kalna tur takah infate in pho bawk si a, an rah hlum mail oh nakah. Mihringte thiam loh pawh a ni lo, in fimkhur loh vang zawk a ni” a ti a. Lungleng kham huaite chuan Sahmula chu an hlau hle a, mihringte chungah phuba lak an tum pawh chu ti ngam ta lo a ni awm e.

        Hetiang hian ramhuite chanchin hi sawi tur tam tak a awm a. Mawmrang tlang huai lal Sahmula hian chanchin a ngah hle a ni. Sahmula tual bul velah hian Purun a awm a. Chu chu tuna Mizo purun ang hi a ni a, chu chu Sahmula purun an ti thin. Tin, Sahmula tualah hian Zawhte ki nei a awm a, a hmu apiang chu an thi zel thin niin an sawi thin bawk.

         Mizoram a Kristianna a lo luh hlim deuh 1903-ah Mawmrang Tlang bul Vanphunga khua Khandaih (Tuna Phullen ni ta) ah hian Kristianna a lo lut ve a. Sikul te dinin Kristian an pung zel a. Kum 1906 ah Khandaih khuaah chuan hri a leng ta hlauh mai a. Tui hri a ni awm e. Hei hi Kristian lote chuan Kristian te vanga lo thlengah an ngai tlat a. Kristian ten Ramhuai lal Sahmula an ti thinur niin an ngai a ni. Zosapte leh Sorkar lam ten hrileng tih reh tuma Tuikhura damdawi an phul te chu hre thiam lovin, Kristian te hian min hrai hlum an tum a ni ang tiin khaw thar kai an rel phah hial a ni.

        Heng ramhuai te leh an chanchinte  hi a thawnthu viau na a, kan pi leh pute atanga an rindan leh an hriat dan an inhrilh chhawn zel a ni a. Kan awih emaw awih lo emaw, a ngaihnawm bakah a hlu ve riau.

Buata Bawihtlung
9862035204, buata.tkt@gmail.com

Wednesday, January 17, 2018

NAIK SABINGA CHANCHIN

By – Buata Bawihtlung, on 4th March 2015
Mob: 9862035204

Sabinga Lung hi Aizawl Upper Khatla ah a awm a.  Rual u deuh te chuan an la hre viau na a, thangtharte zingah erawh hre lo kan tam ta viau awm e.

Sabinga hi Khandaih khua Thangphunga Bawihtlung fapa a ni a. Khandaih hi tuna Phullen khua ni ta hi a ni. A unaute chu – Lalbonga, Hrangkunga te an ni. France ram kal zinga sorkar hriat hlawh khawp a hming  chher, Indopui zawh hnu pawh a British sorkarin lawmman atan a pawisa fai a pek zui leh hial, Mizo tlangval tlawmngai, Mizo zinga sipai tang hmasa, sulsutu chhuanawm tak a ni.

Indopui Pakhatna 1914-1918 lai, kum 1915 chawhnu lamah British War Committee, a hnu a ‘War Cabinet’ tih zui tak khan, France ram khawthlang lama hnathawktu indaihlohna chuan an ral dona kawngah nasa takin nghawng a nei thei dawn tih an hria a. Kum 1917 ah Lushai Labour Corps chu din a ni ta a. Aizawl (Aijal) atangin Mizo (Lushai) 2100 zet te chu France ramah hian an kal ta a ni.

Labour Corps te hi Sipaite tanpui tu tura din an ni a. Thil tul hrang hrang, eirawngbawl, sipai mamawh thiar kual vel te, indona a sipai thite ruang senghawi te, kawng laihte leh thil tul awm ang angte an thawk thin a ni. Lt. Col. Mayfair a kaihruainain Lushai Corps hian kum 1917 June thlaah Marseilles an thleng a, an zingah hian Rev. D.E Jones (Zosaphluia) pawh a tel ve nghe nghe a, ani hian tawng te a let a, a zirtir bawk a, a tangkai hle a ni awm e.

Chutianga ral hmatawnga kum khat chuang an awm chhung khan, Lushai Corps (Mizo) zingah mi 71 vel zet ten nunna an chan a. Kum 1918 May thla ah Mizoram panin an lo let leh a, June 1918 ah Lushai Hills an lo thleng leh a ni. France ram kal zingah hian Sabinga hi a tel ve a ni.

