Kuthnathawktute tan awllen a awm tak tak tawh lo..!

Kumpuilingleta mahni lo leh huan theuh a, kawl a ni chhuak chhiar a kan fehchhuah mek lain, Favang hun duhawm tak chu kan lo hmang zo dawn ta a, Pawltlak thla kan lo chuang kai leh ta reng mai.

Mizoram mipui tam zawk, keini kuthnathawka eizawng, a bik takin tlangram lo neitute tan chuan kan thlai tam zawkte tharchhuah hun leh sengkhawm hun a ni a. Chutih lain kan thlai thenkhat  Sawhthing etc te pawh a man a zirin chawh a lo hun leh tan tawh bawk.

Hetia kan thlai tharte kan sengkhawm a, kan tlangram lo te kan kalsan mek lai hian, kum thar lama kan hmalakna tur Lo puahchaha kan ngaihtuahna sen a lo hun leh ta bawk. Kan kum thar Lo turah chuan engtingin nge hma ka lak dawn tih hi bengsika kan ngaihtuah a lo hun leh ta hle a ni.

Kum tharah chuan eng thlai nge ka chin ang, engzat nge ka chin ang, chu thlai chu kan ram leilung nen a inmil em? Enkawl a hautak dawn em? Engtia sawngbawl chi nge? Ka hlawkpui ang em? Thlai chin tur chu a chi te ka nei thei dawn em? tih te kan phak tawkah kan chhut lawk a, kan inruahman lawk thin a ngai a ni.

Kumin a buh leh bal thar tamte hian, Pathian malsawmna an dawng a nih rualin, chu malsawmna dawng tur chuan, kum bul atanga ruahmanna tha leh felfai an neih vangte, taima tak leh rim taka kumtluana an thawh vangte a thar hlawk an ni.

Favang awllen te han ti thin mah ila, kuthnathawktute tan chuan awllen tak tak hi a awm thei meuh tawh lo a. Tuna kan thlaithar te kan sengkhawm mek lai pawh hian, kum thar atan kan inpuahchah lawk a ngai leh tawh a.

Kum tharah Buh leh bal tam tak kan thar ngei theih nan, kum thar lo tur hi a tir atanga uluk taka hma lak a ngai leh dawn a. Kumina buh leh bal tam tak thartute kan inlawmpui rualin, kum thar lo awm turah pawh, tam tak thar zel turin duhsakna  kan inhlan e.

(Hei hi Thlawhhma Chanchinbu Editorial ah hman a ni - Buata)

Pu Vanlalngaia inah ka leng - Ram leh hnam humhalh thu min fah

Vawiin chu Pu P Lalupa titi ka ngaithla - Lungin tângin Lungin tâng vêk chhanchhuak

Vawiin 26.11.2016 Saturday chu, nikhat chhung rau rauah ka hun hman dan a inanglo hlawm hle. Zing 6:00am atangin hmun hran hranah thil inang lo tak tak tiin ka kalkual a. Kan veng mitthi lainatawm zet, fasên kum 1 awrh chauh kalsan ta thlan pawh lai thei lovin ka awm a, ka inthiam lo hle a. Pumpelh theih loh ruahman lawksa thil vang a ni miau a, ka inthiam lohna pawh mi hnem deuh a.

Chutiang chuan zing atanga ka hun hman dante ka thlir let a, a tha thawkhatin ka hria a, ka lung a awi ve viau. Chutianga ka hun hman dan hrang hrang zing a pakhat chu, kan sawi lang thuak ang a, a tul dan a zirin kan chhunzawm emaw a ni mai ang chu.

Chawhnu her tawhah "Mara Ram Harhna" Lehkhabu, ka pu (ka pu ka ti kher kher a, amah chu Upa V Lalchhawna a ni) ziak chu Pu P Lalupa In, Kulikah kengin ka va kal a. Vanneihthlak takin Pu P Lalupa chu Inah a lo awm hlauh bawk a. Ka pu chu a hritlan avanga amah ngeiin a pek theih thu leh a aiawha kal ka nih thute, a thiantha a nih avanga a pek (present) a nih thu ka hrilh a. Tin, keimah nei pawhin tumah thawn chhawng lova amah Pu Upa ngei chu va hmuh a, a kuta va hlan ka duh kher avanga va kal vang vang ka nih thu ka hrilh bawk a.

Min lo dawngsawng tha hle a. Kan inbiak lemluam hnuah, rambuai lai 1967 a Vairam Lungin a an tan laia an lungin tanpui hnamdang tlangval, tualthat, khaihlum tura roreltuin a rel, taninah pawh an dah hran ran tawh, thi mai tura an ngaih vek tawh chu  Pu Lalupan a chhanchhuak tih thu ka hriat chu a dik reng em tih ka zawt, a dik ngei tih min hrilh a.

Mizopa, Lehkha zir sang pawh ni lo, Lungin (Jail) tang ve tho Pu P Lalupan, a lunhin tanpui hnamdang tlangval, Court meuhin thiam loh a chantir tawh, mi pahnih thattu (double murder an tih)  chhanchhuahna tura High Court a dilna a siamsak dan leh, India dan hmang vêk a a chhanchhuah dan chu amah ngei chuan a sawi ta a. A ngaihnawm mai a ni lo, a ropui zawk hial a ni.

Misual, tualthattu, chutah pawh mi pahnih thattu tia Court hniam zawkin a relfel diam tawh leh khaihlum tura a tih tawh Manipuri tlangval, lungngaia indaem kun reng tawh dinhmun chu Pu P Lalupa chuan a hriatin a lainat a. Lungin tangho an ni bawk a, chu tlangval chanchin kim chang zawng zawng chu a zawt chhuak ta vek a. A chunga rorel a nih dan chu dikin a hre lo a.  A chhan dan tur kawng a zawng ta a.

