FAMILY HISTORY

MIN THLAHTU KA HRIATTHEIH CHINTE

1.  Chalchima

2.  Dothuama

3.  Thangphunga

4.  Lalbawnga

5.  Thanghrima (h/o Dohleii)

6.  Siamliana (h/o Chawngliani)

7.  Ralliandanga (h/o Rotuaki) 

Source:

1. B.Ngurchhawna, Phullen
2. Solfathangi, Tuikhuahtlang

3. B.Rothangpuia, Phullen


************************************

LALBAWNGA BAWIHTLUNG

-          Lalbuatsaiha (Buata Bawihtlung), 30.11.2016

        Khandaih lal Vanphunga Sailo Khawnbawl upa min Lalbawnga chanchin hi tam tak hre thei tawh lo mah ila, kan hriat theih chinah pa fell eh fing tak, rorel thiam tak a ni tih a hriat a. A chanchin hi a ngaihnawm hle.

        Lalbawnga hi chi leh kuang lamah chuan Bawihtlung hnam a ni a, Thangphunga Bawihtlung fapa a ni. Lalbawnga pa Thangphunga hi, Pasaltha huaisen Chalchima tupa a ni a. Chalchima fapa Dothuama fapa a ni. Tichuan Lalbawnga pa leh pu hriat theih chinte chu – Chalchima, Chalchima fapa Dothuama, Dothuama fapa Thangphunga te an ni.

        Lalbawnga thlahtu hriattheih chin te:

• 1.       Chalchima
• 2.       Dothuama
• 3.       Thangphunga

        Thangphunga hi Lalbawnga pa a ni a, Lalbawnga pian hun leh a pianna hmun hi hriat a ni chiah lova, Pawihbawiha Sailo fate Vanphunga Sailo te nen unau ang maia in en, inpawh tak an nih avang hian, Pawihbawiha Sailo khua atanga piang a nih a rinawm hle.

        Lalbawnga te unau hi pathum an ni a, chung a unaute chu -

1. Lalbawnga
2. Hrangkunga
3. Sabinga

        Lalbawnga fapa chu Thanghrima a ni a, a tute chu Siamlianate, B.Ngurdawla, Lalthangliani, Lalhliapi, Lalrintluangi, Solfathangi, B.Ngurchhawna, Mangthanga, Thangdaii te an ni a. Heng a tute hian tu leh fa thahnem tak an nei ve leh tawh bawk. Tin Lalbawnga unaupa Hrangkunga fate chu Pawibawiha leh Vuaiate an ni a. Pawibawiha hi Pu B.Taial pa a ni a, Vuaia hi Pu PB Lalauva pa a ni.  

        Lalbawnga hi pa fel leh fing tak, rorel thiam tak a ni tih a lanna chu Lal chhungkua ten an rin em emna hi a ni. Sailo lal chhungkua ten en hian unau ang maia inen an ni a. Lal ropui tak Vanphunga Sailo, Khandaih lal Khawnbawl upa min a ni. Lal rorelna kawngah a tangkaiin a thu lakna ber pakhat a ni a. Vanphunga Sailo chu a ropui em em a, a hausain ram a nei zau hle a, a hmei fate tih loh, a fate pawhin tlang hran an chang vek thei a ni.

        Vanphunga Sailo hian Lalbawnga hi a ring em em a. A lalram chhung Mawmrang tlang chung Luangpawn hmunah chuan Bawk khawh a Tlang hran chang ve turin Lalbawnga hi a ti ta a. Lal Vanphunga tirh ang chuan Luangpawn khua chu Lalbawnga leh a hote chuan Khandaih atangin an kai a. Hei hi kum 1909 ni a hriat a ni. Tichuan Lalbawnga Bawihtlung chu Luangpawnah chuan Lal in a thu ve ta a. Khang hun lai khan lal te chu Sailo an ni deuh vek a, mipuite pawhin an zah em em a ni.

