MAHNI Vrs MIDANG

Midangte thunun chu a awl a,
Mahni in thunun erawh a harsa.
Midang khawhar hnem a awl a,
Mahni in hnem erawh a harsa.
Mi harsatna sutkian dan sawi a awl,
Mahni harsatna erawh a khirh bik.
Mahni inngaihdam mai a awl a,
Midangte ngaihdam erawh a harsa.
Mahni inhriat thiam a sam viau a,
Midangte hriat thiam erawh a harsa.
Mahni in duhtawk a awl viau a,
Midangte erawh kan duhkhawp lo fo

VANGLAI HUN

Khawnge Vanglai hun paltlang tawh leh, hmang zo tawh ang zia zangin Vanglai hun hlimawm tak, lungngaihthlak ang reng tak, zalen tak chung si a phur rit takin mi a delh thin bawksi hunlai, duhthlang thei leh duhthlantur chi hrang hrang ten mihringte a bawm hunlai,  nulat talngval hun lai hi in sep kual vel mai mai teh  ang..

        Nulat tlangval hun lai hi mihringin a damchhung hun a a vanglai hun ber a ni a tih theih. Taksa leh rilru, engkim mai a mawilai ber hun, rilru a ruahmanna leh hmachawp ropui leh tha thei ang ber mai siam hunlai a ni a. Naupang, Tleirawl/Rawlthar hun hmangzo hlim, chhungte puitling en a an en ve tan, an khuahkhirhna hnuaia ta zalenna nei nia inhriat hunlai. Chhungkua a mawhphur tu ber ni lem lova, chhungte ring chunga la awm theih hun lai,  Duhber te, hmangaihber te nen intawng a, a aia duh leh hmangaih tawng thei tawh lo tura inngaia, duhzawng tak te nena inpawh tak leh in nel tak a in chhai vel hunlai, duhtak te laka nelawm taka awm hunlai, duhzawng leh ngainatzawng te pawh in hriatsak tuma in ngaihsak hunlai, hmangaihna avanga kawppui te duhzawng ang te pawh duh ve theih zel hunlai a ni a.. nulat tlangval hunlai hi chu a nuam tlawt a ni..

        Hetih hunlai hi duhber te leh hmangaihber ni thin te pawh la thlak kual thin hun lai, hmangaih leh duhzawng dang zawn san leh mai thei tura 'zalen' tak ni bawk si, duh chuan damchhung a inthen tawhlo tur a insiam theih hunlai. Eng dan leh kaihhruaina hnuaiah mah awm lo a, damchhunga inkawp tlat tur leh midang ngaihmelh tawh miahlo tur a thutiam lakna “Inneihna dan” pawhin a la phuar beh hma si a ni a. Nun a zalen in thutlukna siam kawngah pawh mahni chungah a la in nghat tlat a. Damchhung hun ah, nikhua hriat ve tawh si chuan hetiang hunlai tluka mihringin zalenna a neih hun lai hi a awm kher lovang.. Chutiang taka zalen thlalai te chuan zalen takin a thatlai leh vanglai hun nuam takin a hmang thin reng a.

        Duhtak te nen hun chep tak karah, buai ve chung chunga inhmuh leh lendun na tur han ruahman a, khawimaw thiltihkhawm naah te han kal ho a, hlimtak a hmangaih thu han in hrilh tawn a, inngaichang  tawn taka han lendun vel te, bazar a thil han inleisak tawn vel te, restaurant a han chawlh dun vel te, thiante in a han len chhuahdun te chu a nuam ti lo chuan Nulat Tlangval hun hi a la paltlang lo a ni chiang ang... a nih loh vek pawhin mihring te chung a khuanu hun bi chhiar dan a hre thiam lo a ni tal ang..

        He Nulat tlangval hun lai hi mihringin a nakin hunah engang mi nge a nih dawn tichiang tur a a inpuahchah hunlai leh a insiam hun lai, a nakin hun hlimtak leh nuam tak a hmang tur nge a nih a, harsa taka hun hmang chho tur a nih tichiang tur a a insiam rem hun lai tak, damchhung huna hausak leh retheih hril thei tur a a inpuahchah leh a inzir hunlai a ni.

        Chutihrualchuan, a hausa dawn emaw rethei dawn emaw, eng ang mi pawh ni dawn se…, a damchhung hun zawng zawng, a nuam leh hrehawm, hun harsa leh buaithlak, engkim mai a hman dunpui tur ti chiang tur a thutlukna khirh leh pawimawh tak a siam hun lai a ni bawk.. He thutlukna siam kawnga ngaihtuahna hmang nasa leh thutlukna fing leh tha siam thiam a piang an nihlawh anga, ngaihtuahchiang manglo leh duhdah taka thutlukna siam te erawh chuan a hnu a chinfel tur harsatna an tawng tam deuh ngei ang le.

        Heng zawng zawng han ngaihtuah hi chuan Nulat tlangval hunlai hi miringte damchhung huna hun nuam leh hlimawm ber hunlai a ni chungin, hun khirh leh hun harsa tak, nulat tlangval hmangaihna avanga hlim taka hun hmang thin te pawh, chu hmangaihna avang vek a  khawhar leh  hrehawmtaka an rum vawng vawng theih thin hun lai, an nakin hun pawh thlahlel thei lo khawpa chu hmangaihna avanga an talbuai theih hun lai... chu hmangaihna hman dik tawkloh avanga mi hriat lemloh a zahna leh hrehawm tamtak in a tlakbuak theih hunlai a ni a.. hetih hunlai hian thenkhat phei chuan an vanglai hun an hman dik tawk lo avangin dam pawh an thlahlel zol tawh lo a, he khawvel eng hi an hmu ngam tawh lo a, mahni nunnna hial la ta te pawh an awm. Nulat tlangval kawng a ni emaw, sum leh pai a ni emaw, zirna lam a ni emaw, chhungkaw thil leh khawtlang thil a ni emaw nitin nun dan tur leh hun hmandan tur a duhthlanna siam dik tawkloh vang a ni ngei ang.

        Nulat tlangval lai hian nakin hun thlir chunga uluk tak leh hlim tak si a hun hman thiam a pawimawh hle. Duhber te nen hmangaihtak leh duh thawh taka hun hman a, zahawm tak leh thianghlim tak si a hun hman thiam a pawimawh. Hlimtak leh am taka hun hman a, nakin huna min ti lungngai thei tu tur laka fihlim thei tur a in sumtheihna nei chung leh  rilru fim tak leh ngaihtuahna seng tak chung si a he Vanglai hun hi hman thiam a va tul em??  Thalai, nula leh tlangval, tupawh he hun paltlang tur leh paltlang mek te,, hlimtakin he hun ropui leh hlutak hi hmang ila, hetiang hun- Vanglai hun hi vawikhat bak a hman theih loh tih hria in duhthawh takin i hmang ang u... 

        Mahse he hun (thatlai/vanglai hun) kan hman dan hian kan nakin hun tur a hril thui hle a ni tih hre chungin, kan Vanglai hun hian kan phak ang tawk theuhin, kan mawinate, kan thiamnate, ka chakna te, kan finna te, kan inhmangaihtawnnate, kan sum leh pai te, kan Zalenna te hi a hlu thei ang ber in i chen ang u...## (b-buata July, 2010)