An inpeihta tihah Dan hmang chuan chu tlangval chu Pu P Lalupa chuan a beihlet pui ta a. Hight Court a dilna tur chu a siam a. India dan a hriat ang angte chu tlawhchhanah hmangin Misual khaihlum mai tawh tur chhanchhuah theihna tur chu a duang ta a. Pu P Lalupa chuan ziah dan tur a sawi a, Pu V Lalchhawna chuan a lo ziak zel a, an peihfel hnuah High Court ah an thawn ta a.

A tawi zawngin sawi ta hrih mai ila. Hun rei paeh a rial lo, Court hniam zawk thurel sa, Khaihlumna tur thu chu Hight Coury chuan ngaihtuah that tur tiin a titawp lailawk ta a. Chuti a nih takah chuan chu Manipuri tlangval paeh chu Bail-a chhuah lailawk a ni thei ta hial a.

Nakinah chuan, chu tualthah thubuai chu Hight Court chuan a ngaihtuah ta a. Tualthattu, thiam loh changtawh chu Pu P Lalupa sawipuina azarah "he mi hian thiamlohna a nei lo" tiin Hight Court chuan a chhuah fel ta der mai a ni tih min hrilh a.

He thu min hrilh zawh hian, High Court a an thu thehluh tur, Pu P Lalupa sawi anga Saptawng lo ziak zeltu Pu V.Lalchhawna Ex MDC, Pu Upa Ina ka kalna chhan Lehkhabu ziaktu (Min tirtu) chu a awmnaah ka pan leh vang vang a. Pu P Lalupa thusawite chu ka sawi chhawng a. Kan titi zui veleh ta a.

Pu V Lalchhawna pawh chuan Pu P Lalupa finzia leh dan a hriatziate chu min lo hrilh a. Lungin tang Manipuri tlangval thiam loh an chantirna leh a chunga an rorel dan diklohnate, amah a chhanchhuahna tura a mamawh dan tlawhchhan tur hrang hrangte chu a sawi nghal zung zung theih thu a lo sawi a.

Chu tlangval chuan mi pahnih, a nuhrawn leh chu a nuhrawn fa, hmun inkar hlat a awm site nunna a lak dante chu, mi pakhat thiltih a ni thei dawn em ni? Mi pakhatin a rualin a tithei dawn em ni? tiin chu thubuai a an hun leh hmun lo record dan inmil tawk lo laite chu tan chhanah a hmang tel a.

Tin, he thil a thlen lai hian, an thenawmhnaite pawhin an thawm pawh an hre der lo te hi a mak a. Naupang a thah lai hian, a Nu emaw a pa emaw hi lo au tuarh tuarh awm tak? A nih loh leh Nu a thah lai hian a chenpui Pa ber emaw midang emawte pawh lo au tuarh tuarh awm tak. Mahse thenawm hnai, bang dan maia awmten tinge an thawm pawh an hriat loh theih.

Chuvangin, he tualthahna hi ani mi pakhat mai thiltih a ni thei dawn em ni? Tuna roreltu Judge ngei pawh hian amahin tih tum chhin se, a thei dawn em ni? Chuvangin inthurual thiltih emaw a ni ngei ang tihte chu Pu P Lalupa tanchhan thenkhat zing ami a nih thu Pu V Lalchhawna chuan min hrilh a.

Tin, tualthattu a an puh Tlangval chunga roreltu leh thuneitute thiltih danah chuan, nasa taka danbawhchhiatna a awm dante. Amah puitu Dan hremi pawh an pe lo va khaihlum tura a chungthu an rel ringawt maite chu thil dik a nih loh thute pawh tanchhanah a hmang zel a. Tichuan roreltu lamin dan an bawhchhiatna lai leh an dan bawhchhiat bung leh changte chu an thur chhuak zel a. A tawpah chuan chu Manipuri tlangval, mi 2, a nuhrawn leh naupang thattu a an puh, khaihlum mai tura Court-in a lo rel tawh chu, thiam changin a chhuak ta a ni.

Hetianga Jail tang ve tho, Dan lam zirchhuak ni si lo, lehkha zirsang viau pawh ni lo, a thluak that leh fin vang bakah, a remhriatna vang liau liau a, Court hniam zawkte thutlukna pawh lehthal thak thei khawp Mizopa chhuanawm Pu P Lalupa ka chibai thei hi ka lawm hle.

Tin, amah Pu P Lalupa leh High Court a an dilna ziaktu, Lungin tang ve tho Pu V.Lalchhawna te ka atang ngeia he thu ka ngaithla hi ka lawm a, a ngaihnawm mai piah kamah, a ropui em em a, an chhuanawm takzet a ni.

(Mobile Phone a type chu mit a kham duh hle mai - Buata Bawihtlung 26.11.2016, 10:20pm tkt)

Demonetization hian Mizoram Farmers-te pawh min nghawng ve

Pawisa Note tihtawp (Demonetization) in Farmers te min nghawng dan chungchang hi Central Sorkar aiawh lokalte leh Mizoram a Sawrkar huaihawtin State Guest House ah vawiin 23.11.2016, 10:30 AM khan neih a ni a.

He hunah hian kan pute rokhawlhna avangin tel turin pu ten min ti a. Hemi chungchangah hian Central Sorkar a hmanhmawh avangin meeting hi chawpchilh taka huaihawt a ni a, keimah bik phei chuan 9:00 am ah ka tel tur ka hre chauh a. Hun chawpchilh tak karah farmers ten kan harsatna tawh ang angte ka zawt kual nghal a. Demonetization avanga Mizoram Farmers ten Harsatna kan tawh thenkhat he Discussion a ka thlen ve te chu:

1. Tunlai hi kan thlaitharte kan sengkhawm hunlai a ni a. Hun a hluin induhthawh a na hle a. Sericulture farmer te ngat phei chu, an hna laklawh lai chuan Sunday pawh an awl thei lo.  Chutih lai chuan Rs 500 leh Rs 1000 Note a lo thi ta si a. Kan pawisa neih ve ang angte chu a riral mai kan phal bik lo a, pawisa hman theih a chan tir turin Bank kan pan a ngai ta thin a ni.Bank ah hian mitin kan kal avangin hun chan mai theih a ni lo a. Nileng pawhin hun chan loh palh theih a ni. Chutiang chuan, kan hna tul kalsanin kan pawisa thi mai tur kan buaipui ta a. Kan Lo lam tulte kan kalsan dawr dawr a ngai ta a. Hna tam tak kan thulh phah ve a ni.

