Mihringte hi kan han thi(boral) a, chu mithi ruang chu zah tak leh ropui thei angbera sawngbawl kan tum thin. Thalai leh khawtlang tana mi tangkai tak te phei chu nasa tak leh rupui taka thlah liam kan tum hram thin a nih hi.
Mi tu emaw a la dam a ni tih hriat chian lem loh, an thi ngei tur a ngaih bawk si, a chanchin hriat zui tur awm miahlo a bo ta hmak te an awm hian hrilh a hai duh in a mangan thlak duh hle. Chutiang hunah meuh chuan "aw..., a ruang tal hmu ila.." tih te chu inhnemna tlanglawn tak a ni chawk. Nunna chu hlu a, mahse an taksa ngei hmuh tur awm miah lo a a boral ai chuan, a nuna chu lo tawp ta pawh nise, a ruang tal hmuh a han thlahliam chu chungkhatlaina te tan chuan thlakhleh loh chi a ni lo reng a.
Hman deuh khan Aizawl pa, Phullen khua a awm chu a bo daih mai a,, khawtlangin nasa takin ni 7 chhung an zawn hnu pawhin, a dam nge thi tih hriat a ni si lo. 'Lo la dam hlauh se aw' tih chuan a zawngtute hnem zo lo, ' a ruang tal hmu ila' tih chu an in hnemna ber a ni a. Nuna leh a thlarau chu Pathianin a lo tawh pawh a ni mahna le, mahse a ruang tal hmuh chu an duh takzet reng a.
An mi bo ta a khan zu te a lo lem ve zeuh thin avangin khawi maw laiah a tlusual palh nge maw ni le? han tih pawh chuan hmuh tur a awm si lo.. Khaw thenawm leh Aizawl talngval ten rei tak an zawn hnu ah pawh hmuh tur a awm si lo.. Chutihlaiin thu thang mak pui pui a thang reng a. Khawtual mi te tan a hriatnuam vak lo tak tak te, a bo a chhungte tana han rinhlelh mai awl tak tak te a thang reng a. A bo a te chhungkua leh a bona khua te khan inpawhna thatak leh in rintawnna thatak nei lo phei se chuan thil thalo zawk pawh a thlengpalh lovang tih sawi a har chang a awm.
Pathianmi hman tia hriatlar, Tawngtaina hmanga thil hre thei hmun hrang hrang a mi te chu rawn kim deuh vek an ni a, an han tawngtai zo a, chumi khami laiah chuan a awm.. , chumi laiah chuan phum a ni!, Thlamah riltamtakin a awm!, Kawr bulah khamah a tla hlum..! a ruang a la chhe vak lo..! tih te chu Ni tin deuh thaw, Tawngtai hmanga hre thei te chhan na a ni.
Tawngtai mi te rawn zawh a piangin beiseina sangtak nen an sawina hmun lam chu tlangval tlawmngai te chuan an bawh nghal huk huk zel a, a ruang hmu hmasa ber tu nih kha an duh tak zet hlawm a ni. Mahse, tawngtaina hmanga thil hrethei(Zawlnei??) te hriat leh hmuh zawng zawng chu a nih loh zia rang taka finfiah nghal zel a ni a. Heta tang hian Tawngtaina hmanga thil hre thei te thil sawi leh hriat te hi Pathian hnena tanga an dawn a ni veklo tih hi ka rin phah hle. Tawngtai mi engemaw zat ten a hrang theuhin thu inanglo theuh an han sawi chu, tlangvalte ah beiseina nasa tak a siam a, mahse dawt an lo sawi ve thei tho tih kha a an finfiah theih chhun a ni bawk si... Pathian mi inti, tawngtai hmanga thil hre thei in ti tam tak te hian Eng Pathian ber hnen atangin nge thu an dawn thin dawn le.. Kan van Pathian nung rinchhan awm tak a lang te chu an ni hlawm, mahse an thil sawi a diklo thin tlat avang hian rin vek erawh an har hle mai.
Thenkhat chuan ' Lasi, Ramhuai, Khawmu' in a hruai bo a niang ti te pawh an awm... Mahse khawiber nge dik tih chu tun thleng hian hriat a ni si lo.. Ramhuai leh Lasi ten an hruaibo thei tak tak em ni tih pawh chu hriat chian va ni suh..
Mak ve tak mai chu, he mi bo hnu kum 2 na velah khan, he khaw thenawm khaw pakhat nu (hming thup) chu thianhoa an thingphurhna ah a bo daih mai a, ni engemaw zat an zawn hnu pawhin an hmu zo lo a. Khawtlang tlawmngai te an beidawn hnuah Gorkhali thingzai tur te chuan Thingtuluang a a lo thu lai hi an hmu a, an hruai haw leh a ni awm e. Khawnge i kal ti a an zawh chuan 'Lasi (ramhuai) ten min hruai a.., nausen hnute hnelai nei ka ni a ka tihleh nausen duhawm deuh min pe a, an khua a min hruai an tum a ka duhlo a ' a ti ni awmin an sawi. An khuaah chuan hruai ta se, a lo let leh ang em le? Khawinge an khua chu ni ang le? tih chu hriat a ni si lo. Amah lah hi mi pangngai ve tak a ni bawk si.. Heng te avang hian Ramhuai leh Lasi te hnathawh awi lo ve tak thin pawh min ti buai ve hle mai.
Kan thu hmasa ah khan han letleh ila.... Khatihlai kha Fur ruahtui tlak tam lai, ramhnuai hnawng leh pik a nasat hunlai tak, Vangvat leh rannung tam lai a ni chung khan Tlawmngaitakin mi tam takin ' a ruang tal kan hmu dah lawng maw?' tiin an zawng na sa hle.. Heng te avang hian mihring nunna hi a hlu a, nunna awmna kan TAKSA pawh hi a lo hlu hle mai tih hi ka ngaihtuah phah fo thin. Thalai, nu leh pa, naupang te thlengin mahni hna pawimawh te dah thain " a ruang tal kan hmu lo'ng maw?' tiin a taksa kha an han zawng a ni a. Kan chhung te chunga thleng ni ta se, a ruangtal hmuh chu kan duh ve ngei ang le..
Mihring taksa hi a lo ropui a, a hlu a,Keimahni chauh tan a hlu a ni mai lo a, kan chhungkhat laina, thiante tan pawh a hlu a, mihringte min ti mihringtu a ni a.. eng emaw avanga a lo chhiat (nat) eawm, a lo boral emaw pawhin a thi a chhungte tan a runthlak hle thin a ni. Chuvangchuan ha kan Lei taksa hi thi mai lo tur leh Boral mai lo tura duat tak leh dim dawi taka enkawl leh vawn zel hi kan mawhphurhna a ni..
Engkim chunga thuneitu Pathian in a ti boral a nih ngawt loh chuan.....
No comments:
Post a Comment