Sabinga hi pa lian lam deuh, tlangval fel leh pian tha tak, hmel pawh tha ve tak a ni a. France ram kal Mizo tlangval rual 2100 zet zingah infiamna lamah Sabinga hi a thei ber (Champion) a ni thin. A rem hriatna leh a felna te, a tlawmngaih leh taimakna avang chuan an hotute pawhin an hre hle a, thil tihna hrang hranga a kaihruaitu pawlah a tang deuh zel thin. British sorkar pawh chu a chungah a lawm ve hle a ni ang, Indopui pakhatna  zawh hnuah lawmman atan Rs. 850/- lai Sabinga hi a rawn pe leh a ni.

Sabinga hi tlangval lai pawhin, chak leh tlawmngai thei tak mai, an khuaah pawh inbuan chak a sawi a ni ve a. Tum khat chu mikhual tlangval nen an inbuan tir a. Sabinga chuan hneh ngei tura an ngaih laiin, a hneh ta tlat lo mai, mak an ti hle a. A thian ten, “tinge kha mikhual tlangval kha i hneh loh mai le, i hneh ngei kan lo ring a sin, ava mak ve maw le!,” an ti a. Sabinga chuan, “Khai a, fahrah a nih kha in hre na nge?” a ti mai a. Kha mikhual kha a rukin fahrah a ni tih a lo hre sa a, chuvang chuan ngawi rengin lo hneh lo der hi a lo ni awm a.

France atanga an lo haw hnuah Khandaih khaw nula hmeltha Zazawni nen inneiin fa pakhat an nei a. Vanduaithlak takin an fapa chu kum hnih mi lekin a thi ta a. Chutia a fapa a chan ta mai chu a lungleng hle a, Aizawl lamah a kal leh ta a. Zazawni nen pawh an inthen zui a. Chutih lai chuan Aizawlah sipai an la a. Sipai latu Sibudar hnenah chuan “Kei pawh Sipai ah ka tang ve duh asin” a ti a. Sibudar chuan, “i duh a thu a ni mai lawm, kan hrechiang che a, i tan dawn chuan i intlar ve a ngai lo,” a lo ti a.

Kum 1922-ah India rama Paramilitary force upa ber Assam Rifles chu a zawm ta a. France rama an awm laia a chet that avangin Sap ho khan an hre chiang a, in tlar ve lovin Assam Rifles-ah chuan a lut ta a. Sipai a a luh hnu hian infiamna leh thil dang dangah pawh a fel leh hmingtha pawl tak a ni zui zel a. Lance Naik a ni nghal thuai a.

He tih laia Mizo sipai tangte hi Rumliana etc te an ni a. Sipai inkhaihhruaina an zawm tha viau lo a ni mai thei. Kha tih laia Lushai Hills District (Mizoram) awptu, Superintendent hmasa ber Major J. Shakespeare-a chuan Assam IGP, Shillong hnenah chuan, “Mizo te chu discipline nei lo lutuk, Sipai a tang tlak pawh an ni lo” tiin kum 1933 khan lehkha a thawn a. Assam IGP chuan a hmunah amah ngeiin rawn enfiah a duh ta a.

Kum 1933-ah Assam IGP chu Aizawl ah a lo kal ta ngei a. Assam Rifles te hi IGP hnuaia awm an ni a. A lo kal lawmnan ‘Mizo Football Team’ leh Vai (Gorkhali) Team te chu Football khel tura tih an ni a. Capt. Robertson-a chu Referee a ni a. Sabinga chu Mizo Football Team Captain a ni.  Inkhelh hmain Mizote hi an infuih lawk nasa hle a. Mizo leh Vai inkhel a ni a, chak ngei ngei an tum a. Chak loh ai chuan in seh te pawh huam mai turin an infuih lawk a. Tin, an zingah hliam na an awm palh pawhin a enkawlna tur an thawh khawm anga Shillong ah an in dah tur thu Jemadar Bawihchhungan a puang hmiah bawk.