        Hetih lai hian Lalbawnga chuan lal nih chu nuam a ti vak lem lo a. A rorelna kawngah harsatna nei lem lo mahse, lal thlah, Sailo hnam a nih loh bakah hnamchawm a nih avang chuan miten Sailo lalte ang tluk chuan an en tak tak thei lo tih chu a hrethiam vek a. Amah pawhin inthlahrunna a neih phah a. Tichuan Vanphunga Sailo hnenah chuan a hmeifa Lalbuaia Sailo chu a aiah Luangpawna lal turin a dil ta a.

     Vanphunga Sailo hian Lalbawnga dilna leh rawtna hi a uksak mai lo va. Lalbuaia chuan Hnamchawm tan lal nih chu a hautak a, an buai mai a hlau si a, na deuh zawkin Vanphunga Sailo chu a kar leh ta a. Vanphunga Sailo hnenah chuan, “Hetianga ka dilna min chhan loh a, i fapa Lalbuaia Vanbawnga a nu kianga awm mek chu Luangpawnah lala i rawn dah dawn lo a nih chuan, I unaupa Thangkama Sihfa lal chuan a khua a pem turin leh khawnbawl upa ni turin min sawm ve reng tho bawk a, ka pem zawk mai ang” a ti a. 

        Chuti taka Lalbawngan a ngen takah chuan Khandaih lal Vanphunga Sailo chuan, a fapa Lalbuaia Sailo chu kum 1912 khan Luangpawnah lal in a dah ta a. Tichuan Lalbawnga pawh chu Sihfa lama pem ta lovin Luangpawnah chuan a awm zui ta zel a. Lal te nen chuan inpawh takin an awm a, Khawnbal upa niin lal rorelpui tu ber a ni zui ta a. Lal thu leh ngaidan a dik tawk loh dawn pawh a khap ngam tu ber a ni a. Lal pawhin a ring hle a, an zah em em a ni.

Source : Biang biakte

Ø  B Ngurchhawna S/o Thanghrima, Phullen

Ø  Solfathangi S/o Thanghrima, Tuikhuahtlang

Ø  C. Nundanga S/o Hranga, Chhinga veng

Ø  Ngurthankima Sailo S/o Lalsavunga Sailo, Mission veng.

***************************

PU THANGHRIMA CHANCHIN

          Lalbuatsaiha (Buata Bawihtlung), 30.11.2016

Pu Thanghrima hi kum 190-ah a piang a. Chi leh kuangah chuan Bawihtlung hnam a ni a, a pa chu Lalbawnga a ni. Pu Thanghrima hian Pianpui unau pakhat a nei a, chu chu Zabiaka a ni a, Thanghrima aiin kum riat (8) laiin a upa zawk a. Zabiaka hi nu hran fa a ni mai thei a, mahse chiang taka hriat a ni lo. Zabiaka tu leh fate chu – Chalkhuma, Lalthara Luangpawn khuate an ni. Khandaih Sikul a Zirtirtu hmasa Hrangsaipuia fapa Pu C Nundanga, Chhinga venh chuan, Thanghrima u ah hian hmeichhia a awm a, a thi hma ta hlauh a, tih amah ka kawm tum ni 8.3.2015 khan min hrilh a. Mahse hei hi midang hre ve leh sawi an awm ka la hre lo.

Pu Thanghrima hi tlangval fel leh hmeltha pangngai tak, pianpui finna tha tak nei a ni a. Kum 1917 khan Indian Labour Corps zawmin France ramah a kal ve a. Ama sawi dan chuan, France ram kal tur a kum an bithliah zat chu a tling lo deuh a, mahse a kal chak em avangin a kum hi a zep then a, a kal ve thei ta a ni.

France ram atanga a lo haw leh hnu hian nupui a nei a, a nupui hming chu Dohleii a ni. Pathian malsawmna dawngin fa sawm leh pakhat (11) an nei a, vanduaithlak takin pahnih (2) thla kim vek a piang chu, an chhiat hlauh a ni.