Chuchuan kan thil tharchhuah kan sengkhawm kawngah nghawng a nei ngei ang tih chu a hriat theih a.  Kan lo lama kan thil tharte hi, a hun taka sengkhawm a nih loh chuan, nasa takin a riral theite a ni hlawm si a. Chuvang chuan Farmers te hi min nghawng ve nasa hle a ni.

2. Bank hi khawtinah a awm lo a, khaw 5 khaw 6 ten Bank pakhat kan inthawmna te pawh a awm. Bank awmlohna khua awmte tan chuan pawisa Note hlui thleng emaw deposit emaw turin Bank awmna khuaah kal a ngai a. Khualkhua a kal tur chuan, hna tul kalsan mai a ni lova, kalman leh thil dang atan pawisa sen a ngai thin. Chu chu Bank awmlohna khua a Farmers rethei ve tak tak ten kan tawng mek a ni.

3. Kuthnathawktu - Farmers tena kan tharchhuah, kam sum hnar lian tak zing ami Serthlum, Hmarcha etc te tunah hian hralh emaw hralh tura indawr mek a ni hlawm a. A leitu (sumdawng) te hian farmers te hnenah pawisa te an lo pe lawk ve fo thin a. Mahse kumin chu pawisa notes thi hian a nghawng buai ve a ni.

Hetia pawisa Notes a thih takah hian, Marcha rate pawhin a nih turang a ni pha lo niten sawi a awm a. Serthlum lei thintu Vai thenkhat ten Notes hlui te an ken thin avangin, Ser huan neituten an dawng ngam chiah bik lo a. Lo dawng ngam pawh nise, hna thulh leh sum sengin Bank a dah luh emaw a ngai leh dawn bawk si nen, sawifiah thiam harsa tak siin kuthnathawktute ah harsatna a thlen a ni.

Mizoram a loneitu - farmers te hi, mirethei ve tak takte kan ni a. Kan eitur thar bawk mah ila, kan fate sikul fee leh mamawh hrang hrang, kan thawmhnaw leh thil dang mamawh leina tur pawisa nei turin inhlawhfak kan ngai ve reng a.

Hetia pawisa Notes a thih takah hian, pawisa Notes thar a la rawn thleng tam si lo a, Hlawhfa ruaitu leh inhlawhfaten pawisa inpek kawngah harsatna kan tawk a. Pawisa mamawhna vanga inhlawh mah ni ila, Notes hlui lo chu inpek tur a la awm si lo, Notes hlui dawn ngawt kha, inhlawhfa chawp chhungkua tan chuan thil tihchi a ni lo, hna thulh a Bank a buaipui leh fe a ngai dawn si a.

Farmers te hmasawnna tura sorkar hmalakna, project leh scheme hrang hrangte hi pawisa nena kalkawp zel a ni a. Central leh state sorkar level-ahte, Implementing Agency level-ahte chuan, cash a la chhuak lovin pawisa hi inhlanchhawng thei mah ila. Farmers level, a grassroots ah tak tak chuan pawisa a lakchhuah a ngai ngei thin.

Mahse Demonetization avangin pawisa lakchhuah theih chin bituk a ni a, pawisa a lo vang bawk si nen, Bank-ah hun rei tak hman a lo ngai leh zel nen, thil a harsa ta em em mai a. Hnathawhna tur pawisa kawl reng chung siin, lakchhuah zung zung theih a nih miau loh avangin Projects leh schemes tam tak chu a kal tluan loh phah ve deuh tih chu hai rual a ni lo.

Hetiang tak hian mi tam takin harsatna tawk mah ila, kuthnathawktu tam tak erawh chuan, buaipui tham pawisa kan kawl lo tih chu, ka mi zawhte min chhanna a ni tlat. Heta tang hian kan rama pawisa vir vel tam tak hian farmers te kut a thleng lem lo tih a ti lang thei awm e.

Loneitu - farmers te hian kan lo leh huan hi kan ei bel a ni a. Hetih lai hian, farmers tam tak chuan kan thil tharte hralh thin mah ila, Farmers dang tam takte hian hralh sum tur ni lo, kan nitin ei tur, kan damkhawchhuahna tur bak ngaihtuah thei lo, Buh leh chawhmeh tur thlai ilo vel chiah thar pawh tam tak kan awm bawk. Chutiang chuan pawisa kan kawl tlem a, pawisa Notes thi pawhin mi a ngawng nep deuh a tih theih. Chutihrual chuan, farmers te kutah pawisa a lut tlemin, pawisa kan lo kawl tlem zia pawh a ti lang tel awm e.

He kan harsatna tawhte hi farmers tam tak chuan kan hrethiam vak lo zawk mai thei. Pawisa notes thiin min nghawng leh nghawng loh pawh hre lo, ngaihtuah ngai lem lo pawh tam tak kan awm tih a hriat bawk.  He demonetization hi Sorkar hmalakna a nih avangin, ram leh mipuite tana tha tur thil nia kan beiseina leh rin tlatnate hian, Loneitu - farmers te min ti chiai lutuk lo nite pawhin a lang a.

Tin, thingtlang kil hla tak tak a awmte pawhin TV Radio bakah WhatsApp leh social media a tangtein Sawrkar thu kan hre ve zel a. He harsatna hi a reh ve thuai beiseina nen kan lo hmachhawn ve a. Kan harsatna pawh a eng zawnga thlir pahin kan lo hmachhawn ve hrih a ni.

