I TEL LO CHUAN NIKHAT HI A REI ASIN.!

          Ni zawng zawng hi Ni duhawm tak a ni vek mai thei, Mahse i aw rawl ri mawi ka  hriat miah loh ni erawh hi chu.. ka tan Ni duhawm taka chhal ngam a harsa..

Sunrise over Aizawl city : Buata Photo Album 2013

       
          I lak atangin hmangaihna biahthu thlum dawng lo mah ila.. ka lo hlimpui ve em em thin - i tawngkam tha leh anka nem dam duhawm tak takte hre miah lova nilen hi ka tan a harsa.!

          Ka Beng hian i hming lam ri hre miah lova zan mut a harsat miau avangin, keima hriat tur tawk te talin i hming ka lo lam ri ve sap sap thin asin..

Sunset over Lunglei Road (WB Road) on 12.04.2013 : Buata Photo Album 2013

          I mitmeng mawi leh i sam sei mawi tak chawih tawk tura khuanu pek che - i taksa mawi tak leh i pian nalh tak mai hmu miah lova nilen hi ka tan a harsa a.. ka suangtuahna mitthla a i hlimthla thlir reng ringawt mai chu ka mitin a khawp kham ngang si lova, ka theih tawk tiin i hlimthla ka lo thlir ve vawng vawng thin a sin..!

          Tawngkalamah Nikhat lek ti thin mah ila... I tellova Nikhat rei theih zia hi tunge min hriatthiampui awm ve ang le..!

KA LUANG LIAM.!

I TÂN SI-AR LÂK KA HUAM:
Ka neih rosum chên ve dawn ila
Tukthuan khat daih pawh va ni suh.
Ka sakhmel leh kimtlangte lah chu,
I tân mitthla ngam ngaihna awm si lo.
Ka chanchin tlâng thang vete lah chu,
Hriatreng tlak tur engmah awm si lo..

Nang vâng ni lul lo se e,
Si-Ar lak hial ka huam bik lo'ng e
 

1st March, 2014 : Sunrise over Aizawl, Mizoram.

Hliahtu chhûmdum lêngvèl kárah pawh
I mawina leh i thatna duhawm tak chu,
Kan tân i la rawn chhuah hrâm hrâm a.
Sâng ze la khí-ah thangvansângah khian,
Mawiten vul zél la leilung mawi turin,
Siamtu ropuizia puangchhuak zêl ang che.

Sunrise over Aizawl : View from Tuikhuahtlang, Aizawl. Camera : Nokia Lumia 800

Ngaiin au au che mah ila,
Chelh zawh rual lah i ni si lo,
Zamual i liam tur thlir mai hi,
Ka tih theih tawk a lo ni ta si a.
Damten zamualpui chu liam ta la,
I mawina chuai thei ngai lo tur kha,
Midang tân pawh chhuah zel nang che..

Sunset over Aizawl City on 27.02.2014, Camera: Nokia Lumia 800

Thlir ve u maw tlaitla eng mawi,
Thlangtiang lenkawl hnîm riai saw.
A mawi ti zualan thangvan sangah,
Vanrâng chhum a phan dirdiar...   

CHUL TURA VUL.!

Chul ve lo tura vul,
Ka pual tura khuanu hual,
Ka duat atana khuanu ruat,
Ka lawm tura khuanu dawm..
Ka thlang thlangtiang sappui mingo aiin...