Pu Thanghrima leh Pi Dohleii fate chu –

1.    Siamliana                       H/o Chawngliani               Bethlehem vengthlang

2.    B.Ngurdawla                H/o Nunthangi                  Madanrting Shillong

3.    Lalthangliani (9yrs) (L)

4.    Lalhliapi                          W/o V.Thanzuala             Salem veng, Aizawl

5.    Lalrinthangi                  W/o Lalsavunga Sailo      Mission veng, Aizawl

6.    Solfathangi                   W/o Lalzuiliana                  Tuikhuahtlang, Aizawl

7.    B.Ngurchhawna          H/o Lalthangpuii               Phullen

8.    Mangthanga (24 yrs) (L)                         

9.    Thangdaii (11yrs) (L)

Pu Thanghrima hi midangte tana inpe zo tak, midangte tanpui nuam ti mi a ni a. Kutthemthiam leh thiamthil ngah tak, Mizo thil, bungrua leh hmanrua, khawsakna atana mamawh ang chi hrang hrangte chu siam thiam ve zel mi a ni. Pu Thanghrima hian talent tha tak tak, tangkai tak tak a nei a, chung zingah chuan, Nau chhar a thiam em em hi a ni. An khuaah chuan nau chhartu ber niin, nau tam tak a chhar a ni. Tin, zai lam a tuiin solfa a thiam hle a. An hunlai chuan, an khuaah Solfa thiam leh zaipawl hruaitu hlun a ni a, a fanu pakhat hmingah pawh a Solfa thiamna hming hi chawiin Solfathangi tih an sa nghe nghe.

Pu Thanghrima hi Nu leh pa atanga Kristian hmasa (Pathian lama tang an ti), Kristiana in pe hmasa pawl an ni a. Chung hun lai chuan Kristiante chu an la tlem em em a, chuvang chuan an inti unau em em hlawm a ni. Pu C. Nundanga, Khandaih Sikul a zirtirtu hmasa, Mizo Kristian dana innei hmasa ber Pu Hrangsaipuia fapa pawhin, “Thanghrima te In hi, Luangpawnah chuan kan innghahna ber a ni thin a, chi leh kuangah inang lo mah ila, Kristian kan nih avangin kan inti unau hle” a ti.

Pu Thanghrimate hi Khandaih Lal Vanphunga leh a fate nen an inti chhungkhat hle a. Pu Thanghrima pa Pu Lalbawnga hi Pu Vanphunga Sailo, Khandaih lal Khawnbawl upa min a ni a, lal tan a tangkaiin, an inpawh tha hle a ni. Vanphunga Sailo chuan Pu Thanghrima pa Pu Lalbawnga chu Luangpawnah tlang hran chang turin khua a din tur a. Tichuan a hnungzuitu thenkhatte nen chuan Luangpawnah chuan an awm ta a. Mahse Sailo ni ve lo tan Lal hna thawh chu, mi ten Sailo lal angin an zah tawk lo nia inhriat chang a nei a. Hnamchawm ni chunga Lal nih chu a buaithlak deuh chang a awm thin bakah, thil tihchi nin a hre lo a. Vanphunga Sailo, Khandaih lal hnenah chuan a thlen ta a.