He harsatna hian ziaawm lam a pan niin a lang na a, ziaawm lam pan lova, chinfel thuai a nih loh erawh chuan, rei tak kan tlin lo palh thei tih erawh Sawrkar hian a hriat a, theihtawp a chhiah erawh a ngai hle a ni.

*****************

Mizopa Scientist Pu C Rokhuma kha ka chibai ve

Mizo pa ropui Pu C Rokhuma, Indigenious Scientist (Mizo pa Scientist) hi ka ngaihsan em vangin Nikum 28.02.2015 khan a chenna inah kalin kan chibai ve a, vannei ka inti takzet. Vawiin ni 23.11.2016 Nilaini a mual min liamsan takah hian, nikuma ka lo chibai ve hman hlauh kha ka lawm a, hun hlu leh duhawm tak a ni.

Pu C Rokhuma hi a thu leh hla, a chanchin vangin ka lo ralkhat ngaihsan ve viau thin a. A Inah ngei kala ka chibai ve tak atang khan, amah ka ngaihsanna a zual a. Keini a kar kha, hlim tak leh nuamti hmel tak khan mi a lo dawngsawng thiam a. Khatianga keini ve mai mi a lo hlut thiam em em mai kha a mak ka ti zawk hial.

Israel chanchin kha a tuipui ve bawk a, ngaihnawm tak takin a ziak thin kha a nia. A bik takin Indo leh ralthuam lama Israel dinhmunte kha a sawi ngaihnawm thiam a. A zarah Mizote hian Israel hi kan ngaihsan zual phah em aw ka ti deuh. Ka hre dik em chu ka hre lo a.

Pu C Rokhuma kha, nikum mai pawh khan a la che fel em em mai a. A inlengte hming pawh ziakin a la chhinchhiah deuh zel a ni awm e. Khatiang pa ropui, mahni ram leh hnam hmangaih a, mahni awmna ram leilung, sik leh sa bakah, khuarel thilte leh thil dang dangte hriatchian tuma chik peih mi, hriat pawh hre chiang em em tu, Mizo pa ngei mai, mi bik ka chibai ve hman kha nihlawh ka inti khawp mai.

Hetia mual a liam ta mai hi, ka lo ui ve hle mai a, Mizo hian ani anga pa ropui, mahni inzir peih, thil chhinchhiah taima leh zirbing peih hi kan nei leh ang em? Hetiang pa ropui, Mizo pa ngat kan han chan hi chu, Mizo tan chuan channa nasa tak a ni a. Padma Shri hial hlantu India ram pum tan pawh, channa nasa tak a ni ngei ang. 

Pathian Pasaltha Upa Hranglalan Sakei sual chunga a tawngtai dan

Pathian pasaltha an tih mai Upa Hranglala (Pastor Thanzinga nen pawha inkawp fuh tak) Pathian ringtu nghet leh A thuhriltu tawngtaina hi a danglam ve ngawt mai.

Upa Hranglala hi Bawihtlung hnam a ni a, Pipute a tangin Bawihtlung hian Sakei hi an serh hle a, Sakei pawhin an ran a seh ve ngai lo niten an ngai thin a ni awm e.

Trumkhat chu Sakeiin Upa Hranglala Bawng a lo seh hlauh mai a, chumi a hriat veleh a Pathian hnena a tawngtaina chu...

"Lalpa, ka pi leh pu, ka nu leh pa chhanah Sakeiin kan ran a khawih ngai lo. Kei pawh ka indan tirh atangin Sanghar tak ngial pawhin ka Ar a zen ngai lo. BAWIHTLUNG HNAM NGAT KAN NI A, vawiina Sakeiin ka Bawng hei zozai min sehsak hi, Sa sual a ni a, a thi tur a ni. Darhnuni pa nen Tlâk kan siam anga, kan Tlâkah tlâktir ang che"  tiin a tawngtai ta a.

Sakei chu an Tlâk siamah chuan a tla mai lo va. Mahse an khaw thenawmah chu Sakei chu an lo kaphlum a, Upa Hranglala Bawng sehtu Sakei sual, a kelek ngei a ni tih an va finfiah hnuah chuan, Pathianin Upa Hranglala tawngtaina chu a chhang niin an ngai a.

Mahse a dil ang diak diak chuan an Tlâk siamah a tla lo mai chauh a. Chu chu Upa Hranglala pawh chuan, ka tawngtai duham ve deuh bawk a ni a ti e an ti. He thil hi a danglam ve ngawt mai.

Ka fate 3 hian BA an pass vek ang, ka TAWNGTAI dawn a lawm!

Kan rama Ringtu hmasa ten Pathian an rin dan kha, mawlmang tak angin lang mahse tihtak zetin an ring niin a lang. Pathian thu hre tam viau lo mahse, Pathian an hmu fiahin an hrechiang hle niin a hriat. Chung zingah chuan Pathian ring tlattu, Pathian thuhril a vak kual thin Upa Hranglala chanchin tlemte, Upa V Lalchhawna min hrilh hi kan sawichhawng ang e.
Kum 1960 Mau tam lai khan Upa Hranglala chuan, “Ka fate pathum hian BA an pass vek ang” tiin Upa V Lalchhawna chu a hrilh a. Pu Chhawna chuan, “E khai, ka pa, engtin nge BA an pass vek ang I tih theih a. Hlo thlo mai I ni a, Pathian thuhrilin I vak chhuak pah reng bawk si a, engtin nge I chawm tehlul ang ni?” a ti a.

Kha tih lai khan, Upa Hranglala fa lehkha zir mek pathum zinga upa ber Ramena chuan pawl 7 a zir mek chauh a la ni a. BA pass tur chuan Shillong-ah zir a ngai a, thingtlang atanga Aizawl kal ringawt pawh thil awlai lo tak a ni. Chutah Mautam lai a ni bawk nen, lehkha zir chu a duh nazawng tan pawh thil tih theih a ni lo a, BA pass ngat chu an chhuanawmin an ngaisang hle a ni.