Mizo Football Team te chu 2-1 in an chak ta a. Inkhelh laia Mizote huaisen zia te, an tumruhna te, chak tura an nawr nasat zia te leh an ralhrat (Aggressive) zia chu IGP chuan a hmu ve vek a. Mizote sipaia tang tlak kan nih leh nih loh enfiah tura rawn kal Assam IGP chuan, “Mizote hi hnam huaisen an ni a, Sipai huaisen a an sawi Gorkhali pawh an ngam a nia, sipai a tang tlak an ni, tunah hian Mizo atangin Sipai 50 dang kan lak belh leh ang” a ti ta hial zawk a.

Kum 1934 khan Mizo 50 te chu Sipai ah an lak belh ta a. Hei hi a huhova Mizote sipaia kan tan hmasak ber tum niin a hriat. Kha inkhelh avang khan a vawi khat nan Mizote a huhovin sipai kan tan phah a ni. Tin, kha mi tum a Mizo Team te kha, Mizo hming chawi a Football Team hmasa ber niin a hriat a. Chuvang chuan Sabinga hi Mizo Football Captain hriat theih hmasa ber a ni awm e.

Mizo tlangval 50 rual sipai a lut thar te chu hmun hnih a thenin, 1934 khan Sadhya-ah leh Kohima ah training tura tih an ni a. Lance Naik Sabinga pawh Naik ah a kaisang a, 2nd Battalion Assam Rifles, Sadhya-ah sawn a ni ve nghal a. Sabinga kaihruaina hnuainain Mizo sipai 25 te chu Sadhya ah chuan tluang takin an kal ta a. Mizo tlangval rual, a huhova Sipai lut turte chu ropui leh urhsun takin Mission veng Biak In ah an thlah hial a ni.

            Kum khat pawh a awm tlin hma, awm hmun an bengbel awrh tih ah Sabinga chu China ramri lamah enthlatu (spy) hna thawkin an tir a. Chutah chuan vanduaithlak takin thing zar, vur in a bawm khah luk, rit tak tliak chuan Sabinga chu a tlak ta a, a thluak tuamtu a thler a.  Tichuan February ni 28, 1935 khan Dibrugarh-ah a thi ta a ni.

Sabinga hi a hna ah a felin a tluang hle a. A unau (a pa u fapa) Thanghrima hnena a sawi dan chuan, “Kutze entu khan, ‘Holder i kai lo ang’ min ti ve ngawt a, mahse hei Holder chu ka kai ngei dawn chu a ni si a,” tiin Holder a nih ngei tur thu Pu Thanghrima a hrilh a. Mahse, Holder a kai hmain a thi ta hlauh a ni.

Mizo pa lar, sipai chhuanawm leh hmingtha, Mizo sipai rual kaihruaitu Naik Sabinga a thi ta thut mai chu Mizo ten mak an ti em em a, Aizawl khawpui a fan chhuak rang hle a. Mi ten an ui hle a, an sawi luai luai a ni awm e.

Sabinga chhungte leh 1st Assam Rifle leh 2nd Assam Rifle te tangkawp chuan ni 26.05.1935 khan Sabinga pualin Aizawl Khatla veng far hmun ah Sabinga Lung chu mawi takin an phun ta a. Sabinga Lung phun ni hian Sorkar mi lian leh Aizawl mi pawimawh hrang hrang, sipai lal te, Aizawl pastor leh Mizoram awptu lal ber Bawrhsap Major MC Call pawh a tel a.

Hav. Pakunga chu Bible chhiarin a tawngtai a, Sipai lal (Assam Rifle Commandant) A.L. Fell chuan Sabinga Lung khuhna British Flag chu urhsun takin a hawng a. Ropui takin Sipai danin zahna lantir chunga thlah liam a ni. Sabinga hi Mizo zinga British flag nena thlah liam hmasak ber ni a hriat a ni.

 He lung hi Assam Rifle Ex. Association chuan an tuaihnum zel a, Advisory Board, Tribal Art and Culture Mizoram chuan a humhalh zui ta reng a ni. He lungdawh hi tunah hian Upper Khatla, Aizawlah hian hmuh theihin a la ding a ni.