Pu Lalbawnga chuan, Vanphunga Sailo hnenah chuan, a fapa upa ber Lalbuaia, a hmei fa, chutih laia Vanbawnga a nu kianga awm chu Luangpawnah lal a dah turin a ngen ta a. Mahse Vanphunga Sailo chuan Pu Lalbawnga rawtna leh dilna chu a ngaihsak lawk lo va. Nakinah chuan Pu Lalbawnga chuan na deuh takin a kar a, a vau titih ta a. Vanphunga Sailo chuan, a fapa Lalbuaia Sailo chu Luangpawnah lal a a dah dawn lo a nih chuan, Lalbawnga chuan pem mai a duh thu leh Thangkama Sailo, Sihfa lal Vanphunga Sailo unaupa chuan khawnbawl upa tura a sawm ve rengna chu tihhlawhtlin mai a duh thu a hrilh ta a. Chutiang a nih takah chuan, Vanphunga Sailo chuan kum 1912 khan a fapa Lalbuaia Sailo chu Luangpawnah a lal tir ta a ni. Chutiang tak chuan Pu Thanghrima te chhung leh Sailo lalte hi an inpawh tha a, an inring tawn a, lal te pawhin rorel nikhuaah thu lak nan ber an hmang ve thin a ni.

Pu Thanghrima hi a upat deuh hnuah a fapa Pu B.Ngurdawla, Shillong, Sibudar pension kiangah a awm thin a. A upat hnu pawhin a theih ang angin chhungkaw tan tangkai nih a tum ve thin a. A tar zual deuh hnu chuan Mizoram lam a ngai thei em em a. Tichuan Aizawl ah hruai chhoh a ni a. A fanu Pi Lalhliapi w/o V. Thanzuala Salem veng, Aizawl kiangah chuan a awm ve leh ta a.

Tichuan kum 1982 kumtir khan a fanu Lalhliapi, Salem veng, Aizawl kiangah chuan a thi ta a. A ruang hi Salem veng thlanmualah phum a ni a. Vanduaithlak takin, a thlan chhinchhiahna an hmuh zawh loh avangin, a thlan hi chhuichhuah theih lohin a pilbo ta a ni.

Source : Biang biakte

• Ø  B Ngurchhawna S/o Thanghrima, Phullen
• Ø  Solfathangi S/o Thanghrima, Tuikhuahtlang
• Ø  C. Nundanga S/o Hranga, Chhinga veng
• Ø  Ngurthankima Sailo S/o Lalsavunga Sailo, Mission veng

  

********************************* 

PU SIAMLIANA CHANCHIN

-          Lalbuatsaiha, (Buata Bawihtlung) 30.11.2016

Pu Siamliana hi Pu Thanghrima leh Pi Dohleiite fate zinga upa ber a ni a. Luangpawn khua a piang leh seilian a ni. A pianpui unaute chu –

1.       Siamliana                   H/o Chawngliani              Bethlehem vengthlang

2.       B.Ngurdawla            H/o Nunthangi                 Madanrting Shillong

3.       Lalthangliani (9yrs) (L)

4.       Lalhliapi                      W/o V.Thanzuala            Salem veng, Aizawl

5.       Lalrinthangi              W/o Lalsavunga Sailo     Mission veng, Aizawl

6.       Solfathangi               W/o Lalzuiliana                 Tuikhuahtlang, Aizawl

7.       B.Ngurchhawna     H/o Lalthangpuii              Phullen

8.       Mangthanga (24 yrs) (L)                               

9.       Thangdaii (11yrs) (L)

Vanduaithlak takin a pianpui unau zing ami pahnih (2) thla kim vek a piang chu, an pianhlimin an thi (nau chhiat) hlauh a, mi pakua (9) an dam a ni.

Pu Siamliana hian kum 1942 khan Luangpawn khuaah nupui a nei a, a nupui hming chu Pi Chawngliani (15.6.1922-22.6.2011) a ni a. Pi Chawngliani hi Chawngte hnam niin Pu Hrangzaaithanga leh Chinkhamite fanu a ni. Pu Siamliana leh Pi Chawngliani te hian fanau malsawmna an dawng a, fa sawm leh pakhat (11) an nei a ni.

