Reng Puk

             Kan khawvelah hian tul a van na tak em!! Thu tlemte pawh kan post hman ta meuh lo,, chuti chung chuan mi blog leh khawi khawi emaw chu ka tlawh zuai zuai hman ve tho mai, taimak tawkloh vang chu a ni pakhat e..

              Hmanni chu Mizoram khawthlang lamah Dr PM Ghole leh a thian pakhat nen kan zin kual a. Tihtur bik nei a zin kan ni a. Pu Ghole a Mizorama la rawn kal ngai lo chuan zin khawthawn pahin Tourist spot emaw, hmun pawimawh leh tlawh chakawm deuh a awm em tiin kan kalna tur chu a lo zirchiang hmasa vek chu ni in. Aizawl atanga kan chhuah dawn atangin "Reng Dil leh Reng Puk kan tlawh tel hman ang ti raw" a ti sek mai a. Chutiang thil tlawh tur remchang a lo awm chu kei pawh chuan ka phur pui phian a. Tichuan phur deuh chuan kan 3 leh Dirver nen chuan kan chhuak ta.

               Rawpuichhip kan thleng a khualzin motor Sumo leh Bus a lo ding nual a, Hotel pakhatah chuan chaweinatur in kan lut a, kan 4 ei tur chaw an rawn chhawp a, chawhmeh kha hmun khat zelah kan insuah tawm turin an rawnchhawp bawk, ka ei puar khawp mai, mahse, chaw leh chawhmeh inchhawpdan hi Mizoram hmun engemawzata kan chin dan a ni a. Mikhual hnamdang te tan a buaithlak duh thin khawp mai..

          Mamit kan thleng a, thingpui kan in hnuah tihtur kan ti fel a, Chaw, Sa eilo mi tana eitur tuihnai kan hmu mai lo a, Tuidamah panin kan thlai chhuh ta a. Tuidamah chuan kan thianpa hmelhriat te Hotel-ah  kan duh ang te kan siamtir a. Chu Hotel pawh chu khawchhak khual sumdawng ten inhmuhkhawmnan an lo hman avangin an loawm hung mai a. Hotel a ni tih hriat mai a har hle, a chhung kan luh hnu chuan kan Vai thiana te chu an hawikual ve nasa mai.. Chaw kan han ei chiah chu rinai chuan ka thian te pawh chuan an eitui ta phian a. Tichuan chuan IB ah kan riak ta a.

           Khua a lo var a, Kawrthah ah kan phei a, chhun lai velah Rengdil khaw lamah kan tlang ta a. Rengdil en tur chuan kan phei ta.. a hmun kan han thleng chiah chu tuikhuah ang deuh hian Dil lian lo te hi a lo awm a. A hma kum chiah khan tlangval pakhat a lo tlak avangin an lo sah kam/phai a, a tui an sah kam/phai na pawh chu hnawhleh chunglo chuan an lo la dah reng a. Rengdil khua mai nilo, Kawrthah leh khawthlang lam kal tichak awm ve em em tu, kan vai thiante pawh ti phur em em tu chu rin ang a lo ni chiah lo a. A khawbul hnaia mi te lah chuan tuaihnum nachang an hriatloh chu sawiloh a tui an paihna pawh an hnawhleh lem lo a ni si a, chu chuan a tui chimchin a ti hniam a, dil te tak te a ni ve ta mai a, a pawi thin khawp mai. Hmunhlui leh pawimawh te humhalh nachang kan hriat a pawimawh khawp mai.

         Hemi hnu hian Rengpuk ah kan kal leh a. He Reng puk hi Mizo ten thlang kan tlak hma deuh a he lai hmuna lo awm Reng Lal an thuhrukna a ni e an ti, a dik nge diklo pawh chu ka hre ve chiang lem lo. Lung sakhat chu kher kua in a chhungah chuan an Lalpa chu an dah a, a Pawisa dahna, Tuichhe paihna te an siam vek a. An hmelma ten an Lal an thah mailoh nan he pukah hian an thuk ru thin a, Lung phekin an khuh leh thin a ni awm e. He Reng puk hi Reng khua atanga hla ve deuh takah an siam a, an khaw hmun hlui ah te chuan Reng kulh te pawh  hriat theihin a la awm a, mahse kan en ta lem lo.

           Tlangkawmna : Eng eng emaw ti hian ka zinkual ve zeuh zeuh a, kan ramah hian mikhual leh tourist hip em em tu hmun hmingthang leh pawimawh kan ngah lo hle mai a, chutihlaiin kan neihchhun ang ang te chu kan la tuaihnum loin, humhal nachang pawh kan la hre lo hle mai. Kan khaw karkawnga zinmite chaw eitur lah a tamlo chu thu hran, a thianghlim tawklo em aw??? . Han sawibelh ila, hman kuma Kolasib lamah Audit tur a lo kal Vai te chuan Thlenna a tha em? Chawei tur a awm tha em? Sa ei lo kan ni a, kan ei theihzawng a awm loh chuan kan riaklo mai dawn a mi? an ti a, mahse eitur leh thlenna chu kan hmu ta hlauh a. Tin Dr. KA Pathak a leh a naute Scientist 2 te nen Palak Dil kan tlawh tum pawhin an chaw eitur ah kan buai viau tawh bawk.. Heng te hi a nih avang hian kan khawkar kawnga Hotel siam te hian mi duhzawng ang zawng zawng chu neikim veklo mahse a thianghlimna kawngah tal hi chuan tan han la deuh se chu a van tha dawn em aw. Tichuan hnamdang te pawhin anmahniin tim miahloin Mizoram hmun hrang hrangah an zinkual thei anga. Zin kual mite kan hip luh belh zel anga.. Kan Mizoram pawh hian hma a lo sawn phah ngei ang le.