# Thu lakna leh biang biakte –
  ü  Pu B. Ngurchhawna, Phullen (Khandaih)
  ü  Pi Solfathangi, Tuikhuahtlang
  ü  Prof.JV Hluna, Sikulpuikawn
  ü  Pu B.Rothangpuia, Phullen (Khandaih)
  ü  Pu C. Nundanga, Chhinga veng, Aizawl.
  ü  The Lushai Brigade (without Lushai!) – by lushai_er
  ü  North East and the First World War – Pratap Chetri
  ü  Sabinga Lung – Hony Capt R. Lawma (MUP Tlangau)
ü  Mizo sipaia tang hmasa te chanchin tlem – C.Lalnunchanga   

Monday, December 11, 2017

ROTHAI PÛK KA LÛT VE TAWH

 
Rothai puk

Phingnu leh Phingpa


He pûk hi, a hming chu ROTHAI PÛK a ni a. Lungpui lian tak hnuaia awm a ni a. He Lungpui chung hi a zawl durh mai a. Lungpui chung zawl pharh duai ah chuan Ramsa mak tak lem pahnih a awm a. Chu ramsa pakhat zawk chungah chuan mihring ang tak, hmel hmai mak tak nei chu a chuang a. Fei ni awm tak keng a, hmanhmawh hmel taka an tlan lai a nih hmel hle nghe nghe.

He puk chung Lungpui zawla milem inziak hi, RAIRAHTEA thawnthu a, Chhawnabawraza Sakawr thlaki sen ruang duhsak taka an ei tir PHINGNU leh PHINGPA lem a ni e an ti. Phingnu leh Phingpa te hian Rairahtea tupa Rengtea chu Ramhuai turpai, Sakei anga inlar lakah an chhanhim a nih kha. He Lungpui chunga PHINGNU leh PHINGPA lem chu Art & Culture Deptt in a humhalh nghe nghe a ni.

Chu milem leh he Pûk hi engtik ațanga lo awm tawh nge hriat a ni lo va. Hemi bula khaw awm te hi kum 100 an awm tling tawh a. He khua a awmte hian, an hriat phak chinah an pi leh pute ațang tawhin he puk leh Lungpui chunga milem inziak hi a lo awm sa tawh a, engtik lai ațanga lo awm tawh nge tih hre pha an awm lo a ni awm e.

He Pûk hian ROTHAI PÛK tih hming a put chhan hi, a hming ațang pawh hian a hriat thiam theih ruak a. Hman lai huna Ro te chu Țhi leh Dar te a ni a.  He puk hi tun hma chuan tuna a lan dan ai hian a zau zawk a. A chhungah hian lutin, puk chhung chhuat chu an thai (hai) an thai a, Dar te, Țhi te an thai chhuak leh nawlh țhin a. Chutianga Ro hlu tak tak Țhi te an thai chhuah leh nawlh țhin avang chuan, beiseina nen an thai leh țhin a. Chuvang chuan ROTHAI PUK an ti ta a ni.

Helai hmuna lo awm hmasa te khan, he PÛK ah hian an RO neih hlu tak tak – Țhi te, Dar te an lo phum țhin a ni ngei ang. He puk hnuai lei hi an thai (hai) nasa deuh nge a hnuaia Tlumpi ten lei an khawih danglam nasa nge ni, Lungpui hi tun hma aiin a awp hniam a, leiah a tlum lut hret tih a chhehvel miten an sawi. Chuvang chuan he pûk hi a zimta sawt a ni awm e.

Kum 2012 vel daih tawh khan, Darlawn chhehvel a kan tihtur tizo chu zan kan riak a, a tuk zingah chhuakin, haw pahin nikhat chu hetiang vel tlawh hian helai vel khua hi ka fangkual a, Pûk te ka lût a, Lungphun hlui leh hlu tak takte ka tlawh a, ka va hlim ve chiang tak. Zinna vela hun awl neih zauh hi chuan, hetianga hmun danglam leh thil hlui leh hlu tlawh chhuah hi ka nuam tih zawng taka ni ve tlat.

Mahni chauh a kal erawh Thlalak a buaithlak duh deuh. Tunah erawh selfie stick a awm ta a. Pûk luhna ko ah Camera ka dah a (self timer), a luhna a zim si, Camera ti sawn lova Pûk a luh a har si, 10 seconds chhunga luh ngai bawk si. He Thlalak nei tura ka beih nasat zia kha… ka nuih a la za.  hahaaa