Chutiang tak chuan la harsa mahse, Upa Hranglala chuan Pathian a ring tlat a, “Engvangin nge an pass loh ang, Rema pa pawhin a fate a chawm kan hre hlei nem! BA a pass tir vek a lawm! Ka fate 3 pawh hian BA an pass vek ang, KA TAWNGTAI DAWN A LAWM” tiin a fate pathum lehkha zir mekte chuan BA an pass vek tur thu chu huai takin a sawi lawk a ni.

Pu Hranglalan ‘Rema Pa’ a tih hi Pastor Thanzinga a ni a. Pator Thanzinga hian a fate hi BA a pass tir vek mai bakah mi chhuanawm takah a chhuah vek hlawm a. Chungte chu Rev. Dr CL Rema (L), Mizoram atanga IAS hmasa ber, IAS bansana Missionary hna thawk ta zawkte, Rev. Dr CL Hminga te,  Pi C. Biakchhingi BA B.Ed te, Pu CL Ruala, PM (Lok Sabha) politician hmingtha leh larte, Pi CL Kimi (Rtd) Principal Health Worker Training School te an ni.

Pastor Thanzinga (Rema Pa) hi tawngtai mi, Pathian a innghat hmiah mi a ni a. Kha tih hunlai khan Pastor hlawh a la tlem hle chungin, Pathian a ring a, a tawngtai thin a, Pathianah a innghat hmiah thin. Pathian pawhin a awmpui a, a fate pawh Pathian zarah mi hlawhtling takah an chhuak vek hlawm ta reng a.

Chu chu Upa Hranglala hian a hrechiang hle a. Rema pa (Pastor Thanzinga) in a fate BA a pass tir vek theihna chhan chu Pathian a rin vang leh Pathianin a fate chu a enkawlpui vang a ni tih a hre chiang a. Pastor Thanzinga (Rema pa) leh a fate kaihruaitu Pathian chu a Pathian a ni ve tih Upa Hranglala hian a hria a, Pathian chu a ring tlat a, a kutah a innghat hmiah a ni.

Pathian hnenah a tawngtai ve ang a, Pathianin a awmpui ang a. Shillong a ni emaw, khawiah pawh zir ngai se, engtin pawhin hautak mahse Pathian chuan a fate pathum chu BA a pass tir ve thei a ni tih chu Upa Hranglala chuan a hrechiang em em a, “ka fate pathum hian BA an pass vek ang, KA TAWNGTAI DAWN A LAWM” a ti hmiah mai a ni.

A sawi lawk ang ngeiin Upa Hranglala fate pathum, BA an pass tur thu a sawi lawk lai hun, kum 1960 Mau tam laia pawl sarih (7) zir mek Ramena leh a naute Sangpuia leh Nunkungi te chuan BA an pass ta vek reng a. BA an pass a ni mai lo va, Sorkar officer chhuanawm tak tak – Director hialte niin mi chhuanawm takah an chhuak ta hlawm a ni.

Pastor Thanzinga leh Upa Hranglala te chanchin hi a ngaihnawm ngawt mai. Anni pahnih hi Pathian a innghat hmiah mi, an Pathian thu lak dan pawh inang tak, Pathian tana rinawm tak leh thahnem ngai taka thawk tang tang thin an ni a. Pakhat Pastor a ni a, pakhat Thuhriltu (Upa ni bawk) a ni a. Anni pahnih hian Mizoram chhim lam khaw engemaw zat chu Pathian thu hrilin an fang chhuak a ni.

Anni pahnih chanchin atang thian, kan Pathian rintlak zia kan hre thei awm e. Pathian hian tihtakzeta Amah ringtu leh Amah a innghat tlat thinte chu a thlahthlam ngai lo tih pawh a lang chiang hle.

Upa Hranglala chanchin hi tam tak sawi tur a awm a, Pathian a rin zia leh Pathianin a hman zia kawng hrang hrangin a lang a, remchangah kan la tarlang leh dawn nia.

– Buata Bawihtlung 19.11.2016, 6:30 PM

Mizo Inneihna dan a Man Hlanna Lehkha ziak dan

Mizo dana Inneih puahchan dawn hian, Man hlan hunah Lehkhaah mumal taka ziaka chhinchhiah a ngai thin a, chutiang chu Man Hlanna Lehkha te pawh an ti mai thin a. Palai leh Inneitur chhung te zingah awlsam taka ziak thei mai an awm laiin, mi thenkhat tan thil awlai lo tak, vawi khat ziahna turte a ni ve thei a, a buai theih ve viau bawk. He Man Hlanna Lehkha pawh hi, a tha ka tih dan a ka rawn duan ve a ni a. Mizo Inneihna leh Inthenna Dan - the mizo marriage divorce and inheritance of property act 2014 in a sawi dan zulzui deuh a siam a ni. Hmang duh leh mamawh kan awm takin, helaiah hian kan dah chhuak ve ang e.

Download Link:
Man hlanna Lehkha Format-I Download Link

Download Link:

Man hlanna Lehkha Format-II Download Link

Khuangchawi Thla - October Full Moon

October thla eng zet hi chu a mawi a ni. Hla phuah thiam ten “Zan lalnu” an lo ti fo thrinte hi a inhmeh ngawt mai. He zan lalnu hian a mawi theih dan berin a rawn inlan a ni miau lah tak a, a mawi em a ni. Planet dangah awm an lo awm ve a nih pawhin, anni aia Lei chengte kan vanneih bikna pawh a niin ka hre hial thin.

Rilru a lo awm chu, hetiang taka a theihtawpa mawia Chhawrthlapui a rawn inlar lai mek hian, keini a engmawi lo lawm thintute hian keimahni tawka kan mawi dan ber, kan ropui dan berin kan lo lawm em le.? Kan lawm dan pawh a inang lo viau mai thei.

