KA CHANCHIN TLANGPUI

       Sailo lal ropui Pawihbawiha fapa Vanphunga Sailo in kum 1901 a a khaw din, Khandaih khua, a hnua Phullen ni ta a piang leh seilian ka ni. He khuaah hian Vanphunga hnuah a fapa Awksarala chu lalah a thu.

       Khandaih khua hi Mizoram a khaw pawimawh ve tak a ni a. Thingtlang a Sikul nghet dinna hmasa ber niin kum 1903 ah din a ni a. Khandaih Sikul a zirtirtu Pu Hrangsaipuia leh Saimanliani te chu Mizo zingah Kohhran Danthianghlim a innei hmasa be te an ni a. Kum 1906 a Kristian a nih avanga Martar Tv. Chalbuanga chu Mizo Kristian Martar hmasa ber a ni a. April ni 6, 1906 a Khandaih khaw pa ho Tuivai luia Sangha tlangvuak naa Harhna lo thleng, Sunday ni 8 April, 1906 a an zai a an lam mup mup kha Mizoram a harhna lanchhuahna hmasa ber a ni.

        Khandaih khua chu kum 1926 aṭangin Phullen tih a ni a. Khaw hmun te sawn a nih thin avangin, khandaih hmun chu Phullen veng pakhat a lo ni ta zawk a, chulai hmun Khandaih veng, Phullen a piang leh seilian chu ka ni. Phullen khua hi Aizawl district a awm, Aizawl via Saitual 125 kms a hlaah, Aizawl atanga hmar chhak lam a awm a ni.

       Thingtlang atanga piang leh seilian tih takah Mizo kuthnathawh leh lo neihna kawnga hna hrang hrang - Lovah, Hlothlawh, Buh seng etc. thiam loh ka nei lo. Kuthnathawh leh kutthemthiamna ngaisang mi ka ni a, Ar-awt tah, Arbawm tah, Paikawng tah, Kho tah te pawh ka thiam ve thin a, eizawnn nen a inngheng hnai lutuk ta lo a, ka thiam ka ti ngam ta lo lek lek.

       Thingtlang hmasawnna leh thingtlang miten kan chanvo kan neih theih ka duh a, kan ramin nasa taka hma a sawn hi ka duh tak zet a ni. Hlemhletna ka hua a, duham leh eiruk ching ka ngaina lo va, dikna leh rinawmna a tlo tih ka hria. Pawisa hmang chauha hausakna hi teh chi a ni lo tih ka hria.

       Ka tha ber lo a, ka thiam ber lo a, ka famkim ber lo tih ka hria, mahse thil kan tihna apiangah a tha thei ang ber zel a tih a, kan thiam leh theihna sang ber hlan zel a, dik tak leh rinawm taka, taima taka tih hian lukhawng a nei tih an sawi ka hria, chu lam chu ka um ve trang trang thin.

       Mitin hian midangte aia chungnun bikna lai kan nei theuh tih pawmtu ka ni.

       Eizawnna avangin chhungkuain Aizawl ah kan awm mek. Tlangval laia lengchhuak ve fo thin kha, nupui fel neih vang nge, in lam ka ngaina ta riau.  Haa.