Pu Siamliana leh Pi Chawngliani fate –

1.       Ralliandanga (L)         h/o Rotuaki               Phullen

2.       Lalsangliani                                                  Bethlehem Vengthlang

3.       Bawihtluanga (L)

4.       Ngurbani (L)               w/o Lalchuailova      Phullen

5.       Lalchuha (L)                h/o Lalzampuii         Bethlehem Vengthlang

6.       Vanlalringa (L)                                           

7.       Lalduhveli                   w/o Lalpana              Phullen

8.       Thangdailovi               w/o Remlalliana       Bethlehem Vengthlang

9.       Thangthiangi                                                 Bethlehem Vengthlang

10.   B. Laldinliani                                                Bethlehem Vengthlang

11.   Zaithanchhungi                                             Bethlehem Vengthlang  

Kum 1965 khan Luangpawn atangin Phullenah an pem a, Ramchhan vengahte an awm thin a. A hnu kum 1982 khan Aizawlah an pem leh a. Bethlehem vengthlangah a inbengbel zui ta a ni.

Pu Siamliana hi a pate ang bawkin kutthemthiam tak a ni a. Mizo thil leh hmanraw hrang hrang, thiamhnang chi hrang hrangte a thiam em em a. Phullen a an awm lai chuan Tlangval rualban zan lo, mahse taima leh tlawmngai hmingthang Laltawka, Kapmawia te ho chu Hnangtahte a zirtir thin a. Anni vohbik pawhin tun thlengin hnangtah an thiam phah zui ta a ni.

Aizawl a a awm hnu hian, a kutthemthiamna avang hian KVI Mizoram-ah a thawk a, hnangtah chi hrang hrang, Khumbeu leh thil dang dangte an tah a, a zirtir bawk thin a. He a hna hi a thih thlengin a thawk a ni.

Pu Siamliana hming hi Phullen lal Awksarala Sailo phuah a ni a.  Khandaih lal Vanphunga Sailo te leh Siamliana te hi pute atang tawhin inngheng hnai tak an ni a. Pu Chalchima Bawihtlung kha lal ina seilian a ni a. A hleitlingin, a pumrua leh a hmelte a tha a, a felin a fing viau mai a. Lal chhungkaw zinga tel ve ta chu lal fapa ang maiin a awm zui ta a. Mite pawhin an zah hle a, indo leh ralrun nikhuaah pawh a huaisenin salte a hawn nual avangin lal chuan a chawimawi hle a.

A hnu zelah Pu Chalchima tu leh fate chu lal tan mi tangkai tak an ni zui zel a. Pu Siamliana pu Lalbawnga pawh chu Khandaih lal Vanphunga Sailo khawnbawl upa min a ni leh a. Vanphunga Sailo hian Luangpawn ah khua dinin, Lalbawnga hi a awp tir a, a fapa ang maiin tlang hran a chan tir ve hial a ni. Mahse Lalbawnga ngenna leh remruatan angin Lalbuaia Sailo chu Luangpawnah lal atan Vanphunga Sailo chuan a dah ta zawk a. Luangpawnah hian hun engemaw chen chu Lalbawnga hian ro a rel ve a ni.

Chutiangin Lalbawnga fate Thanghrima te pawh chu taka lal te nen inngheng hnai, lal chhungkaw tana mi tangkai tak an ni a. Lal chhungkua te pawh chuan an dinhmun leh an ropuina chu Chalchimate chhungkaw zar a ni ve tih an hria a. Lal siam liantu pawimawh tak an ni a, chuvangin Pu Thanghrima fapa upa ber lo piang chu a hmingah LALSIAMLIANA tiin Phullen lal Awksarala Sailo chuan a phuah ta a ni.

Pu Siamliana hian a tu leh fa, unaute kawm dan a thiam hle a. Fa u a nih angin a unaute pawhin an zah thiam hle a. Thawhah natna a neih avangin a upat hnu hian pawn pawh a chhuak thei meuh lova, Inah a tawm deuh chawt thin a ni. Tichuan ni 14^th January, 1993 khan a chenna in Bethlehem vengthlang Aizawlah chatuanram min pansan ta a. A nupui bakah, a tu leh fa thehnem tak a kalsan a a ni.

******************************************