October thla eng zet hi chu a mawi a ni. Hla phuah thiam ten “Zan lalnu” an lo ti fo thrinte hi a inhmeh ngawt mai. He zan lalnu hian a mawi theih dan berin a rawn inlan a ni miau lah tak a, a mawi em a ni. Planet dangah awm an lo awm ve a nih pawhin, anni aia Lei chengte kan vanneih bikna pawh a niin ka hre hial thin.
Rilru a lo awm chu, hetiang taka a theihtawpa mawia Chhawrthlapui a rawn inlar lai mek hian, keini a engmawi lo lawm thintute hian keimahni tawka kan mawi dan ber, kan ropui dan berin kan lo lawm em le.? Kan lawm dan pawh a inang lo viau mai thei.
Hetiang khuarel thil, siamtu kutchhuak ropui lutuk mai – October full Moon ngei maite hi, pawisa a lei a ngai lo hlauh te hi kan nihlawh ngawt mai. Hetia, hausa leh rethei pawh thliar lova, mitinin kan duh ang anga kan lo kurpui theih tura a rawn inlar ngawt thinte hi chu, kan nihlawh tak zet zet a ni.
Keini tehlul, Electric current awm hnua lunglenna chang hre ve chauhte tan pawh, thlir vawng vawng loh a har a. Current awm hma a duhberte nena Leikapui a zankhaw tairek thleng thleng a Thla eng lawm tawh ngat tan phei chuan, nunhlui hriatchhuah tirtu, lunghlui tileng thartu a ni ve fo ngei ang le.
Mitin kan inang lo ang hian, October thla engmawi tak kan lo dawnsawn dan pawh a inang lo ngei ang. Lunglengmite tan inhnemna, khawharte tan thiantha, thuruk neite tan thuruk vawnpuitu a ni a, karhla dana leng inhmangaihte tan lah, van laizawl chu tuallaia chantira, suangtuahna nena chu tuallaia lendun tir theitu thian tha a ni a, a hlu em a, Chhawrthlapui an lo ti pawh hi a awm hliah hliah mai.
Thlirna tlangdanga thlir chuan….Chutiang taka hlu leh tangkai, mawi leh ropui, Chhawrthlapui an tih hial pawh khian, a mawi vanglai ber October Full Moon lai pawh hian, famkim lo mihring ang maiin, a pang pumpui chu a ti engkim thei bik hauh lo nia; eng mawi viau mahse, a pang lehlam chu a thim ve vek tho a. Mahse, a theih tawpa mawia a rawn inlan avang khian a mawi a, amahah a mawi theih lai ber, a theihna sang ber a nih miau avangin, a pang lehlam thim chu theihnghilhin, a eng mawi tak chu kan lo lawm a ni.
Mihringte pawh hi, ropui viau thin mah ila, kan nunah hian mawi lo lai hi a lo awm ve reng thrin a, kan famkim tak tak thei lo. Mahse, keimahni tawkah, kawng dik zawh tura theih tawp kan chhuah a, kan theih tawk a tha leh dik a kan awm a, chumi tura kan theihna sangber kan hlan zel chuan, kan mawina in mi a pha lo a, kan ropuinain mi a khum lo a nih pawhin kan mawina leh ropuina chu hnualsuat theih a ni hauh lo.
Khuangchawi thla thla eng zet hi zawng, a engmawiin a ropui a, Khuangchawi thla a nih ang ngeiin, khuang nena mualzawl a lo lawm pawh a chakawm rum rum mai.
Siamtu Pathian ropuizia hi a kutchhuakte atangin a fiah e.