Hetiang khuarel thil, siamtu kutchhuak ropui lutuk mai – October full Moon ngei maite hi, pawisa a lei a ngai lo hlauh te hi kan nihlawh ngawt mai. Hetia, hausa leh rethei pawh thliar lova, mitinin kan duh ang anga kan lo kurpui theih tura a rawn inlar ngawt thinte hi chu, kan nihlawh tak zet zet a ni.

Keini tehlul, Electric current awm hnua lunglenna chang hre ve chauhte tan pawh, thlir vawng vawng loh a har a. Current awm hma a duhberte nena Leikapui a zankhaw tairek thleng thleng a Thla eng lawm tawh ngat tan phei chuan, nunhlui hriatchhuah tirtu, lunghlui tileng thartu a ni ve fo ngei ang le.

Mitin kan inang lo ang hian, October thla engmawi tak kan lo dawnsawn dan pawh a inang lo ngei ang. Lunglengmite tan inhnemna, khawharte tan thiantha, thuruk neite tan thuruk vawnpuitu a ni a, karhla dana leng inhmangaihte tan lah, van laizawl chu tuallaia chantira, suangtuahna nena chu tuallaia lendun tir theitu thian tha a ni a, a hlu em a, Chhawrthlapui an lo ti pawh hi a awm hliah hliah mai.

Thlirna tlangdanga thlir chuan….Chutiang taka hlu leh tangkai, mawi leh ropui, Chhawrthlapui an tih hial pawh khian, a mawi vanglai ber October Full Moon lai pawh hian, famkim lo mihring ang maiin, a pang pumpui chu a ti engkim thei bik hauh lo nia; eng mawi viau mahse, a pang lehlam chu a thim ve vek tho a. Mahse, a theih tawpa mawia a rawn inlan avang khian a mawi a, amahah a mawi theih lai ber, a theihna sang ber a nih miau avangin, a pang lehlam thim chu theihnghilhin, a eng mawi tak chu kan lo lawm a ni.

Mihringte pawh hi, ropui viau thin mah ila, kan nunah hian mawi lo lai hi a lo awm ve reng thrin a, kan famkim tak tak thei lo. Mahse, keimahni tawkah, kawng dik zawh tura theih tawp kan chhuah a, kan theih tawk a tha leh dik a kan awm a, chumi tura kan theihna sangber kan hlan zel chuan, kan mawina in mi a pha lo a, kan ropuinain mi a khum lo a nih pawhin kan mawina leh ropuina chu hnualsuat theih a ni hauh lo.

Khuangchawi thla thla eng zet hi zawng, a engmawiin a ropui a, Khuangchawi thla a nih ang ngeiin, khuang nena mualzawl a lo lawm pawh a chakawm rum rum mai.

Siamtu Pathian ropuizia hi a kutchhuakte atangin a fiah e.

Marketing System mumal kan neih hma chuan, Shifting Cultivation a bo hlen lo ang

Mizoram ah hian kuthnathawktu - Farmers tam tak kan awm a, ramdang a kuthnathawktu - Farmers an tihte nen khaikhin chuan kan dinhmun a inang lo hle a. Ramchangkanga Farmers te leh keini ram farmers te phei chu kan dinhmun a inthlau lehzual a, India ram state changkang a mite nen pawh kan danglam hle.

Kan ram Mizoram ah chuan eizawnna tha zawk - sawrkar hna leh private company a hna hmu lo, kawng dang zawh tur hre lo tam tak ten, ei hmuhna atan Lo kan nei a. Mi fel leh taima tak tak, rem hre tak tak te pawh awm ve bawk mah ila, kan ram inrelbawl dan a la fel tawk loh avangin, farmers te dinhmun hi a la awhawm lem lo hle a ni. Hetiang a ni chung hian, damkhawchhuah nan, taima tak leh rim takin an thawk a, chhungkua an chawm a, ei zawn nan Tlangram lo neih - shifting cultivation te hi an la hmang trang trang a ni.

Kan thlai thar chhuahte mumal taka hralhna a awm reng thei thin lo hian nasa takin kuthnathawktute a ti hnual thin. Tlangram lo neih kalsan a, thlai huan nghet leh hlawk zawk pawh siam dawn ila, kan tharchhuah te man man zawk leh mumal taka hralhna a awm miau loh chuan, kuthnathawktu taima ten an thawhrim rah phu tawk dik tak hlawkna an tel ngai lo a, chu chuan beidawnna a thlen fo.

Chutiang chu kan dinhmun a nih miau avangin, sawrkar leh mithiam ten thlai hlawk zawk ching tur leh ram danga an thih thin dan angte min hrilh thin mahse, kan ringhlel rum rum thin. Chuti chung chuan Kuthnathawktuten kan damkhawchhuahna kan zawn a ngai reng tho a, nitin eichawp dap chungin hausak kan suangtuah reng thei tak tak lo. Heng te vang hian, lo neih dan mawlmang ber a kan sawi fo, kan damkhawchhuah ve hram hramna tur min pe thei tu tlangram lo neih dan chi khat -Shifting cultivation chu kan bansan tak tak theih loh phah niin a lang.  

Kan thlai thar te mumal taka hralhna awm se Regulated Market te mumal takin duang ila chuan, Mizoram a farmers te hi kan that chhe bik lo a. Kan ram a Marketing System kan siam that hma chuan, shifting cultivation hi a bo hlen tak takin ka ring lo.

Shooting @ Kovalam Beach

Thla lak pangngaia lak tumin Video in min lo lak sak a, a hlimawm phian. Thlala tu tur hruai zel tawh tur a ni. haaa 

Ni 10.5.2016 Tuesday zana ka Pi (Solfathangi) nena kan zai records:

Ni 10.5.2016 Tuesday zana ka Pi (Solfathangi) nena kan zai records download links:

http://www.2shared.com/audio/SP5kpqYc/May_10_809_PM_Lalpa_i_hnathawh.html

http://www.2shared.com/audio/TvRkQmIj/May_10_816_PM_Aw_Lalpa_I_malsa.html

http://www.2shared.com/audio/76GDd-2F/May_10_821_PM_Isu_i_thianghlim.html

http://www.2shared.com/audio/r2QsImKh/May_10_825_PM_Thisen_hlu_thise.html

http://www.2shared.com/audio/gRuF_A3U/May_10_832_PM_Hmibg_dang_zawng.html

http://www.2shared.com/audio/SMwyERL2/May_10_835_PM_Chhandamtu_hmang.html

http://www.2shared.com/audio/XAiz7319/May_10_842_PM_ka_chhandamtu_ch.html

http://www.2shared.com/audio/GyL0lV8X/May_10_846_PM_Aw_ka_thlarau_th.html

http://www.2shared.com/audio/e2Dns5It/May_10_851_PM__Nangma_thil_rop.html

http://www.2shared.com/audio/A5BcZiWl/May_10_907_PM_Damchhungin_i_th.html

http://www.2shared.com/audio/rMHpoEJI/May_10_913_PM_Chhandamtu_chu_k.html

http://www.2shared.com/audio/8NeQ-gQU/May_10_917_PM_Rinna_thlaa_zar_.html

http://www.2shared.com/audio/QRgLF342/May_10_922_PM_Enru_Pathian_ber.html

http://www.2shared.com/audio/PxyK6RO9/May_10_928_PM_Lal_Isuakraws_hn.html

http://www.2shared.com/audio/CZRGXSxl/May_10_933_PM.html

http://www.2shared.com/audio/6UTxqDft/May_10_952_PM_Vanram_ngaihtuah.html

http://www.2shared.com/audio/hJxATlw6/May_10_956_PM_Fak_leh_dil_hun_.html

http://www.2shared.com/audio/-C038InU/May_10_1001_PM_A_kutphah_ropui.html

Ni 7.5.2016 zana ka Pi Soli nena kan zai thenkhat records

http://www.2shared.com/audio/Fr7zQaMj/May_7_812_PM_Lalpan_a_hmangaih.html

http://www.2shared.com/audio/dlKY3o8S/May_7_816_PM_Aw_Kalvari_thingc.html

http://www.2shared.com/audio/XhM9w_U0/May_7_827_PM_Hmanlai_Farawa_ba.html

http://www.2shared.com/audio/8fhGMNN4/May_7_832_PM_Hming_dang_zawng_.html

http://www.2shared.com/audio/S747dG-_/May_7_836_PM_Ngairawh_Lalpan_a.html

http://www.2shared.com/audio/d6vHt73Z/May_7_842_PM_Manganna_ka_tawht.html

http://www.2shared.com/audio/HwTOkTPr/May_7_846_PM_A_hmangaihna_a_ka.html

http://www.2shared.com/audio/_ARVRC7j/May_7_850_PM_Misual_ka_ni_Lalp.html

http://www.2shared.com/audio/QykkBeYf/May_7_856_PM_Hetah_hian_nunna_.html

http://www.2shared.com/audio/mgrIgkOG/May_7_904_PM_2__Lalpa_chu_faki.html

http://www.2shared.com/audio/Fe0g2sHS/May_7_904_PM.html

http://www.2shared.com/audio/6kxTN764/May_7_910_PM_Ka_thinlung_sual_.html

http://www.2shared.com/audio/fj2pxJZ0/May_7_915_PM_Thu_mak_ka_sawi_n.html

http://www.2shared.com/audio/32fSsNQZ/May_7_921_PM_A_mi_an_riang_maw.html

http://www.2shared.com/audio/o1Orc8J_/May_7_927_PM_ka_pi_solo.html

http://www.2shared.com/audio/S91yuZf0/May_7_928_PM_En_ru_Pathian_ber.html

Tukin - Inrinni tuk ruah sur chu a!!

Tukin chu, Inrinni bazar tur tam takte ruah sur leh thli thaw hian a tibuai ngei ang le!  Chutihlaiin, chawhmeh zuar thrutna thra nei lo, kawngsir remchâng laia thru te pawh a tibuai ve tho ngei awm sia.!

Bazar tur tan chuan ruah sur bân hun te a la nghah theih a, a zuartu tân erawh duh hun hun a kal a rem ve si lo. Threnkhat te phei chu Aizawl pawn atranga rawn kal, an fanau naupang tak tak te kalsana, nizana an chawhmeh zawrh tur kawngkama lo tlaivarpui tawhte an ni leh nghal a.

Ruah sur bân hnuah pawh anni chu an la berh chap anga, beksam huh kawi niaihin an chawhmeh zawrh chu thrutpuiin, hralh ve ngei tumin an lo hmanhlel leh ngei ang a. Nu hausa deuh zawk ten hul phiangin lei tur an rawn melh kual ang a, a zuartu dinhmun chhut map lovin Rs.30 man te pawh chu tlawm taka lei phêt an tum leh ngei awm sia.

Khualral leh Aizawl daifêm atranga kawngsir rem leh rem lova chawhmeh zuar tu tamtakte hian an damkhawchhuahna tur bâkah an fate sikul zirlaibu man turte, Uniform man tur te an tuak a, an zawrh chhuah zawng zawng pawh hi hralh vek ta se, cheng sâng tam man a ni lo. A dawrtute pawh hian chu chu kan hriatthiampui ve a thra khawp mai.

Zanin Zet Zawng

05.04.2016 Tuesday:

Zanriah eikham hnuah News te ka ngaihthlak duhtawk hnu chuan, hmanhmawh lo takin thingpui sen hâng ka in a. Chutih lai tak chuan pawn lamah chuan thawm ri vuk vuk chu ka hre ta a. Kan tukverh inkhar nghet lo laite chu a rawn rik dawt dawt bakah kan bathlarah te chuan vaivut nawi leh hnahthel ro te a rawn tla chum chum bawk a.

Zan zanah ruahsur lai leh nghal a chutia rawn ri ta rum rum mai chu, ruah sur ri chauh a ni lo tawp mai tiin kan tukverah chuan ka va dakchhuak ta a, chuta ka thil hmuh leh hriat chu.!

Ka dah chhuah hma chiah khan engemaw tak hian kan In leh a vel chu a rawn kal pel thuak ni hian ka hria a. Kan bathlar a kan puan them zar, zan dangah pawh kan seng luh ngai lem loh te chu a rawn su thawi nge? zui ve an tum zawk ni, an lo phe vawn vawn mai a, eng tak ni maw tiin, vaivut leh hnahthel nawi lengvel karah kan kawmchar a thingbuk lam chu uluk deuhin ka va thlir leh hrâm a.

Kan kawmchara Thingbuk te pawh chuan engemaw tak an hria a ni ngei ang, an lo phusa nasa mai a, an zar buk te chu nidang ang lo takin an lo kûn hniam suau suau a. Chutiang chiah chuan, thenawmte pangpar khawi te leh phuihnam kung te, an saisu kung te pawh chuan, anmahni rawn kal pel thuak tu chu zui ve tum ni awm takin an lo phe suau suau a. Ka thlir deuh reng a, thenawmte pawh chu an tukverh ah chuan an lo dakchhuak ve sap sap a, mahse hmuh an nei bik nge ka hre lo, rang takin an tukverh leh kawngka te chu an khar a, an kalh ri rawk rawk hlawm a.

Rei ngial ka thlir hnu chuan ruah a rawn tam zual ta hret a, khawpui a rawn ri ta dur dur bawk a, chu chu kawlphe in a rawn pawlh zuai zuai a, tukverh chu nghet taka kharin inchhûng atang chuan tukverh darthlalang phen atangin ka thlir zui ta zel a. Nakin deuhah chuan thenawm te Avogado kung, buk laih mai pawh chu a chet dan a nep ta deuh a, kan puan them zar te pawhin min rawn kalpeltu chu zui zel tumna a nei ta lo a niang, an phe chu a zuai ta raih a, ruah erawh a la sur cherh cherh zel tho a.

Chutia pawn lam thlir a, ka en ngai ka en reng lai chuan, suangtuahna khawvelah cheng zui nghalin, kan naupan lai hunah chuan ka let leh ta a.  Sikul naupang kan nih lai hun te, fur laia sikul kal paha Theihai sên tla kan chhar thin lai te, exam dawna lehkha kan zir ve lauh lauh lai te leh kan zirlaibu thu thenkhat te chu ka hre chhuak thar uarh uarh a.

Kan zirlaibu a thu thenkhat, "Boruak che hi THLI an ti" tih te, "Boruak chu a delhrittu tamna atangin, a delhrittu tlemna hmun lamah a insawn thin a, chu boruak che vel chu THLI kan tih hi a ni" tih te a ni tain ka hria. Ka lung a leng thar hle a. Mahse, current rawn awm thut a, ka awmna a rawn eng ta ut mai chuan ka ngaihtuahna a rawn sawn leh ta daih a.

Kan zirlaibu ami ang khan,  zanina min rawn paltlangtu, kan In leh a chheh vel hnahthel leh pawnchhe khai te, pangpar khawi te leh thenawmte  thingbuk ten an lo rikpui hluai, keiin engnge ni aw ti a, hmuh tuma ka lo thlir kha, boruak che vel THLI chu a lo ni reng mai tih ka ngaihtuah chhuak ta a.

Siamtu Pathianin mit tha tak min pe a, chutih laiin kan hmuh theih loh turin Thli a siam thiam a, a mak ve ngawt mai. Chutih laiin thli chu a thawm leh a hnathawhte kan hmuin kan hre thei thung. Hetianga, hmuh theih si loh, nasa taka thil tithei THLI te hian siamtu Pathian ropui zia a tichiang ngawt mai.

Thli hi awm lo ta se, kan chenna khawvel nawm loh dan tur chu a suangtuah phak bak a ni. Khawlum ni a thlifim thaw heuh heuh kan beisei thin lai te hre reng ila, min ti harh sawng sawng thei tu a ni a, chu chu tun trumah nasa deuh zawkin a rawn thleng ta mai zawk a, kan khawvel a boruak lum leh vawt inthlak thlengin a ken tel, kan tana he khawvel lo nawm zelna tur a lo thawk a ni. Chuvangin Thli te pawh hi an chhia lawh mai lo ang u.

Zanin zet zawng, Thli kha a thaw hawm hawm em a ni.

Dam rei leh rei loh.!

Kum tam na na na chu an dam rei tak a alawm! Mahse mi thinlungah an damrei chiah em?

Damchhung ni chhiar dan thiam takte hi an dam rei ber fo a, an lei taksa ral mahse, an sulhnu a ral ve mai ngai lo. Mi thinlungah an châm reng a, chu chu damrei dan kawng khat leh ţha zawk niin ka ngai. Kum tam tak dam hi a hlu a, chu aia hlu zawk erawh damchhung ni hman thiam hi a ni.

Hringnun hlutna hre lova, awm ze nei lo leh midangte tana tangkaina nei mang hauh lova kum tam tak dam sen ţul ringawt ai chuan, damchhung rei lote pawh tangkai taka hman a, mite tana malsawmna thlentu nih te hi a hlu zawkin ka ring. Chutiang mi chu, an lei taksa a ral anih pawhin, an thiltih ţhate erawh a ral ve mai lovang. Chuchu damrei dan tha zawk pawh a ni ngei ang.

Mizo Union hla - Pi Soli zai

Ni 19.01.2016 zan khan ka Pi Soli dam lo ka kan a, hmanlai thil kan sawi a, kan tititui hle mai. Mizo Union hla te kan sa a, ka Pi Soli zai lai hi Mobile phone ah ka lo record a, hetah hian dah chhuah kan tum ang e.

Phullen ah Krismas 2015